نوێنەرایەتی هەدەپەی پانیشتوو کوردەسانینە پێوەس بە بەرکەردەیشا جە هەولێرۆ پەی سلێمانی، کۆنگرێوە ڕۆنامەوانیشا ڕێکوست و ئاماژەشا بە نایاسایی بیەی قەرارەکەو پەدەکەی کەرڎ.
دماو ئانەی جە لایەنو ئاسایشو پەدەکەیۆ نوێنەرایەتی هەدەپەی ئاگاڎار مکریۆوە کە مشۆم دەمودەس نوێنەرایەتییەکەیشا هۆلێرەنە جیابازا و بلا پەی شارو سلێمانی. ئارۆ نوێنەرایەتی هەدەپەی جە پارکو ئازادی شارو سلێمانینە کۆنگرێوە ڕۆنامەوانیشا ڕێکوست.
جە کۆنفرانسەکەنە حیکمەت هاتیب نوێنەرو هەدەپەی جە پانیشتوو کوردەسانی پەی ئەرەیاۋناکا قسێش کەردۍ و واتش: "جە کاتێنە سەرنیشتوو کوردەسانینە درێژە بە سەپنای قەیومی مڎریۆ، ئارۆیچ پانیشتوو کوردەسانینە جە لایەنو ئاسایشو پەدەکەیۆ ئاگاڎارۍ کریایمێوە کە مشۆم دەمودەس نوێنەرایەتییەکەیما جیابازمۍ و بلمۍ پەی شارو سلێمانی."
هەر جە قسەکاشەنە هاتیب ئاماژەش پانەی دا کە بەشێوێوە فرە نایاساییانە هەولێرەنە بەرۍ کریێنۍ و تەنانەت ژیۋای و خێزانەکێشا جیائاستێنۍ و واتش: "ئێمە پېسە هەدەپەی بەشێوێوە یاسایی خجڵۍ کار و خەباتو ۋێمانمۍ، وە تا ئیساتۍ هیچ گرفتێوەما پەی حکومەتوو هەرێموو کوردەسانی وەش نەکەردەن، پۊکەی ئەرەیاۋنمێش ئینایمۍ چنی چارەسەرکەردەی گرڎ گرفتێوە بەشێوێوە یاسایی. وە ئێمە نمەزانمۍ ۋەرو چ مەڵامەتۍ ئی قەرارە نایاسایی و ڕاوجاما ۋەرا ۋەر مگیریۆنە ۋەر."
