نوێنەرایەتی هەدەپەی جە هۊلێر تیرۊرکەرڎەو "حسێن تورەلی"ش شەرمەسار کەرڎ و داواش جە ھەرمان بەدەسا کەرڎ کە ڕاگیری جە تاوانەو کوشتەینە کەرا. جە ئەرەیاۋناکەنە ئامان کە کوشەرو تورەلی ئەندامو ئاکەپە- مەهەپەیا.
نوێنەرایەتی پارتو دیموکراتیکی گەلان (هەدەپە)ی جە هەرێمو کورڎسانی جە بارەو تیرۊرکەرڎەو ۋڵاڎپارێزو سەرنیشتوو کورڎسانی "حسێن تورەلی" کە شەۋەی ۋیەرڎۍ سەعاڎ ٢٠:٣٠ دەیەقۍ جە فاملی مۊڵو دهۊکینە کریا ئامانج، ئەرەیاۋنێۋەش وەڵاکەرڎۊ.
جە ئەرەیاۋناکەنە ئامان:" سیاسەڎمەدارۍ هەدەپەی بەمەڵامەتو فشارەکا ئاکەپەی و مەهەپەیۊ ناچارۍ بیېنۍ سەرنیشتوو کورڎسانی جیابازا و بەیا پۍ پانیشتوو کورڎسانی، بەڵام ھجومەکۍ میتو ترکی بە هامکاری چن هێزێۋە هەرێمو کورڎسانی سەرو ئی سیاسەڎمەداراوە زیاڎش کەرڎەن".
ئاماژەش پانەیچ دا، ھجومەکۍ بەتایبەت جە ساڵەو ٢٠٢١یۊ چڕکریېنۍ سەرو ئەنڎامەکاشا جە شارو سلێمانی-نە، حەریۊ جە" یاسین بلوت، زەکی چەلەبی ، ناگاهانە و مامۊسا شەماڵ) گەشمەرڎۍ کریێنۍ .
نوێنەرایەتى هەدەپەی باسشا چانەیچ کەرڎ، حەتا ئیسە کوشەرو "حسێن تورەلی" نەگیریان کە ۋێرەگاو ھېزی دوۋەشەممەی سەرو ھەرمانەکۍ ۋێشۊ بە حۊت گولۍ جە لایەنو میتی تورکیۊ تیرۊرکریا، کە ۋەڵتەر "حسێن تورەلی" جە ھجومېۋە چەکڎارینە زامڎار کریابۍ.
ئانەیچ وزیا ڕوۋە کە، ئی ھجومۍ میتی تورکی پۍ هەڕەشەکەرڎەی و دلېنەبەرڎەو کەسایەتییە سیاسیەکا سەرنیشتوو کورڎسانین کە پانیشتوو کورڎسانینە ئەرەنیشتێنۍ، بە قسۍ نوێنەرایەتى ھەدەپەی ئا کەسەی ئەنڎامەکەو ئاڎیشاش گەشمەرڎەکەرڎەن سەر بە ئاکەپە-مەهەپەین.
هەدەپە سەرەڕاو شەرمەسارکەرڎەی گەشمەرڎەکەرڎەو ئەنڎامەکەیشا جە دهۊک داواش جە لایەنە پەیوەنڎیدارەکا پارێزگاو دهۊکی کەرڎ کوشەرو "حسێن تورەلی" بێزاۋە دۊسییەکەیش گوم نەکەرا.
هـ . ش
