بە پاو هەواڵێوە ئاژانسوو ئیرنا-ی، "عەباس عەلی سولەیمانی" یۊ جە ٨٨ ئەندامەکەو ئەنجوومەنوو دەسچنا کە باڵاتەرین ئۊرگانوو دیاریکەرڎەی ڕابەری ئایینی ئێرانین، جە هجوومیوەنە کوشیان.

ئەرەیاونیان کە هجوومەکە لاو کەسێوە چەکڎاریوە جە شاروو بابۊلسەری و جە نزیکوو کەناراوەکاو بەحروو خەزەرینە کریان.

بە پاو زانیارییەکا جە هجوومەکەنە یەرۍ کەسۍ تەرێچ برینڎارۍ بیێنۍ و هجوومبەرەکەیچ گیریان.

سولەیمانی هەمان وەختنە نوێنەروو "عەلی خامنەیی" بییەن جە پارێزگاو سیستان و بەلوچستانینە.

ئێراننە قۊمیای هجوومکەرڎەی سەروو کاربەدەسە ئایینیا فرە بەکەمی کریۊ.

جە نیسانوو ٢٠٢٢ جە شاروو مەشهەدینە سەرنیشتوو وەرکەوتوو ئێرانینە، دووۍ باوڕمەندۍ شێعۍ کوشیێبێنی، ئەرەیاونیا کە ئا کەسۍ لاو ئەنداماو گرووپە جیهادییەکاوە کوشیێنۍ.

س.ز