گۆشەگیری رەها سەروو ڕابەروو گەلوو کوردی ماوەو ٣٣ مانگان بەردەواما. ناڕەزایەتیەکۍ جە ۋەران ۋەروو گۆشەگیری ئیمراڵی درێژەشا هەن. هەڵای بەشداربیەی جە هەڵمەتەو "ئازاڎیی پۍ عەبدوڵا ئۆجالانی و چارەسەری سیاسی پۍ پرسوو کوردی" کە جە ١٠و تشرینوو یوۋەمی دەسشپنەکەرڎەن، بەردەواما.

نوێنەروو هەمیشەیی جمیەروو دۆستایەتی گەلا جە دژوو نەژاڎپەرستی (ئێم ئاڕ ئەی پی) جە نەتەوەیۊگېرتەکانە جانفرانکۆ فاتۆرینی جە بارەو گۆشەگیری چڕوو ئیمراڵی قسېش پۍ ئاژانسوو هەواڵوو فورات (ANF)ی کەردۍ. ئێم ئاڕ ئەی پی رێکوزیېوە مەدەنی میان نەتەوەیین.

' گۆشەگیری پاشێلکەرڎەی مافەکاو مرۆڤین'

جانفرانکۆ فاتۆرینی باسش چانەی کەرڎ، کە گۆشەگیری سەروو ڕابەروو گەلوو کوردی عەبدوڵا ئۆجالانی پاشێلکەرڎەی مافەکاو مرۆڤین و واتش، مشۊم دەموودەس دمایی بە گۆشەگیری بېنە. فاتۆرینی پی جۆرە دووا: "ئێمە متاومۍ هەلومەرجێوە کە عەبدوڵا ئۆجالانش ئینا چنە، چنی ئاژەو سەرکردەو ئەفریقاو پانیشتی نێلسۆن ماندێلای مقارنەش کەرمۍ. گەرەکشابۍ ماندێلایچ جە دورگېوەنە و دلۍ گۆشەگیرینە بازاوە، بەڵام جە ئاکامەنە ئازاڎیی ماندێلای پۍ چارەسەری کێشەکا جە ئەفریقای پانیشتەنە دەوری سەرەکیش گېڵنا. بەهەمان شێوە ئازاڎیی عەبدوڵا ئۆجالانیچ بۊ بە مایۍ ئانەی پرسوو کوردی بە ئاشتیانە چارەسەر کریۆ.

فاتۆرینی ئانەش وست ڕووە کە کەمپینوو 'ئازاڎیی پۍ عەبدوڵا ئۆجالانی و چارەسەری سیاسی پۍ پرسوو کوردی" فرە گرنگا و داواش جە گرڎ کەسێوە کەرڎ کە پەشتیوانی ئی کەمپینەیە کەرا. فاتۆرینی دەسنیشانش کەرڎ کە مشۊم ئەوروپا پۍ فاڕیای ئا ئاژەی کە عەبدوڵا ئۆجالانش ئینا چنە، گنۊنە ۋېش و هەنگامە بنیۆ.

'هەڵوێسوو ئەوروپای بێ بنەما و بێمانان'

فاتۆرینی باسش جە هجومەکاو دەوڵەتوو تورکی پۍ سەروو ۋەرنیشتی و هەرێمەکاو تەروو کوردسانی کەرڎ و بێدەنگی ئەوروپایش جە ۋەران ۋەروو هجومەکا دەوڵەتوو تورکینە شەرمەزار کەرڎ و ئا هەڵوێسېشە بە بێ مانا و بێ بنەما نامۍ بەردۍ و واتش، "سەرکردەکۍ ئەوروپای ۋیرکەراوە جە رێککۊتەی چنی ئەوروپای ئینا مەسڵەحەتوو وڵاتەکاشانە. بەڵام ئاڎۍ  ئێمە چنی متاومۍ متمانەما بە ئەندامێوە ناتۆی بۆ کە سیستموو وەرگیری موشەکیش جە روسیای سانان؟ ئینە دژ بەیۊین و تورکیا تەنیا ئەندامێوە ناتۆیا کە کردەوېوە پی جۊرەشە ئەنجام دابۆ، بەڵام سەرباروو ئانەیچ ڕاش پنە مڎریۆ. وچیۆ ئاگاڎارۍ تاوانەکا ئەردۆغانینمۍ جە تورکیا و سوریا'نە، بەڵام دیسان ۋەران ۋەر پا ئاژەیە بێدەنگېنۍ. ئا وەختە مشۊم ئینسان پرسیارە کەرۆ، لۆژیک جە سیاسەتوو ئەوروپاینە کە بانگەشە کەرۆ مافەکاو مرۆڤی پارېزنۆ، چېشا؟ بە ڕۊشنی حیچ لۆژیکێوەش نییا".

'جە ۋەرنیشتەنە تاوانەو جەنگی کریۆ، نەتەوەیۊگېرتەکۍ بێدەنگېنۍ'

فاتۆرینی ئەرەیاۋناش کە کردەوەکۍ دەوڵەتوو تورکی جە ۋەرنیشت تاوانۍ جەنگینۍ و پی جۆرە بەردەوامبۍ، "نەک حەر جە ۋەرنیشت، ئەگەر ئێمە جە کردەوەکاو دەوڵەتوو تورکی جە ۋەران ۋەروو گەلوو کوردی تەماشەکەرمۍ، ئێمە قڕکەرڎەی موینمۍ. ئێمە قڕکەرڎەی و پاکتاوی کولتوریچ موینمۍ. جە گوزارشتەکاو میکانیزمە جیاجیاکا نەتەوەیۊگېرتەکانە، گرڎ جۆرە پاشێلکارییەکۍ مافەکاو مرۆڤی جە لایەنوو تورکیایۆ ئاشکرا کریېنۍ و سەرکۆنەکریېنۍ. ئیتر پۍ چی جە ۋەران ۋەروو ئا تاوانانە، دەسەو مافەکاو مرۆڤی جە نەتەوەیۊگېرتەکانە حیچ قەرارېوەش بەرنەکەرڎ. چا ئاژەنە جە هەرێمەکەنە بابەتێوە پەیوەس بە گەمەی سیاسی ژیۆستراتیژیک ئینا ئارانە. راسا تورکیا جە هەرێمەکەنە فرەو مژارانە قسېش پۍ واتەی هەنۍ، بەڵام مەبۆ ئانە بۊ بە ئاستەنگ کە نەتەوەیۊگېرتەکۍ ئەرکوو ۋېش جابەجێ نەکەرۆ".