جە لەندەن و پایتەختوو بەریتانیاینە نەورۆز بە دروشمەو "ئازاڎیی پۍ ئۆجالانی، چارەسەری ئاشتیانە پۍ پرسوو کوردی" جە پارکوو فینسبوریێینە بە بەشداری هەزاران کەسا لوواڕاوە.

مەراسیمەکە بە دەیەقێوە بێدەنگی پۍ ڕێزۋنەگێرتەی جە یاڎوو گەشمەرڎا کۊشیای ئازاڎیی کوردسانی دەسشپنەکەرد. شانۆو مەراسیمەکەی بە وێنەکا رابەروو گەلوو کوردی عەبدوڵا ئۆجالان، مەزڵوم دۆغان و گەشمەرڎا تەروو نەورۆزی ڕازیابێوە. حەرپاسە مێڎانەکە بە وێنەکا جەنگەوانا بەریتانیاو دلۍ یەپەگەی و فیراز داغ کە جە ۋەرنیشتەنە گەشمەرڎۍ بیۍ، حەرپاسە وێنەکۍ ئاتاکان ماهیر، سینان دێرسیم و ئیبراهیم کایپاکایای ڕازیێبێنێوە.

'ژیۋایۍ بێ ئۆجالانی جە ئێمە حەراما'

جە سەرەتانە هونەرمەنڎا مەروان شان و میر پەروەر هونەروو ۋێسا پێشکەشکەرد و جەماوەر دەسشا بە هۊرپڕای کەرد.

وتارەو یووەم و پیرۆزکەردەکەی جە تەرەفوو هامسەرۆکا ئەنجومەنوو گەلوو کوردی جە بەریتانیا ئاسۆ کەمالی و سەعید سوروچیوە ۋنریاوە. هامسەرۆکا ئەنجومەنەکەی ئاماژەشا پانەی کەرد کە نەورۆز ڕۊو ئازاڎیی، مدرامان و ژیۋایۆ نەتەوەیی گەلوو کوردیا و واتش "نەورۆز نامۍ پاڕادایموو ئازاڎیی رابەر ئاپۆیا".

جە درێژەنە ئانەشا وست ڕووە، "پێسە گەلوو کوردی ماچمۍ، رابەر ئاپۆ تاکە ئیرادەو گەلوو کوردین، گێرتەو رابەر ئاپۆی گێرتەو گەلوو کوردین، ئازاڎیی رابەر ئاپۆی ئازاڎیی گرڎیمانە، جە شۊنێوەنە کە رابەر ئاپۆ چا ئازاڎ نییا، ژیۋای جە ئێمە حەراما. فاشیزم دلێنە مشۆ و رابەر ئاپۆ ئازاڎ بۆ".

دماتەر پارێزگاروو لامبێسی، سەرباز بەرزنجی، پارێزگارەو ئەنفەیڵدی سونا هورمانە، پەرلەمانتاروو پارتوو کرێکارا کاترین وێست و پەرلەمانتاری سەربەخۆ بامبۆس چارالامبۆس قسێشا کەردۍ و نەورۆزشا جە گەلوو کوردی پیرۆز کەرد و ئانەشا وست ڕووە کە نەورۆز ئیرادەو ئاشتی، هامپەشتی، یۆبیەی و کۆشیاین و جەختشا سەروو گرنگی مافوو دیاریکەردەی چارەنوویس و گەلوو کوردی کەردۆ.

جە درێژەو مەراسیمەکەینە هونەرمەنڎا بەسەر شاهین، نەجمەدین غوڵامی گۆرانیێشا پێشکەش کەردۍ و جەماوەر دەسشا بە هۊرپڕای کەرد و جۆش و خرۆششا بە مەراسیمەکەی بەخشا.

دماتەر سیاسەتمەداروو کوردی ئەحمەد یەڵدرم و سەرۆکی وەڵینوو پارتوو کرێکارا بەریتانیای جێرمی کۆربین قسێشا کەردۍ.

ئەحمەد یەڵدرم پەرلەمانتاری وەڵینوو هەدەپەی سەرنجش وست سەروو گرنگی یۊبیەی نەتەوەیی کوردی و ئانەش وست ڕووە کە گەلوو کوردسانی بە کۊشیای و ۋێڕاگری سەرکۊتەی و قەوارە مسۆگەر کەرۆ.

'مشۊم ئۆجالان ئازاڎ بکریۆ'

جێرمی کۆربین باسش جە کۊشیای گەلوو کوردسانی کەرد و داوایچش کەرد رابەروو گەلوو کوردی عەبدوڵا ئۆجالان ئازاڎ بکریۆ. کۆربین ئانەش وست ڕووە کە بە بێ ئازاڎبیەی عەبدوڵا ئۆجالانی ئازاڎیی گەلوو کوردی دەسەبەر مەبۆ و داواش جە گرڎ لێوە کەرد پەی سەروستەی هەڵمەتەو میان نەتەوەیی ئازاڎیی عەبدوڵا ئۆجالانی خەبات کەرا.

جە دمادمایی مەراسیمەکەینەکۆما زەلال و هۆزان دینۆ پڕۍ سەروو شانۆی و گۆرانیێشا چڕیۍ.