پارتوو یەکسانی و دیموکراسیی گەلا (دەم پارتی) دیگۆرو قەرسینە جادەو میللەتینە نەورۆزش مەبارەک کەرد. یاگەدارەو سەرۆک فراکسیۆنی گولستان کلچە، ڕێکوستەی قەرسوو دەم پارتی، ورچنییەکاو هامشارەوانیی قەرس و دیگۆری و چندین کەسا بەشداریی ئاهەنگو نەورۆزی بیێ. ژەنی و زارۆڵێ بە جلوبەرگی تایبەتۆ ئامێ مەیدانوو نەورۆزەکەی.

ئەوەڵو ئاهەنگەکەینە دەیەقێوە مدرێ پەی یادوو گەشمەرداو کۆشیای ئازادی و دیموکراسی.  

ئاهەنگەکەنە چالاکەو ژەنە ئازادا (تەژەئا) رۆسا ئیلدانە واتش: "دیگۆر ماناو ژیواینە، یۆن چا مەیدانا کۆشیای و ئازادی چێوە دەسش پەنە کەرد. باوڕما پاسنەن  گەلما تا ئاخر جە ویر و هۆشوو وێشنە ئی مدرامانەیە ورگێرۆ."

دمایی ئاهەنگەکەنە یاگەدارەو سەرۆک فراکسیۆنوو دەم پارتی گلستان کلچە واتش: "ڕۆی ڕۆشننە گرد کەسێوە مێ. نەورۆزو ئازادی و ئاشتیین. نەورۆزو مدرامانین، نەورۆز وەنەو گەلوو کوردی و تەماموو گەلاو وەرکەوتوو دلێراسەی مەبارەک بۆ.

سەدێوە پەرسی هەنە. گەلوو کوردی پەرسەو یەکسانی و ستاتۆیش هەنە، گەلوو کوردی پەرسێوە وجودییەش هەنە. سەدێوە تازە دەس پەنە مکەرۆ. تا گەلوو کوردی چی سەدەنە بۆ، مشۆم ئاشتی بێ کایەوە. سیاسەتوو ڕەتکەردەیۆ و نکۆڵیکەردەی سەدەی پووچ بییەنۆ. بەڕێز ئۆجالان یەکانە موخاتەبەو پەرسەو کوردین. پەوکای مشۆم  گۆشەگیری لابریۆ."

درێژەو قسەکاشنە کلچ باسوو ورچنیەی٣١ ئاداریش کەرد و واتش: "پەوکای ماچمێ یۆبییەی وێما قەوەت مکەرمێن. با یەک دەنگوو کوردی بەفیڕۆ نەلۆ. با دەنگوو کوردا پەی دەم پارتی بۆ. دەم پارتی گەورەتەر بکەردێ. کۆشیای گەلیما گەورەتەر بکەردێ."

دماو قسەکا بە گۆرانییەکاو هونەرمەندا ئایشە شەفاقێ و عادل شێرازدی، گەل بەشداریی ئاهەنگگێڵنای مەبارەکباییەکەی بیێ و ئاهەنگەکە تا ئاخر بەردەوام بی.