مەنتێقەو دەپوو خارپێتینە بە درووشموو "ئەرەپڕە وەختوو ئازادی و سەرکەوتەین" نەورۆز مەبارەک کریا.

هامسەرۆکی گردینوو پارتوو هەرێمە دیموکراتیکەکا (دەبەپە) چیدەم کلچگون ئوچارە سەروو قسەکێ ئەردۆگانی کە واتەبێش "تیرۆریستێ"، واتش: "نکۆڵی جە زوانیما کەرا، بە دەنگێوە بەرز ماچمێ، مشۆم دەوڵەت بزانۆ کورد هەن، زوانی کوردیی هەن، با دەسەڵات و ئاکەپەیچ خاس بزانا، پێوە ئینەیە چەسپنمێ".

ئوچار باسوو ئانەیش کەرد، جە ڕاپیمای گەورەو ئازادیی هێلەکێ چەرمێشا کەردێنە، ئینەیچ پەی چارەسەرێوە درێژخواینوو پەرسەو کوردی و ئاشتیی بێ، باوەڕوو ئێمە بی بە پارادایموو ڕابەروو گەلوو کوردی عەبدوڵا ئۆجالانی.

هەرپاسە ئاماژەش کەرد بە کۆبییەیۆ وەزیراو دەوڵەتوو تورکی چەنی وەرپەرساو عێراقی و ئەرەیاوناش ئا وەختە ئێمە پەی کۆشیەیمێ، دەسەڵات شار بە شار و وەڵات بە وەڵات گێڵۆ پەی کوشتەی کوردی، ئامانجوو کۆبییەیۆکەی کە درێژەدای بێ بە جەنگی دژو گەلوو کوردی.

ئوچارە تیشکەش وستە سەروو پەیاموو ڕابەروو گەلوو کوردی عەبدوڵا ئۆجالانی جە نەورۆزوو ٢٠١٣ و واتش: "گەلاو تورکیای هەفتێونە بەڕێز عەبدوڵا ئۆجالانی پێسەو پەیامبەروو ئاشتی قبووڵ کەرد، بەڕێز عەبدوڵا ئۆجالان هەڵای پەیامبەروو ئاشتیین. جە چارەسەروو پەرسەو کوردی و گردوو پەرسەکاو تورکیاینە، بەڕێز ئۆجالان ڕەنجێوە فرەش دان. پەی چارەسەری دیموکراتیکوو پەرسەو کوردی و پێوەژیوای گەلا کەوتیمێ ڕا. نەورۆز بۆ بە یوە جە هەنگامەکاما. ورچنیەی ٣١ ئادارینە کوردستاننە جوابی حەرە گەورە مدەیمێ ڕژێموو قەیومی ئاکەپەی".

ئاماژەیچش کەرد بە قەدەغەو سەروو زوانی کوردی، واتش جە پەرلەماننە زوانی کوردی پێسەو زوانێوە "نەشناسیای" پێناسە کریان، واتش: "ئەگەر چی وڵاتەنە کوردەکێ هەڵای متاوا بە زوانوو وێشا دوا، ئەگەر هەڵایچ دەسبەردارێ کۆشیای نەبیێنێ، ئانە بۆنەو کۆشیای مەزڵوم دۆغانی و ساکینە جانسزێ و گوڵتان کشاناکەکاوەن".