دمابەدمای ئانەیە جە شارو سنە-ی، نویسەر، ڕۆچنامەوان، چیرۆکنویس و شاعیری نامیی و نەتەوەیی کوردی (جەلال مەلەکشا)، جە تەمەنو ٦٩ ساڵانیەنە کۆچیی دماییش کەرد، تەرمەکەش بە ڕاوڕەسمێوی شکۆمەندی جەماوەری جە سنەوە بریاوە زادگاکەش (دەگاو مەلەکشا)ی و ئەسپەردە کریا.
سەرەڕاو پەتا و نەوەشی کۆرۆنا-ی، بەڵام جە ڕاوڕەسمو ڕەوانەکەردەیش پەی زادگاکەیش و ئەسپەردەکەردەکەیشەنە هەزاران هاموڵاتیێ سنەی و شارەکێ تەرێ وەراسان (ڕۆژهەڵات)و کوردستانی بەشدارێ بێنێ.
جەماوەری بەشدار بە دروشم-دای و ئەوەوانای شیعرەکانو کۆچکەردەی، دڵسۆزی و غەمگینی و ئەمەکداری وێشان پەی جەلال مەلەکشا--ی و خانەوادەکەیش نیشانەدا.

جەلال مەلەکشا، یەک شەممەی ویەردە، بە جەڵدەو دڵی جە تەمەنو ٦٩ ساڵانیەنە جە شارو سنە-ی کۆچی دماییش کەرد.
مەلەکشا ساڵەو ١٩٥١ی جە دەگاو مەلەکشا-ی سەر بە پارێزگاو سنە-ی جە بنەماڵێوی وڵاتپارێزی جەئەڎێ بییەن. وانای سەرەتاییش جە زادگاکەش تەمامنابێ و دماتەر قۆناغەکێ وانای ناوەندی و ئامەدەییش جە سنە تەمامێ کەردێنێ و جە شارەکەنە نیشتەجا بییەن.
مەلەکشا، جە لامیێتیشەنە (گەنجی) دەسش دان نویستەی و هۆنیەی شیعرێ. بەڵام سەرەتا بە فارسی نویستەنش و هەر زووچ دلێ فارس زوان و نویسەکانە نامێ و نامبانگش وەڵاو بییەنەوە و دەنگش دانەوە و ئەشناسیان و بییەن بە ئەندام جە "یەکێتیی نویسەرانو ئێران"ی.

مەلەکشا، هامکات کەسێوی شۆڕشگێڵی چەپ و کۆشەرێوی نەتەوەیی بییەن. سەرەتا دژ بە دەسەڵاتداری شاهنشایی ئێران-ی، پەیوەست بییەن بە چریکە فیدایەکێ خەلق-ی و دماتەر بییەن بە ئەندامو کۆمەڵە-ی و سەرجەم چالاکییە ئاشکرێ و نهێنیەکانە بەشدار بییەن. سەرو ئانەیە زیندانی کریان و ئەشکەنە دریان.
دمای سەرکەوتەی شۆڕشو گەلانو ئێرانی جە ١٩٧٩، کۆڵش جە چالاکی سیاسی نەڎان و ئیجارە ڕژێمو کۆماری ئیسلامی دەستگیر و زیندانیی کەردەن.
ئیتر جە ئی سەردەمەنە مەلەکشا وازش جە فارسی نویستەی ماوەرۆنە و دەسش دان کوردی نویستەی و جە کوردی نویستەی و هۆنیەی شیعرێ بە کوردیچ سەرکەوتە بییەن و هەر زوو ئەشناسیان و بییەن بە کەسێوی دیار و نامیی کوردستانی.
 دمای ئازادبییەیش جە زیندانی، بە کەردەیی جە ١٩٧٩وە تا کۆچیی دماییش کەردەن، نویستەی شیعرێ و چیرۆکێ و بابەتێ ئەدەبیێش کەردەن پیشە و ژیوای وێش پەی ئی بوارەیە تەرخان کەردەن و مەتاوانش پێشەنگانە خزمەتی فرە گەورە بە نویستەی و ئەدەبیاتی کوردی بکەرۆن. هاموەخت بەنویستەی و بە تایبەتی شیعرێ دژ بە تاریکی و دماکەوتەیی و ئەرگێرتەیی (داگیرکاری) بمدرۆنەوە و وشیاری نەتەوەیی وەڵاو بکەرۆنەوە.

جەلال مەلەکشا تا کۆچیی دماییش کەرد، ژیوایێوی سادە و هەژارانەش بەردسەر و هەمیشە دژ بە ستەمکاری مدرانەوە و بەرەو گەلیش هۆروچنا و تەسلیم بە دەسەڵاتی و وەشگوزەران و بەرژەوەندی کەسیی نەبی. مەلەکشا وەرو کەمدەستی و هەژاری نەتاوانش فرێو جە بەرهەمە ئەدەبیەکانو وێش چاپ بیاونۆن و وەڵاوێشان بکەرۆنەوە. بە جۆرێ کە جە ١٠ کۆمەڵە شیعرێ و چێرۆکێ کە نویستێنێش، تەنیا "زڕەی زنجیری وشە دیلەکان" و "کارەسات" چاپێ و وەڵاوێ کریێنێوە.