یاگەگیرو سەرۆکو پارتو سەوزو سویسرای، ئەندامو پەرلەمانو فیدراڵی و ئەندامو کۆمیتەو کاروبارو چبەرو پەرلەمانی نیکۆلاس والدێر، سەبارەت بە بانگەوازییەکەو ڕابەر ئاپۆی پەی 'ئاشتی و گلێرگەی دیموکراتیک' پەی ئاژانسو هەواڵو فوراتی قسێش کەردێ.

'بانگەوازەکە پەی پێوەرە ژیوای گرنگی وێش هەن'

نیکۆلاس والدێر جەختش چانەیە کەردۆ کە بانگەوازەکەو ڕابەر ئاپۆی فرە گرنگا و واتش: "ئینە بانگەوازێوەن پەی ئانەی ئیتر کاتو ئانەی ئامان کە یۆیگێرانە، کاتو ئانەی ئامان دۆڵەتو تورکیای پەی پێوەرە ژیوای تورکیانە هەنگامەی جدیە بنیۆنە. ئی بانگەوازە ماچۆنە کە تورکیا مشۆم بە ڕێبازو سیاسی و دیپلۆماسی، مافە بنەڕەتییەکێ کوردی و پەرسە بنەڕەتییەکێ کوردی چارەسەرێ کەرۆنە، ئیتر کاتو بەکارئاردەو چەکی دمایش ئامان. ئینە بانگەوازێوەن پەی سەرۆککۆماری ئەردۆغان کە مشۆم چنی گەلوو کوردی پەرسەکا چارەسەر بکەرۆنە.

جە ڕوانگەو منۆ ئی بانگەوازە ڕێوەنە پەی پارێزناو گەلوو کوردی جە سەرنیشتوو سووریاینە. ئیسە حکومەتێوە تازە ئینا سەرو دەسەڵاتدایۆ، فرە لاوازە. ئینەیچ دەرفەتش بە حکومەتو تورکیای دان کە دەسوەردای جە ناوچەکەنە بکەرۆ. پحکەی بەڕاو من بانگەوازێوە ژیرانەن و پەنەوازا پێسەو وێش وەرچەم گیریۆنە."

'مشۆم دۆڵەت هەنگامەی جدیە بنیۆ'

 نیکۆلاس والدێر جە میانو قسەکاشەنە ئەرەیاوناش، مەرجی سەرەکی ئانەن کە دۆڵەتو وحکومەتو تورکیای، وەڵێ ئانەی چەک بنریۆرە هەنگامەی جدیە بنیا و واتش: "دۆڵەتو تورکیای مشۆم گوشار و جەنگ دژو کوردی مردنۆ، سەرەتا گرڏ یان بەشێ جە زینانیا سیاسی کوردی ئازادێ بکەرا. دمای بە پێشێلکارییەکا بارۆنە، و ڕا دۆنە کورد بە فەرمی نوێنەرایەتی وێش بکەرۆ.

ئی بانگەوازە کە ئێژا ئۆجالان پێشکەش کەردەن پەیامێوە فرە بە‌هێزا. کورد بە ڕۆشنی ئانەش وستەن ڕووە کە ئامادەن چەک بنیۆرە. بەڵام مشۆم لایەنی وەراوەریش هەنگامە بنیۆنە و دەرفەت و هەلومەرجەکا کەرۆوە. ئی ڕێ مشۆم ڕێوە سیاسی و دیپلۆماسی بۆنە. جە وەراوەرو ئی بانگەوازەینە پەنەوازا سەرۆککومار ئەردۆغان دەمودەس هەنگامەی جدییە بنیۆ و ئامادەیی وێش پەی ئەرەنیشتەی یاونۆنە. پەی ئانەی چارەسەرێوە کاریگەر بێزۆوە، مشۆم گفتوگۆ چنی نوێنەرا پەکەکەی دەس پنەکەرۆ و چی پرۆسەنە گرنگا گرڏ لایەنەکێ قەولدانە پەنا پەی تنوتیژی نەبەرا. داواو ڕێبازێوە چا جۆرە کریۆ. ئینە هەنگامێوە بنەڕەتی وگرنگا. لایەنەێوە ئەرەیاونانش کە ئامادەن چەک بنیۆرە و ئینەیچ پەیامێوە فرە بەهێزا. هیوادارەنا دۆڵەتو تورکیاچ ئینەیە وینۆنە و با جۆرە هەنگامە بنیۆ."

'پەنەوازا هەنگامەی یوەمە ئازادیی ئۆجالانی بۆ'

نیکۆلاس ئاماژەش پانەیەدا کە هەنگامێوە گرنگو ئی پرۆسەیە ئازادی ڕابەر ئاپۆین و واتش: "ئا کەسەی بانگەوازێوە جا جۆرەش ئەرەیاونان و هەڵوێسێوە پاسە جدییپش وەراوەرو چارەسەری و ئاشتی نیشاندان، عەبدوڵا ئۆجالانا، پەی ئانەی پرۆسەکە سەرکۆتە بۆنە، مشۆم عەبدوڵا ئۆجالان ئازاد کریۆ. ئازادکەردەو ئێژا ئۆجالانی بە پەی لواو من نیشانەو نیازپاکی حکومەتین.

'ئەر لایەنەکێ گەرەکشا بۆنە، سویسرا تاوۆنە دەورو ناوبژیوانی گێڵنۆ'

 نیکۆلاس واڵدێر ئەرەیاوناش؛ کە سویسرا تاوۆنە جە چوارچێوەو داواکارییەکا هەردوولای دەورو نێوەندگیری گێرۆنە ئەستۆ و سەرو ئی پرسەیە واتش: "سویسرا پێسەو وێ سەپنای گەرەکش نیا نێوەندگیری کەرۆ. بەڵام چی بابەتەنە و بە بڕوا من پەیوەندیێ بەهێزو متمانەش هەن هەم چنی تورکیا و هەم چنی گەلوو کوردی پۆکەی تاومێنە دەورێ ئەرێنی وینمێنە. چێگەنە ئانەی گرنگا حکومەتەکەما پەیوەندی بە حکومەتس تورکیا و دەسەڵاتدارا کوردیۆ گێرۆنە و ئامادەیی وێش سەرو ئی پەرسەیە ئەرەیاونۆنە.

'ئیتر کاتو ئانەین یۆبییەو ئەورووپای سەبارەت بە پەکەکە هەڵوێسو وێش فاڕۆنە'

نیکۆلاس واڵدێر جە دماین و قسەکاشەنە ئەرەیاوناش کە هیوادارێنمێ ئەورووپا جە پرۆسەکەنە بەشداری بکەرۆ و پەکەکەی جە لیستو تیرۆری لابەرۆ و واتش: " ئی قەرارەو ئەورووپای قەرارێ سیاسییا و تەنیا پەیوەندیش بە ئەورووپایۆ مەبۆ. پۆکەی هامپەیمانەکا تەرێ تورکیای پەکەکەشا بە ڕێکوزیێوە تیرۆریستی شناسان.

ئی قەرارە زیاتەر پەی ڕازیکەردەو حکومەتو تورکیای دریان بەڵام بنەمێوە ڕاس نییا، بەڵێ ڕووداوی تنوتیژیێ ڕووەشادێنە بەڵام دوور بییەن جە تیرۆریۆ، جمیەرێوە ئەرەپڕای و مڏرامان بییەن پەیوەندیش بە مافو گەلێوە هەن پۆکەی بەڕاو من ڕاس نییا بە چالاکیەکێ پەکەکەی واچانە کردەوەی تیرۆریستی، ئینە قەرارێ سیاسییا و کاتێ بەرەو پرۆسەو ئاشتی هەنگامە منییەیمێ هیچ مانێوە پەی ئا قەرارەیە مەمەنۆوە، پۆکەی مشۆم هەردووی لا هەنگامەی ۆشنەو وجدیی بنیا. بەڕاو من ئەوروپا تاوۆنە چا بارۆ دەورێ گرنگ وینۆنە و ئینەیچ یاوۆنە ئا ڕادە کە کەس بە تیرۆریس نەشناسا."