وەرپەرسوو میانگەو ڕێکوستەی یۊبییەی نیشتمانیی کوردسان (یەنەکە)ی، "داود جوندی" ماچۊ، پارتوو دیموکراتوو کوردسانی (پەدەکە)، ڕا مەڎۊ ئاوارە ئێزیدییەکۍ بلاوە شەنگال، ئانەیچ پەی بەکارئارڎەیشا پەی مسڵەحەتی حزبی، بەتایبەت جە ورچنیایەکانە.
ئاوارەکاو شەنگالی جە ١٧ کەمپاو پارێزگاو دهۊکینە مژیوا، کە ئینۍ چێروو دەسەڵاتوو پەدەکەینە، پەوکای پەدەکە مەنەیۊشا بەکار مارۊ پەی مسڵەحەتی حیزبی بەتایبەت جە ورچنیایەکانە، ڕا مەڎۊ گێڵاوە پەی یاگەکاو وێشا، چونکوم دۊسیەو ئاوارەکا و بەتایبەت ئێزیدییەکا پێسە کارتێوە فشاری سیاسی دژوو عێراقی بەکار مارۊ.
خەڵکوو شەنگالی و موسڵی، دماو هجووموو چەتەکاو داعشی جە هامنوو ٢٠١٤یۊ ئاوارۍ بیۍ، ئیسە نزیکەو ٣٠٠ هەزار ئێزیدییا جە ١٧ کەمپاو ئاواراو هەرێموو کوردسانینە مژیوا، بە پاو ئامارەکا، هەڵای ٢٢٠ هەزار ئێزیدیۍ چی کەمپانە مژیوا و پەدەکە مەنەیۊشا پەی مسڵەحەتوو وێش بەکار مارۊ.
وەرپەرسوو میانگەو ڕێکوستەی شەنگالوو یۊبییەی نیشتمانیی کوردسانی، "داود جوندی" پەی پێگەو حیزبەکەیش ماچۊ: «گێڵایۊ ئاوارەکا پەی یاگەکاشا، ماناو مایەپووچبییەی سیاسی و ورچنیەین پەی پەدەکەی، پەوکای وەربەس وەرڎەموو گێڵایۊشانە منیۊرە، چونکوم چی ورچنیەینە دەنگەکاشا بەکار مارۊ بۊ زیاڎکەرڎەی کورسییە حزبییەکاو وێش».
ئینجا واتش: «ڕاگێری جە گێڵایۊ ئاوارەکا پەی یاگەکاشا لاو پارتییەوە، ملۊ خزمەتوو حیزبەکەیۊ، چونکوم ئا هامکاریۍ جە ڕێکوزیایە میاندەوڵەتییەکانە و حوکمەتی ناوەندی و ئەمریکاوە پەی ئاوارەکا ڕوانە کریا، حیزبەکە دەسشا ملەرە گێرۊ».
وەزیروو کۊچ و کۊچبەرا، "ئیڤان فایەق"ە، جە واتەواچۍ تەلەفزیۊنینە ماچۊ: «حیچ دەسەڵاتێما نییا ملوو کەمپەکاو هەرێموو کوردسانیرە، داوا جە حوکمەتوو هەرێمی کەرمۍ، کارئاسانی پەی ئا خێزانا کەرۊ، کە ئاواتەوازۍ گێڵایۊنۍ پەی شۊنەکاشا و هامکارێما با جە تەمامیای دۊسیەو کۊچینە».
ئینجا "ئیڤان فایەق'ە، داواش جە سەرۊکوو پەدەکەی "مەسعوڎ بارزانی" کەرڎە، ڕا جە سەرپێچی ئەنداماو حیزبەکەیش گێرۊ دژوو ئاوارە ئەرەنیشتەکاو کەمپەکاو هەولێری و دهۊکی و ماچۊ: «وەرپەرسوو کەمپەکاو هەرێمی وەزارەتوو دلێن، ئیڎارەو دلۍ کەمپەکا ئینا چێروو دەسوو ڕێکوزیاو بارزانیینە».
وەزیر ئەوەخواش کەرڎۊ، چندین ڕاپۊرتۍ میاندەوڵەتیۍ باس جە سەرپێچییەکاو دلۍ کەمپوو ئاوارەکا جە هەرێم-نە کەرا، حەرپاسە واتیچش: «جە ٢٦ کەمپاو دلۍ هەرێمینە، هەڵای یۊشا نەوزیانرە».
س.ز
