ئەندامو سەندیکاو پارێزنەرا وانی مەحمود کاچان ئەرەیاوناش، مەبۆ مافو هیوای پێسەو خاسەی و خێرپنەکەردەی نریۆرە ئەرەیاوناش، بە پاو قەرارەکا دادگاو مافەکا مرۆڤو ئەوروپای مشۆم یاسێکێ هەموارێ کریاوە.
پارێزنەر
مەحمود کاچان ئانەش وست ڕووە، بە پاو قەرارەکا دادگاو مافەکا مرۆڤو ئەوروپای کە جە ڕاو نوقتێ ٩٠ ی دەستورو هەمیشەیی بەشێوەن جە یاساو دلینەی، مشۆم مافو هیوای جابەجێ کریۆنە.
پارێزنەر مەحمود کاچان قسەکاشەنە پەی ئاژانسو هەواڵو فوراتی باسش چانەیەکەرد، ،مافو هیوای بڕگێوە یاساین کە جە ڕاو قەرارەکا دادگاو مافەکا مرۆڤو ئەوروپای چەسپیان. واتش، "وەرو ئانەی تایبەتا بە میکانیزمەکا ئازادی سزادریەیا هەتاهەتایی تنکریایا، ئا مافەیە بەکارمارانە. تورکیانە تائیسە هەموارکەردەو یاسێ و رێکارەکێ ئا مافا بییەیش نییا. قەرارەکەو دادگاو مافەکا مرۆڤو ئەوروپای هیواش با کەسا هەن کە سزاو زینانی هەتاهەتاییشا هەن، ڕوێ بۆ تاوانە ئازادێ بانە".
'مافو هیوای مشۆم جابەجێ کریۆنە'
پارێزنەر مەحمومد کاچان ویرش ئاردیمێ، کە 'مافو هیوا'ی کە سەرۆکو گرڏی مەهەپەی دۆڵەتو باخچەلی ئاماژەش پنەکەردەن، رێکارێوەن بە پاو دادگاو مافەکا مرۆڤو ئەوروپای و واتش، "ئانە خاسە و خێرپنەکەردەی نییا، یان مامەڵێوە دۆڵەتی نییا وەراوەرو چن کەسێ دیاریکریای. بە پێچەوانۆ، پێناسێوە یاسایی کە ئا کەسێ سزاو زینانی هەتاهەتایشا هەن، مشۆم ئازادێ کریانە. باخچەلی ئاماژەش با تایبەتمەندییەی کەردەن. ئیسە تورکیانە هەرمانەش پنە مەکریۆ، بەڵام بە پاو قەرارەکەو دادگاو مافەکا مرۆڤو ئەوروپای مشۆم یاسێکێ هەموارێکریاوە و مافو هیوای گونجیۆ و تورکیا بە پاو ئانەی جوڵیۆوە".
