داوا پۍ ئەنجامدای دیڎاری چنی ڕابەرو گەلوو کورڎی عەبدوڵا ئۊجالانی جە لایەنو پارێزنەرا نۋیسینگەی یاسایی ئاسرینیۊ" ڕیزانە ساریجا، ڕەزاییە ئۊزتورک، فایەق ئۊزگور ئەرۊل و مەزلوم دینچ"یۊ پێشکەش کریا.

پارێزنەرەکۍ پۍ چەمپنەکۊتەی چنی موەکیلەکەیشا عەبدوڵا ئۊجالانی، داواو دیڎاریشا جە داواکارو گرڎی بورسای و ڕاۋەبەری سزاکا ئیمراڵی کەرڎ.

حەرپاسە پارێزنەرەکۍ پۍ ئەنجامڎاو دیڎاری چنی زینڎانییەکا تەری "عومەر خەیری کۊنار، حامیلی یڵدرم و وەیسی ئاکتاش" جە ئیمراڵی داواشا پێشکەش کەرڎ .

نۋیسینگەی یاسایی ئاسرینی جە ۲ۍ ئایارینە بەیاننامېوەش ۋەڵاکەرڎۊ و ئەرەیاۋناش، "جە ۲٥و ئادارو ۲۰۲۱یۊ حەتا ئیسە حیچ هەواڵ و زانیاریېوەما جە عەبدوڵا ئۊجالانی نییا."

جە ئەرەیاۋناکەنە ئانەیچ ئامان، "حەرچنڎە پارێزنەرۍ و خانەواڎەکۍ داواو چەمپنەکۊتەی و دیڎاری مکەرا، بەڵام ئێمە ئاگاڎارو ئاژەو ژیای و تەندروستی عەبدوڵا ئۊجالانی و یەرە زینڎانیەکەی تەرو ئیمراڵی نیەنمۍ. ئی ئاژە ئێمه و گلېرگەش ناڕەحەت کەرڎەن".

ھ . ش