پارێزنەرۍ پەی ئەنجامدای دیڎاری چنی عەبدوڵا ئۆجالانی داواشا پێشکەش کەرڎ
پارێزنەرۍ رابەرو گەلوو کورڎی عەبدوڵا ئۊجالانی بەمەبەسو دیڎاری چنی موەکیلەکەیشا کە ئینا چېرو گۊشەگیریۍ تنینە، داواشا پێشکەش کەرڎ.
"مەزڵوم دینچ، رازیە ئۊزتورک، رێزان ساریجا و فایەق ئۊزگور ئەڕۊل" کە پارێزنەرۍ نۋیسینگەی یاسایی سەڎەینۍ بەمەبەسو چەمپنەکۊتەی داواشا پێشکەش کەرڎ.
پارێزنەرۍ ماوەو دوۋۍ ساڵان مەتاۋا زانیاری جە بارەو موەکیلەکاشاوە بەدەس بارا. پارێزنەرەکۍ پەی چەمپنەکۊتەی چنی موەکیلەکاشا "عەبدوڵا ئۆجالان، عومەر خەیری کۆنار، حامیلی یەڵدرم و وەیسی ئاکتاش" سەردای داواکارو گرڎی کۆماری بورسای و ڕاوەبەری جابەجۍ کەرڎەی سزاکا ئیمراڵیشا کەرڎەن.
نۋیسینگەی یاسایی سەڎەی جە ٢٥و ئادارو ٢٠٢١ی بەدماوە مەتاۋا زانیاری سەرو رابەرو گەلو کورڎی عەبدوڵا ئۊجالانی بەدەس بارا.
پارێزنەرەکۍ دماین جار ٢ۍ ئایاری ئەرەیاۋناشا، "سەرەڕاو ئانەی خانەواڎە و پارێزنەرەکۍ ژمارېوە فرە سەردای و داواکاریشا پێشکەش کەرڎەن و ئینۍ حۊلەنە ، بەڵام نەتاۋانما جەبارەو ئاژەی تەندروستی و هەلومەرجو ژیای عەبدوڵا ئۆجالانی و یەرە موەکیلەکەی تەریما جە ئیمراڵی زانیاری بەدەسبارمۍ. ئا ئاژە مایەو نیگەرانی ئێمە و گرڎو گلېرگەین".
هـ . ش
