دەسەو هەماهەنگیی پاژکی ئەرەیاۋناش، "سەرمەشقا بە قیمەتۍ جمیەروو جوانا ئاپۆیی هامڕۍ بیشەنگ بروسکە و سارا هۆگر رحای بە پنە زانایۆ یاڎ کەرمۍ. گرڎوو گەشمەرڎا ئاخێزیچ بە رێزۆ یاڎ کەرمێوە".

هامڕا بیشەنگە شۊڵە چراوەو ئاخێزیش جە عەفرینەنە بەرزکەردۆ

پاژک ئەرەیاۋناش، کە بیشەنگە پەیجوری ۋێش پۍ ئازاڎیی جە ڕاو جمیەروو جوانا شۆڕشگێڵنیوە دەسشپنە کەرد، چنی جمیەروو ئازاڎیی درێژەش پنەدا، شۊڵە چراوەو ئاخێزیش گرڎ وەختۍ جە ریزەکا وەڵێوە بەرزکەردۆ و ئەرەیاۋناش، "بیە بە جەنگاوەرێوە سەرمەشقەی دەس هۊرچنە. جە دژوو تاونایۆ کولتوری، ئەرەگیری بیە بە ئیرادەو ئازاڎیی و قەسەموو سەرکۊتەی جوانا کوردسانی. پا قەناعەتۆ سنوورەکۍ کلۆنیالیزمیش بە ڕسمی نەشناسۍ، جە گرڎوو مێڎانەکا کوردسانینە، جە شار، کەشەنە هەرمانەی شۆڕشگێڵنیەش بە جۆش و خرۆش و قەرارداری گۊرۆ ڕاوەبەر کەرد. فەلسەفەو رابەر ئاپۆیش بە گەنجاو کوردسانی یاۋنا، ئەنەیاۋایش جە ئازاڎیی ژەنا وەڵا کەردۆ. بە گرڎیی جوانا کوردی و بەتایبەتی جوانە ژەناش رێکوست، پەروەردێش کەردۍ و هانیش دۍ پۍ چالاکی. جە دژوو سیاستەکا نەتەوە دەوڵەتوو کۆلۆنیالیستی و سیستموو سەرمایەداری پۍ بێکاریگەرکەردەی، بێئیرادەکەردەی و کۆچبەرکەردەی گەنجا بیە بە زۋان و چالاکی ئاخێزی. جە دژوو هجوومەکا ۋەران ۋەر بە ئاخێزی، رزگاری جوانا کوردسانیش دلۍ ئاخێزینە وینێوە، بیە ساحیب و رەنجی و کۊشیای بێ مردای. بیە بە سەرمەشقەو ژەنا، جوانا و گەلی. هامڕا بیشەنگە بە رۆحیانەتۍ بەرز، مرۆڤۍ رەنجدەرە، سەرەڕاو کۊشیای ۋێش دلۍ جمیەروو جوانا شۆڕشگێڵنینە، دلۍ جمیەروو ژەنا کوردسانیچەنە خاوەن دەرە و ۋەرپرسیاریی بۍ. جە وەڵۍ وستەی کۊشیای ژەنانە شانەش دا چێروو باروو ۋەرپرسیاریی و بەهاش خوڵقنا. بە قووڵبیەیۆ سەروو هوشیاری پاژکی، بە رێبازوو ژەنا بە پاژکبیەی، سەرمەشقایەتیش پۍ پارتەکەیما کەرد. جە گەورەکەردەی و جابەجێکەردەی هەرمانەکا جمیەروو شۆڕشگێڵنیی جوانە ژەنانە دەوروو ناوەندیش گێرت ئەستۆ. فرە ئاخێز و هامڕایا ۋێشش وەشۍ سیێنۍ. ڕەمزەو بڕوا و متمانەی بۍ، هێزوو چارەسەری بۍ. پۍ ئەنەیاوای و بەکرداری کەردەی ئەندێشەکاو رابەر ئاپۆی فرە حۊڵشدا. هامڕا بیشەنگە سەرەڕاو تەمەنوو جوانی ۋێش یووە چا کەسایەتیابۍ کە بە عالی یاوێبێنە".

ئاوات و وەرمەکۍ هامڕا سارۍ پۍ جوانا کوردسانی وەسیەت و راسپاردەیە

جە درێژەو ئەرەیاۋناکەو دەسەو هەماهەنگی پاژکینە ئامان، "هامڕا سارا هۆگر رحا کە بە جەوهەروو وڵاتپاڕێزی رحای گۊرۍ بیۍ بۍ، سەروو رێبازوو سەکینە جانسزەکا بەشداریش جە کۊشیاینە کەرد و تا دما هەناسەش، ئەرکوو جەنگاوەری ۋێش بە مەنزڵ یاونا. رۆحی گەنجانەش جە گرڎ یاگێنە نیشانەدا، سەڎان هامڕۍ ۋێش سەروو رێبازوو رابەر ئاپۆی پەروەردەکەردۍ، بە چەنە ویەردەی، رەنجدەری ۋێش بیە بە خاوەن بەشداریێوە سەرمەشق. هامڕا سارایچ پێسە هامڕا بیشەنگۍ، گرڎ وەختۍ گەرەکش بۍ پێسە گەریلایۍ ئازاڎیی بەشداری جە ئاخێزەنە کەرۆ. گەورەتەرین ئامانجش ئانەبۍ کە جە گرڎوو کەشەکا کوردسانینە بە تایبەتی سەرنیشتوو کوردسانی پێسە گەریلێوە پەی ئازاڎیی جەنگ کەرۆ. وەعدوو جوانا پۍ بە یاگۍ یاونای قەسەموو هامڕایا گەشمەرڎەیما ئانەنە کە تۆڕەو سیخوڕی دوژمنی جە کوردسانەنە بەرکریۆ، جە دژوو فاشیزمی کۊشیای بەگوڕتەر کریۆ و جەنگوو گەلی شۆڕشگێڵنی وەڕاوەبریۆ.

ئاشکران کە بە سەرمەشقایەتی جواناو ئێمە ئاخێزوو ژەنا بە ئەنجام میاونمۍ و ئازاڎیی کۆمەڵایەتیما مسۆگەر کەرمۍ. سەروو ئا بنەمایۍ ئێمە بانگەواز جە گرڎوو جوانا کوردسانی کەرمۍ، هەڵمەتەو ئازاڎیی پۍ رابەر ئاپۆی، چارەسەری پۍ پرسوو کوردی بەگوڕتەر کەرا و ۋەرفراوانش کەرا".