کوردیناسیۊنوو پاژکی سەروو پەلیانەی ڕسمیی وێشۊ سیاسەتەکاو جەنگی تایبەتی، کە سەروو گەلوو کوردیوە هەنۍ و هێزە ئازادیوازەکاش ورسەنگنان و واتش: "بە سەپنای جەنگوو گەلی شۊڕشگێڵنی بە شێوێوە قورس، متاومۍ دژوو هجوومە قورسەکا، کە بە جەنگی تایبەت کریۊ سەرکەوتەی بەدەس بارمێ".

ورسەنگنایەکاو کۊردیناسیۊنوو پاژکی پێسنێنێ:  

چا ڕووەوە کە سیستموو دەوڵەتپارێزنوو پیاسالاری ئەرەمەرزیان تا ئارۊ، بییەی وێش بە جەنگی پارێزنان. بە دروشموو "حەتا جەنگ زیاتەر بۊ عومروو دەسەڵاتی زیاتەر بۊ" ڕەفتارش کەرڎەن، تا دروشمەکەیش بیاونۊ یاگۍ گرد نۊعە ڕێبازێوەش جەنگوو وێشنە بەکار ئارد. دلۍ ئا ڕێبازانە پیستەرین ڕێباز، کە بەکار ئامابۊ ڕێبازوو "جەنگی تایبەت"ین. ڕێبازەکاو جەنگی تایبەتی کە تا دمایی سەدەو ١٩ ناوەندەکاو دەسەڵاتی تا عومروو وێشا درێژ کەراوە بەکارشا ئارد. ڕۊ بەڕۊ بەکارئارڎەی ئا جەنگی زیادش کەرڎەن. بەتایبەتی بەکارئارڎەی جەنگی تایبەتی  ناوەندەکاو دەسەڵاتینە، دماو جەنگی دووەموو دنێی دژوو کۊشیای کۊمۊنیستەکا و گردوو جمیەرە چەپییەکا و سۊسیالیستەکاشا پێسە جەنگێوە بناغەیی بەکار ئاما.  ئا هێزۍ کە چێروو سەرکێشیی ناتۊینە وێشا ڕێک وستەن، پەی وەڵێوستەی جەنگی تایبەتی ناوەندۍ نۊعاونۊعێشا ئەرەمەرزنۍ، چەنی هێزە تاریکپەرس و نهێنییەکا پێسە گلادیۊی گرد وەڵاتێوەنە ڕێکوستەی تایبەتیشا وست وەڵۍ و ناوەندێوەنە درێژەشا پا جەنگییە دا. چی جەنگەنە چی جەنگە پیس و شاریاوەنە کە وەراوەروو گلێرگەیوە دەسش پەنە کریان، گرد جۊرە ئارگۊمێنت، چەک و ڕێبازی جۊراو جۊر بەکارئامان. ئامانجشا بێئیرادەکەرڎەی گەلی و ئاسانکەرڎەی تەسلیمبییەیشانە وەراوەروو دەسەڵاتینە. ئا جەنگە کە جەنگی یەرەموو جیهانینە پەرەش سانان، بە شێوێوە سەرەکی ڕاوەبەرڎەی جەنگی تایبەتین و چەمکەکاو دلێنەبەرڎەیش چی چوارچوەنە پەرە پەنە دریۊ.  

ئەو ناوەندە سەرەکیۍ ئەوەڵۊ تا ئیساتۍ نەفاڕیێنۍ، ناوەندەکاو جەنگی تایبەت و ڕێکوزیا شۊڕشگێڵنییەکا و تەڤگەری گەریلاییێنۍ. حەرچندە وەڵات، نەتەوە و تەڤگەرەکۍ فاڕیا، وەروو ئانەیە ڕێبازەکاو جەنگی تایبەتی  یەک ناوەندنە ملا ڕاوە، پێسە ئانەیە کە مجیارە بەکار مۍ. ئامانجەکێشا سەروو گردوو تەڤگەرەکا یان بەتەمامی دلێنەبەرڎەیشانە یان گەرەکشانە تەسفییەشا کەرا و  وزاشا سەروو ڕاو وێشا، هەوڵە جەماوەرییەکاو تەڤگەرەکا وشک کەرا، بێهیواشا کەرا جە کۊشیایشا، سەرکرڎەکاشا بە ئامانج گێرا، تەڤگەرەکا پەرتەوازە کەرا و جە ئامانجی سەرەکیی وێشا دوورۍ وزاوە. ئادۍ گەرەکشانە شەپۊلێوە تەرسۍ و نائارامی وزا دلۍ تەماموو کادیرە سەرمەشقەکا و بە کوشتەی و ڕفانایشا ڕێبازوو تەسلیمییەتی وەڵۍ وزا. بە وەڵاکەرڎەیۊ ئا سیستەمییە مەژگوو کادیرا و گەلە وەڵاتپارێزیینە گەرەکشانە ئا سیستەمەیە وزا وەڵۍ و وەڵاتپارێزنا تەسلیم کەرا. یانۍ گەرەکشانە جەنگێوە بێبنەما و بێئەخلاق بەرا ڕاوە، ئینەیچە بییەن بە بنەمای سەرەکییەو جەنگی تایبەتی، وەختۍ دەرفەتش دەس گنۊ، بە شێوێوە نایاسایی، بە جەنگی دەروونی و گردوو جۊرە هاندای و پڕوپاگەندێوە گورزوو وێش مشانۊ. بە بەکارئارڎەی جەنگی تایبەتی سەروو بڕۍ جە جمیەرە شۊرشگێڵنییەکا دەوڵەت یاوان بە ئامانجوو ویش و ئامانجوو وێش پێکان.  

ڕژێمی فاشیستی دەوڵەتوو تورکی کە ئەوەڵوو ئامایشۊ و تا ئارۊ  پێسە ڕژێموو جەنگی تایبەتی وێش ڕێک وستەن، بییەن بە یۊ جە هێزە دەسەڵاتدارەکاو ئا سیاسەتە بنەڕەتییا. بەتایبەتی گەرەکشانە ئەرمەنی، سوریانی، کورد و عەلەوییەکا کۊکوش کەرا و پارێزگاری جە دەسەڵاتدارییشا کەرا. وەلۍ کورد بە شێوێوە تایبەتتەر مامەڵەو وێش چەنی ئی دۊخەیە کەرڎەن. تەنیا بە کۊکوشی جەستەیی سنوورڎار نەبییەن، بەڵکوم سەروو بنەماو تەسلیمبییەی، کۊکوشیی کولتوورییچ بییەن بە شێوازی سەرەکیی کرڎەوەکا. گردوو ئا سیاسەتا، کە وزیێنۍ بواروو بەیاگەیاونایۊ، پەی کۊکوشیی کولتووری بییەن بە ڕێبازوو جەنگی تایبەتی. حەرچندە نامەکۍ جە پلانەو ئیسڵاحاتی شەرقیوە فاریان پەی پلانەو چۊکپەنەدایرەی، وەلۍ شێوازەکۍ هەمیشە شێوازوو جەنگی تایبەتی بیێنۍ. چی بابەتەنە دەوڵەتوو تورکی وەراوەروو جمیەری ئازادیوازیما بە شێوێوە وەرفراوان و ڕێکوستەیش پەشتیش بە سیاسەتوو جەنگی تایبەتی بەستێنە. تا ڕژێمی فاشیستوو ئاکەپە – مەهەپەی، ناوەندی سەرەکیی ئا سیاسەتا بۊ کە  جە چوارچوەو لۊبییەکاو جەنگینە دلۍ دەوڵەتوو تورکیاینە لوێنۍ ڕاوە، گلادیۊو ناتۊی بۍ. وەلۍ دەوڵەتوو تورکی بە تەماموو وێش پێسە ڕژێمێوە جەنگی تایبەتی جە ڕژێموو ئاکەپە-مەهەپەی ڕێک وستەن. بە مانێوە تەرە، ئا جەنگە کە دەسەڵاتوو ئاکەپەی سەروو جمیەری ئازادیوازیماوە کەرۊش، لاێوە فرە جیاوازنە دەسکەوتش بییەبۍ. ڕابەر ئاپۊ جە سەرنجەکاشنە دیداروو ساڵەو ٢٠١٤ باس چا پرۊسا کەرۊ، کە دەوڵەتوو تورکیایش پۊرە ویەرڎەن و ماچۊ: "دەسپەنەکەرڎەی جەنگی تایبەتی دماو ساڵەو ١٩٥٠، وەرپەرسوو فرەو کۊکوشییەکانۍ چی وەڵاتەنە. قەنارەدای مەندەرەسی، ڕووەدایەکاو ٦-٧ ئەیلوولی، کۊکوشییەکاو مەڕەشی، چۊروم و سێواسی بەرڎەوام کاریگەرییشا بییەن و بێگومان کودەتاکۍ ئەنجاموو ئانیشانۍ. کورد بێبەزەییانەتەرین شێوە لاو ڕێژیمیوە کوشیان. تەنانەت یاگەداروو ژیتەمیشا کوشت. مزاندۍ مەحمەد سینجار چەنی کوشیا؟ تەنانەت یاساو ژیتەمینە نییا. گرد کرڎەوێوە کە مۍ مەژگماوە  ئادیشا کەرڎەن. ئی ئەرەمەرزیا جە ١٢و ئەیلوولینە بی بە نیشتمانی. جە چالاکییەکاو چیلەری، گورەش تەنانەت دماو ساڵاو ١٩٩٠یوە بەتایبەت گردوو ئانیشا بێنۍ. ئانۍ ئۊزاڵی و دماتەر بەدلیس پاشاشا کوشت ئادۍ بێنۍ. سێواس، باشباخلار. ئادۍ بێنۍ و بەدەسوو ژیتەمی کوشتێشا. جەماعەت یۊبەیۊ پۊلیسی مەدەنی و بەشوو دادوەری و بەشوو جەنگی تایبەتینۍ. وەختێوەنە ئیسرائیل بییەن تاتەو لۊبیی ئەرمەنییەکا. ناوەندەکە یان فلۊریدا بییەن یان ئوتا. ساڵێوەنە ٣٠٠ پۊلیسێشا چا ناوەندانە پەروەرڎۍ کەرڎێنۍ، پڕۊژەو دلێنەبەرڎەی گردوو کوردستانی ئادۍ بێنۍ."

ڕابەر ئاپۊ بییەن ئامانجی سەرەکیی جەنگی تایبەتی. گەرەکشابۍ  ئۊپەراسیۊنوو جەنگی تایبەتی سەروو ڕابەر ئاپۊی بەسیستماتیکی بە ڕانمایی ناتۊی بە سیستموو چوارمێخەی کەرا.جە هجوومی جەسەییوە گێرەش تا دەروونی ئی پڕۊسەو هجووما بەرڎەوام ئینا پەرەساناینە. دمایین پڕۊسەنە هەوڵێشا دۍ بە سیاسەتوو گۊشەگیریی ڕەهای پڕۊسەکەی بەرا ڕاوە.  ڕژێموو جەنگی تایبەتوو ئاکەپەی بەرڎەوام سەروو بنەماو بەکارئارڎەی جە ڕابەر ئاپۊی نزیکۍ بیێوە، وەلۍ ڕابەر ئاپۊ بە مدرامانی بێوێنەش گردوو ئا سیاسەتاشە پووچەڵۍ کەرڎێوە.

 بە بەیاگەیاونای ئا جەنگە تایبەتەیە، کە سەروو جمیەری ئازادیوە کەراش، سیاسەتوو بڕیایرەی پەیوەندییەکاو بەینوو گەلی و گەریلای و ڕابەرایەتیما پێسە ئامانجی سەرەکیی ئا جەنگەیە پێناسە کەرڎەن. ساڵانێوەن گەلەکەما ڕووبەڕوو چەمکێوە وەرفراوانی کۊکوشیی بییەنۊ. هەوڵۍ مدا بە سیخوڕی، بێئەخلاقی و ماددەی هۊشبەری  کەسایەتی بێئیرادە وەش کەرا؛ بە کۊچبەری فاڕیای دیمۊگرافی بەئامانج گێرا؛ بە سیاسەتی جیاواز کۊکوشیی کولتووری وزا وەڵۍ. بە نۊعێوە هەوڵۍ مدا گردوو دەزگاکاو ئەرەیاونای و ئەرەمەرزیا پەروەرڎەییەکا خزمەت پا سیاسەتەیە کەرا. بە گردوو نۊعەکاو پڕوپاگەندەی چەرمەی و سیاوی دەوڵەت گەلی خەڵەتنۊ یا بە بێمتمانەیی وەراوەروو جمیەرەکەیما، هەوڵۍ مدا گەلی لاڕارە بەرا. هەوڵۍ مدا هجوومەکاو جەنگی تایبەتی  دژوو خەتەو ئازادیی ژەناما، هێزی سەرمەشقوو جمیەرەکەیما فراوانتەر کەرا. دژوو خەتەو ئایدیۊلۊژیما، ملا ڕێکوزیا ئەڵتەرناتیڤەکا بەکار مارا، گەرەکشانە پێسە زەرەر بە ڕێکوستەیەکەیما بیاونا. گرد شێوازێوە ناڕەوا بەکار مارا. پراکتیزەکەرڎەی جەنگی تایبەتی، کە ساڵاو ئەوەڵیوە تا ئارۊیچ بەرڎەوامییش هەن، کاریگەریی سەروو جمیەرەکەیما و ژەنا و گردوو گلێرگەی نیانرە . پاسەیچ  کۊشیای پەی ئازادیی گەلا وەڵۍ کەوتەن و یاوان ئی سەرڎەمە.

یۊ چا ئامێرە بنەڕەتییا کە دوژمن وەنەو هجووموو جەنگی تایبەتی  بەکارش مارۊ تەکنیکا. حەر وەروو ئینەیە ​​گرنگا ئێمە بەدروسی جە تەکنەلۊژیای نزیکۍ بیمێوە و بەدروسی بەکارش بارمۍ. بەشێوە فرەو ئا جەنگەو ئیسەیە سەروو بنەماو تەکنەلۊژیاین. چی جەنگەنە گرد نۊعە چەکێوە عاسمانی و کیمیایی بەکار مۍ. دوژمن شانازیی پا تەکنەلۊجیایۊ کەرۊ و پڕوپاگەندەو ئانەیە کەرۊ، کە متاوۊ گرد یاگێوەنە گەریلای دلێنە بەرۊ.وەلۍ جە فەلسەفەو ڕابەرایەتیمانە 'گەورەتەرین تەکنیک خودوو ئینسانین'. ئێمە شایەتۍ ئانەیە بییەیمۍ کە چندە بێدەسەڵاتێنۍ وەراوەروو مدرامانی ناوازەو گەریلایوە، پا ئیمکانیەتە کەمە تەکنیکییەو وەروو دەسیشا. واوەی شایەتۍ مدرامانی ٢٦ ڕوەو ٢ هامڕاکاما بێنمۍ گارزاننە، هاموەخت چنی بەکارئارڎەی گرد تەکنیکێوە جەنگی کە سەرنیشتنە کریۊ. بە سەدان نموونۍ هەنۍ، کە سەلەمناش ئیرادەو ئینسانی متاوۊ وەراوەروو گرد نۊعە تەکنەلۊژیاێوەنە سەرگنۊ.

سەرنیشتوو کوردستانینە هجووموو جەنگی تایبەتی پەی سەروو گەلی و هەرێمەکاو گەریلای پەرەش سانان. ڕێکوستەی تۊڕێوە پۊلیسی زیادەی و پێشکەشکەرڎەیش  پێسە نموونێوە پەی گلێرگەی بەکار مارا، پی کرڎەوە بێباکا وەراوەروو  بەهاکاو کوردیوە دەسشا بە جەنگی تایبەتی کەرڎەن؛ سیاسەتوو فشاری سەروو بنەماو گۊشەگیری سەروو بنەیانەو گەشمەرڎاوە، کە بەها بنەڕەتییەکاو کوردستانینۍ، پەرەشا  پەنە دریان. گرنگا کۊشیاێوە بنەڕەتی دژوو ئا ڕاسییە دەس پەنە کەرۊ، کە بە هجوومێوە وەرفراوان هەوڵۍ تەسلیمبییەی مدریۊ.

دیسان بابەتێوە گرنگتەر، کە پەنەوازا ورسەنگنیۊ، هجووموو ئایدۊلۊژییەکان پەی سەروو خەتەو ئازادیی ژەنا، کە بەئەنقەس لاو دوژمنیوە پەرەش پەنە مدریۊ. جەنگوو خەتۍ بە حەرنۊعێوە بۊ سەروو بنەماو تەسفییەکەرڎەی جەوهەری شۊڕشگێڵنانەی و پەراوێزوستەی ڕێکوزیاو ژەنا کریۊ. زیاتەر جە خودوو بەهاکاو ژەنا، هجوومەکۍ سەروو بنەماو هەڵوێستێوە، کە چێروو کاریگەریی ئا خەتە لیبڕاڵییێنە جیاوازێنە هەنە. حەر وەروو ئینەیە، هجوومی ئایدیۊلۊژی دژ بە گرد لێوە کە کریۊ وەڵێوستەی ڕێبازێوەن، کە ئا هجووما پووچەڵۍ کەرۊوە، بە نیاز وینیێ؛ ئینە ئەرکێوە بنەڕەتیین پەی ئێمە.

شۊڕشوو وەرنیشتی پێسە شۊڕشێوە ژنا گرڎوو دنیێنە سەرەش ورڎا

ئاڕاستەکەرڎەیوە جەنگی تایبەتی پەی سەروو هەرێمەکاو وەرنیشتی، کە بییەن بە سەرچەمەو مۊڕاڵی پەی هێزە شۊڕشگێڵنەکاو جیهانی، بە چەمکێوە هامبەش چێروو سەرکرڎایەتیی دەوڵەتی فاشیستوو تورکینە کریۊ. چی هجوومەنە ڕژێموو سوریای و هێزە خیانەتکارەکا پێسە پەدەکەی و چەتەو داعشی بەشدارێشنێ. چێگەنە دوژمن هەوڵۍ وەڵاکەرڎەیوە و بەکارئارڎەی ماددەی هۊشبەری و لەشورەشی مدۊ، پەرەپەنەدای هاندەرە سێکسی و ماددییەکا و دلێنەبەرڎەی ئەخلاقوو گلێرگەی. تا ئیساتێچ هەوڵۍ مدۊ بە سیاسەتی تایبەتی کۊچبەری مەیدانەکەی پاک کەرۊوە. فاڕیای دیمۊگرافی کەرۊ بە سیاسەتێوە بنەڕەتی چا مەنتێقانە کە لاو چەتەکاوە گیریێنێ. هەوڵۍ مدا باوەڕوو گەلی بە شۊڕش ماڕا. بەتایبەت چی دمایاوە گەرەکشانە ملەملۍ عەرەبی و کورڎی سەروو بنەماو ئاژاوەگێڵنیی بڕۍ عەشرەتا وەش کەرا. بە پڕوپاگەندەکەرڎەی  قەسەدەی یا ئیدارەو وێڕاوەبەری، کە گوایا تەنیا نوێنەرایەتی کورڎی کەرۊ، هەوڵۍ مدا دلێنەو پارادایموو نەتەوەی دیموکراتی پووچەڵ کەراوە، بە بەکارئارڎەی سیاسەتوو گڵیاویی سەروو هۊزە عەرەبەکا دژ بە جمیەرەکەی. گەرەکیچشانە بە بەهانۍ بێبنەمۍ ملەملۍ بەینوو پێکئامایەکا وەش کەرا وئاڵۊزییەکەی قووڵتەر کەراوە.  

شۊڕشوو وەرنیشتی پێسە شۊڕشێوە ژەنا گرڎوو جیهانینە سەرەش ورڎا و سەرنجەو گرڎوو ژەنا و ئینسانەکاش کێشتە. بی بە سەرچەمەو ئیلهامی پەی فرەو کۊشیایەکاو ژەنا. حەر وەروو ئی سەبەبەیە چی دمایۊ نزیکایەتیێوە سەروو بنەماو بێکاریگەرکەرڎەی گرڎوو دەسکەوتەکاو ژەنا پەرەش پەنە دریان.  بەتایبەت پا هجووما، کە پەی سەروو یەپەژەی زیادۍ بیێنۍ، سروشتی شۊڕشگێڵنانەو مدرامانی کریۊ ئامانج. جلوبەرگەکۍ بیێنۍ بابەتوو گۊڤارەکاو مۊدەو یەپەژەی، شێوازو ژیوای مۊدێرنیستی جەنگەواناشا نیشانە دا جە ڕاو ئا فیلم و زنجیرەفیلماوە، کە بە نامۍ یەپەژەیوە وەشۍ کریێبێنێ؛ ئینە هجووموو جەنگێوە تایبەتین. حەر وەروو ئی سەبەبی ​​بۊ بە چێوێوە گرنگ کە دلێنەو بەها شۊڕشگێڵنی و کۊمەڵایەتییەکا وەراوەروو هەوڵە پەراوێزییەکا پارێزنیۊ.

پانیشتوو کورڎستانینە پێسە بوارێوە، کە پاڵپەشتیی گرڎوو ڕێکوزیا سیخوڕییەکا کەرۊ، نزیک بۊوە، هەم هاوکاری و هەم سیاسەتەکاو دەوڵەتی ساعیب سەروەری بە ئاڕاستەو جەنگی تایبەتی یەکلاییکەرەوەنێ. چی بوارەنە خەتەی بێچارەو پەدەکەین؛ پەکەکە پێسە هەڕەشێوە بنەڕەتیۍ سەروو وێشۊ وینۊش، هەرمانە سەروو بنەماو وەشکەرڎەی ئا ڕوانگەیە کەرۊ، کە پەکەکە ڕێکوستەێوە بیانیین و سەر پی هەرێمەیە نییا، هجوومێوە چڕوپەڕ کەرۊ. گەل بە پراکتیکەکاش پێسە بێزارکەرڎەی ژیوای بە ڕاو زنجیرە فیلمێوە تورکی، هاندای مەکتەبە ئەهلییەکا، بە شێوازوو ژیوای بیانی دووروستەیوە جە بەهامرۊییەکا، بەستەیوە بە مووچەوەرییوە و بە وەشکەرڎەی نائومێدی، هاندای کۊچوو گەنجا وەڵاتنە گرڎ بە پلان ملۊ ڕاوە. چەنی جمیەرەکەیما بە بەهانۍ جیاجیۍ جە چوارچوەو جەنگی تایبەتینە جەنگ کەرۊ.

وڵاتاو ئەورووپای کە جە چوارچوەو هامکارییەکاشانە جە بەیاگەیاونای جەنگی تایبەتینە پەشتیوانیی دەوڵەتوو تورکیای کەرا، بە زیادکەرڎەی پەکەکەی ڕێکوزیا تیرۊریستییەکانە، ئەرەیاونانشا کە هامبەشۍ هەر هجوومێوەنۍ چی بابەتەنە. بەتایبەتی جە ڕاو ڕۊنامەگەری و میدیاییوە هجوومێوە جددیی دژ بە پڕوپاگەندەو پەکەکەی کریۊ و ئایچۍ چا قەرارانە باسوو مافوو وێشا کەرانێ. بە گرڎ نۊعە فوشار، گێرتەی و هەڕەشەکەرڎەی بە هەرمانۍ بیرۊکراتی و سیاوگیریۍ گەرەکشانە ئەنجام ورگێرا. هەوڵۍ مدا سیستمێوە وەش کەرا، کە تەنانەت بە بڕۍ سەرچەمەی دارایی کەمیچۊ گرڎ لایۍ بەساوە یۊیۊ. تا ئیساتێچ یاواینێوە تایبەت بارەو گەلوو ئێزدییوە هەرێمەکەنە هەن. بە یاواینێوە کە ئێزدییەکا جە کورڎی جیا  کەرۊوە و تەنانەت تووڕە کەرۊ، گەرەکشانە بە ڕەخسنای دەرفەتی پەشتیوانیی دەوڵەتاشا چەنە بساناوە.  

تەنانەت ئەگەر پێسە دووبارەکەرڎەیۊیچ بۊ، متاومۍ ئاماژە بە پراکتیکەکاو جەنگی تایبەتی کەرمۍ، کە بە سەربەوۍ گرڎوو بوارەکانە پێسە بەکارۍ مەیا،. بێگومان ڕای جیاوازە هەنە. چی بوارەنە ڕانماییەکاو ڕابەر ئاپۊی خەتەو کۊشیایما پێناسە کەرۊ:"سەرکەوتەی پەی بۊ ئێمەیچ؛ کریۊ جەنگێوە شۊڕشگێڵنانەی وەرفراوان جە دژوو جەنگی تایبەتی وەرفراوانینە بسەپنییۊ. ێندرێت. جەنگی شۊڕشگێڵنانە پەی ئێمە چێشا؟ پەرەپەنەدای تاکتیکوو وێش دژوو گرڎ لاداێوە سەرگنۊ و لکەدریاو ئینەیە تاکتیکەکاو دوژمنی پووچەڵۍ کەرۊوە."

متاویۊ بە سیاسەتە تایبەتەکاو جەنگی کە وەڵێکەوتێنۍ، بە پەرەپەنەدای ڕێکوستەێوە قەوەتی جواب بدریۊوە. وەرو ئینەیە پەنەوازا گرنگیێوە فرە بە  هەرمانەو  گرڎ بوارێوە چالاکیی کۊمەڵایەتی بدریۊ. تا گلێرگەنە عەقڵییەتوو دوژمنی بشناسیۊ، وەراوەروو هجوومەکانە پەنەوازا جەخت سەروو چالاکییە پەروەرڎەییەکا کریۊوە. هاموەخت چەنی ئینەیچە تاکە خەتێوە کە وەراوەروو جەنگی تایبەتی سەرە گنۊ،جەنگوو گەلی شۊڕشگێڵنین. پەنەوازا گەل بە پاو پەنەوازیی ئی جەنگەیە وێش ئامادە کەرۊ و گرنگا ئی ڕێکوستەیە گرڎ بوارێوەنە گنۊ وەڵێ. پێویسا چالاکیی کۊمەڵایەتی بە تۊڕێوە وەرفراوانی ڕێکوزیۊ.  

یوە جە هەنگامە بنەڕەتییەکا ڕێکوستەێوە کەسایەتیی ئانەن کە هاڵیگایی ویرۊکەکا پەڕ کەرۊوە. مەبۊ ئانە جە ویر بریۊوە، کە دوژمن مەتاوۊ بلۊ دلۍ بناغە قەوەتەکا و ڕێکوستەیەکاوە. حەر وەروو ئی سەبەبی پێویسا گرڎ لایۍ وێشا دەس بە کۊشیای وێڕێکوستەیوە کەرا. گرنگا ئی کۊشیایە دژوو شێوازوو ژیوای و ئایدۊلۊژیاو مۊدێرنیتەی سەرمایەداری بۊ و پێسە درێژەپەنەدەروو مۊدێرنیتەی دەس پەنە کەرۊ، بەتایبەتی دژوو لیبرالیزمی جە دلێنەنە  ئایدۊلۊژیای سەرەکیی سەرمایەداری گێرۊ وێش، پەنەوازا جە وێشاوە دەس پەنە کەرا و گرڎ یاگێوەنە کۊشیاێوە ڕادیکاڵ دەس پەنە کەرۊ. متاومۍ بە کۊشیاێوە یەکپارچە و یەکلاییکەرەوە و گرڎ نۊعە هجوومێوە دوژمنی بێکاریگەر کەرمێ.