زانیان کە دەوڵەتوو تورکی ئەرەگیری پۍ پلانە ئەرەگیریەکاش داواش جە پەدەکەی کەردەن، زیاتەر فشار وزۆ سەروو مێڎانەکا گەریلای. پۍ ئانەی ۋەر بە ناڕەزایی رای گرڎی کوردی گیریۆ دەمامکوو یەکەکاو پاسەوانوو سنووری بەکارمۍ.
بڕۍ زانیاریۍ جە چوارچێوەو پلانە تازەکا ئەرەگیری دەوڵەتوو تورکینە، پەشتی پەردەو جموجوڵ و سەروازی کە پەدەکە بە نامۍ یەکەکاو پاسەوانی سنووری عێراقی بەرەو هەڕێمەکا گەریلای ئەنجامش دێبێنۍ، ڕۊشنتەر کەرۊوە.
جە بڕۍ وێنۍ و دیمەنێنە کە ئاژانسوو هەواڵوو فوراتی دەسش وستێنۍ، ئاشکرا بیەن کە گرڎوو یەکینەکاو پاسەوانوو سنووری سەر بە پەدەکەینۍ. هێزەکۍ زێرەڤانیچ ئینۍ دلۍ ئا هێزانە کە روانە کریێنۍ، هێزەکۍ گوڵانی و دەزگاو پارێزنای سەر بە مەسرور بارزانیچ روانەو مێڎانەکا گەریلای کریێنۍ.
بە پاو ئا زانیاریا کە دەسوو ئاژانسەکەیما کۊتێنۍ، دەوڵەتوو تورکی داواش جە پەدەکەی کەردەن کە زیاتەر فشار وزۆ سەروو هەرێمەکاو گەریلای، پۍ ئانەی پلانە ئەرەگیریەکۍ سەرۍ گنا. ئانەیچ وزیان ڕووە کە پەدەکە سەروو ئا بنەمایۍ هەنگامەش نیێنە و ئەرەیاۋیا کە مشۊم چێروو نامۍ عێراقینە ئانەی کەرا، پۍ ئانەی رای گرڎی دلێینەو پانیشتوو کوردسانی کاروەدایش نەبۆ.
گەرەکشانە عێراقیچ پەلکێشوو دلۍ پلانەکێشا کەرا
چی چوارچێوەنە ئانە پیویا کە پەدەکە بە پلانەی جیاجیا گەرەکشا عێراقیچ پەلکێشوو دلۍ سیاسەتەکا دەوڵەتوو تورکی و پەدەکەی کەرۆ و بە مەبەسوو چن دیدارێوە چنی حکومەتوو ناوەندی شاندێوەش روانەو بەغڎای کەردەن. ئانەیچ وزیان ڕووە، کە شاندەکەو پەدەکەی بەغڎانە چنی کاربەدەسا حکومەتوو ناوەندی کۆبیۆ و بە بەهانۍ ڕاگێرتەی جە بازرگانی ماددە هۆشبەرەکا و قاچاخچیەتی سەر سنووری، داواو جمنای هێزیش جە حکومەتوو ناوەندی کەردەن. ئاماژە پانەیچ کریان، کە سەروو مژارەکا ۋەرەنگاربیەیۆ ماددە هۆشبەرەکا و قاچاخچیەتی هەردوویلا رێککۊتێنۍ، کە بەنامۍ یەکەکاو پاسەوانی سنووری عێراقی هێز ڕووانەو سنووری کەرا. بەڵام پەدەکە چێروو نامۍ ئا هێزەینە بڕۍ هێزوو ۋێش روانەو هەرێمەکا گەریلای کەردەن.
دلێر فەرزندە سەردەسەو هێزەکەیا
زانیا کە گردوو یەکەکاو پاسەوانوو سنووری عێراقی کە روانەو هەرێمەکا دهۆکی و شێلادزێ کریێنۍ، هێزەکۍ پەدەکەینۍ. ئاشکرایچ بی، کە ۋەرپەرسوو ئا هێزەیە برازاو هوشیار زێباری دلێر فەرزندەن. وچیۆ کە فەرزندە سەردەسەو ئا هێزەینە کە لووێنۍ شێلادزۍ. باس چانەی کریۆ کە حکومەتوو ناوەندی عێراقی دژوو ئا جۆرە حۊڵاو پەدەکەین و چا ئاژەیە نیگەرانا و توڕەن و بە پەدەکەیشا ئەرەیاۋنان کە بنەوستەو یەکەکا پاسەوانوو سنووری پا جۆرە بە پاو ئامانجەکا عێراقی نییا و دژوو ئانەینۍ.
حەرپاسە ئانەیچ وزیان ڕووە، کە ئا کاربەدەسۍ عێراقی چنی پەدەکەی دیڎارشا ئەنجامدان و واتەنشا، "شمە چێوۍ تەرتا بە ئێمە وات، بەڵام مێڎانەکەنە چێوۍ تەر ئینا ئارانە".
