کۆمیتەو تەڤ-چاندو پەکەکەی هۆزان مزگینە (غوربەت ئایدن)ە و گەشمەرڎاو مانگەو ئایاریش یاڎ ئاردێوە و ئەرەیاۋناش، "هۆزان مزگینە جە کوردسانەنە جەوهەریتەرین پێناسۍ ژیۋای ئازاڎییی، هونەری و جەنگیەنە".
کۆمیتەو کولتور و هونەری (تەڤ-چاند)و پەکەکەی بۆنەو ٣٢ەمین ساڵیاڎوو گەشمەرڎەبیەو هۆزان مزگینۍ و ١١و ئایاری ڕۊو گەشمەرڎا جمیەروو کولتوری و هونەری ئەرەیاۋنێوەش ۋەڵاکەردۆ.
ئەرەیاۋناکەو کۆمیتەو تەڤ-چاندو پەکەکەی پی جۆرەنە:
"مزگینە (غوربەت ئایدن)ە جەوهەرەو کولتور و هونەری کوردی ئاپۆیی، شۆڕشگێڵنێوە ئایرینوو ژەنۍ ئازاڎی و فەرمانڎۍ نەمرەو گەریلای، دەنگۍ وڵاتپاڕێزنەی ماناڎارە و زەریفە بە قووڵایی لووۍ دلۍ دڵەکاوە؛ تافێوە جە هەستی، بریارداریێوە مدرامان، ڕەمزەو زەریفی و نەکەوتەی. جە کەسایەتی ئاڎێنە گرڎوو گەشمەرڎا مانگەو ئایاری بە رێز و پنەزانایۆ مارمېوە وە یاڎ.
ئێمە جە ٣٢ەمین ساڵیاڎوو گەشمەرڎەبیەو هەڤاڵ مزگینێنە یاڎش مکەرمێوە، گەرەکمانە بارمېشۆ وە یاڎ کە ١١و ئایاری جە هەمان وەختەنە ڕۊو گەشمەرڎا جمیەروو کولتوری و هونەرین. پی بۆنۆ گرڎوو گەشمەرڎا جمیەری و کولتوری و هونەری بە پەیوەسبیەیۍ بێکۆتا و بە پنەزانایۆ یاڎ مکەرمێوە.
چا وەختەنە کە گەلوو کوردی بە شێوێوە دڕندانە کوشیێنۍ و جە کوردسانەنە پاگیری سەروو مرۆڤبیەی بۍ، رابەر ئاپۆ گەورەتەرین مدرامانی تاریخیش دەسپنەکەرد و هۊرسەنگنای ئانەیش وست ڕووە کە مشۊم کوردیچ بە هەمان شێوە مدرامان بکەرا. چا وەختۆ کولتور و هونەریچ یاوان بە خاڵێوە شۆڕشگێڵنی.
ۋەروو ئانەیچ گەلەکەما بە ڕاوجاکا ۋێپارێزنای جەوهەری جە گرڎوو بوارەکانە جەنگوو 'پارێزنای بیەو ۋێش و پێکئاردەی ئازاڎیی ۋێش' بە سەرکەوتەیی بەرد ڕاوە.
هەڤاڵ مزگینە بە چەکوو ۋێش هەم بە هونەروو ۋێش جەنگش کەرد و خەتەو ئارۆی و کولتور و هونەری ئێمەش دیاریکەرد. هەڤاڵ مزگینە پەی ئانەی دژوو قڕکەردەی مدرامانی بیاونۆ بە سەرکەوتەی گرڎ چێوێش کەرد، گرڎ هەنگامێوەش بە پاو ئانەی هۊرگێرتە. گرڎ وەختۍ ۋەرا ۋەر بە هەڵسوکەوتی جە ۋێباییانە و مەسڵەحەت پەرسانەو کەسی هەڵوێسش هۊرگێرت، پا جۆرەی کە دوژمنی هەراسان و شپرز بکەرۆ مامەڵەش کەرد. ناسکی هەست و قووڵبیەی بێهامتای جەوهەری وڵاتپارێزنی بە تایبەتی ۋەرا ۋەر بە فەرماندەی ئێژای هامڕا عەگیدی ، هەمان مامەڵەش ۋەرا ۋەر بە گەشمەرڎا نیشانەدا، بە ناوازەیێوە رۆحی و دەنگۆ ئا هەستێشە نیشانە دۍ. دماو گەشمەرڎەبیەیش کوردەکۍ نامۍ ئاڎێشا جە زاوڵەکاشا نیا، گەنجۍ بەمەڵامەتوو کاریگەری دەنگوو ئاڎێوە بەشداریشا جە ریزەکاو گەریلاینە کەرد. جە ۋەرا ۋەروو قڕکەردەیێنە کە ئامانجش دلېنەبەردەو کوردا بۍ، بە بێ جەنگوو گەریلای زۋانی کوردی، وێژە، هونەر نێنۍ ئاراوە. ئا حەقەتینەشا ۋینا، بە تایبەتی هەڤاڵ مزگینە و هەزاران گەشمەرڎۍ، مدرامانی قارەمانانەو ئاڎیشا و یاڎکەردەیۆ ئاڎیشا و پەنەوازی رێزگرتەی چاڎیشا بە پەنەوازیێوە جەوهەری نیارە. سەروو ئا بنەمایۍ داوا جە گرڎ لېوە مکەرمۍ کە بە هوشیاری پارێزنای جەوهەری خاوەنداری چا بەهایا بکەرا.
هەڤاڵ مزگینە جە ۋەرا ۋەروو سیستموو کۆلۆنیالیستینە ئانەی کە ژیۋای ئاڵترناتیڤ و پێودانگەکا کولتور-هونەر مشۊم چنی بۆ بە پراتیکی ۋێش بە ئێمەش نیشانەدا. جە ساڵەو ١٩٨١یوە واتە جە بەشداربیەیشۆ تا گەشمەرڎەبیەیش جە ساڵەو ١٩٩٢ ێنە بیە بە جەنگاوەرێوە هەمە لایەنەو پەکەکەی، هەم بە هونەروو ۋێش و هەمیچ بە جەنگ و ۋێش جە ئاستوو سەرمەشقایەتینە ۋێناو جەنگاوەریش کەرد. کەسایەتی ئاڎۍ و شێوازوو بەشداربیەیش مۆرەو ۋێش جە هەر ساتێوە کۊشیایما دان و ئا پیمەرۍ کە جە ژیۋای ۋێشەنە بەرزش کەردۍ بێنۍ پەی ئێمە بیێنۍ بە ئەمر و قەرارێوە کە مشتومڕ هۊرمەگێرۆ.
هەڤاڵ دەریا وەڵۍ گرڎ چێوێنە جە ئشناسنامە و کەسایەتی ۋێشەنە نوێنەرایەتی بیردۆزوو ئازاڎیی ژەنۍ کەرۍ و جە سایەو ئامێتەکەردەی هونەرمەندەو گەلی و جەنگەوانەو گەلیش سەروستە. ئەرک و ۋەرپرسیاریی پەنەوازی کۊشیاو ئێمەش بە شێوێوە سەرکەوتانە بەرد ڕاوە. پەیوەسبیەی بە هەڤاڵ مزگینۍ و گەشمەرڎاوە، ئامای دی ئامانجەکاش دەسەبەر مکەرۆ. ئارۆ گەلەکەما و گرڎوو مرۆڤایەتی ئازاڎیی ۋێشا جە ئازاڎیی رابەر ئاپۆینە مویناوە، ئانە ئەرک و ۋەرپرسیاریی گلېرگەو کولتوری و هونەریش جە گرڎ وەختۍ ڕۊشنتەر و گەورەتەر کەردەن.
ڕاو سەرکەوتەی؛ هەر خەباتێوە ۋێش، هەر ساتێوە ژیۋای ۋێش سەروو بنەماو هەڵمەتەو 'ئازاڎیی پەی رابەر ئاپۆی، چارەسەری سیاسی پەی پرسوو کوردی' رێکوستەن و پا هوشیاریی و ۋەرپرسیاریۆ ئی جوڵە میاوۆ ئەنجام.
سەروو ئا بنەمایۍ جارێوەتەر ۋەروودەم و یاڎوو هەڤاڵ مزگینێنە سەرەو ۋێما منامنمېرە و وەعد مڎەیمۍ کە ئا بەهۍ ئاڎە نوێنەرایەتیشا کەرۍ، جە گرڎ ساتێنە جە گرڎ شۊنێنە، جە جەنگوو ۋێمانە، جە هونەروو ۋێمانە، جە ژیۋای ۋێمانە بە بنەماشا گێرمۍ".
