کۊمیتەو ڕاوەبەری پەکەکەی بۊنەو ۱و ئایاری ڕۊو جەهانی کرێکارا و زەحمەتکێشاوە جە بەیاننامېۋەنە ئەرەیاۋناش، "ئێمە جۊشو خرۊشو ۸و مارسی و نەورۊزی بە ۱و ئایاریۊ بەسمېوە و ئیراڎەو مدرامانی و سەرکۊتەی ۱و ئایاریچ یاۋنمۍ بە ۱٤و ئایاری."
کۊمیتەو ڕاوەبەری پەکەکەی بۊنەو ۱و ئایاری ڕۊو جەهانی کرێکارا و زەحمەتکێشاوە ئەرەیاۋنېوەش ۋەڵاکەرڎۊ. ئەرەیاۋناکەو پەکەکەی پی جۊرەنە:
" وەختۍ گرنگ و هەستیاری تاریخینە پێشوازی جە ۱و ئایاری مکەرمۍ. جە ڕۊو یۊگېرتەی و پەشتیوانی و خەباتیمانە، ئێمە مجیەیمېرە مەیڎانەکا و خەباتما پۍ ئازاڎیی و دیموکراسی گۊرەتەر کەرمۍ. سەرەتا جە کەسایەتی گەشمەرڎا تەقسیمو ساڵەو ۱۹۷۷ی و، حەرپاسە ئەنڎاما کۊمیتەو ناۋەنڎیما، ھامڕېما محەمەڎ قەرە سونگور و ڕەمەزان کاپڵان، بە ڕێزو پنەزانایۊ یاڎو گرڎو گەشمەرڎەکاما جە ۱و ئایارینە مکەرمېوە. مدرامانی تاریخی ئیمراڵی، ڕابەر ئاپۊی، ھامڕایا زینڎانەکا، جاڎەکا و کەشەکا، کە وەرەنگاری کەرا، سڵام جە گەلەکەیما کەرمۍ. ئێمە قەناعەتما چانەن، کە ۱و ئایاری بۊنە بە سەرەتېوە تازە جە خەباتی پۍ کورڎسانۍ ئازاڎی و تورکیایۍ دیموکراتیکی.
۱٤و ئایاری پرۊسەو وڕاو فاشیزمی ئاکەپە - مەهەپەی دەسپنەکەرۊ
ئاشکران ١و ئایارو ئېساڵی جیاوازیۍ فرەش چنی ئانیشاو وەڵتەری هەن . جە ۱٤و ئایارینە ڕائاورڎەی پۍ وڕناو فاشیزمی ئاکەپە - مەهەپەی کریۊ. ۱٤و ئایاری پرۊسەو وڕناو فاشیزمی ئاکەپە - مەهەپەی دەسپنەکەرۊ. بێگومان وڕناو فاشیزمی ئاکەپە - مەهەپەی پۍ کورڎسانی و تورکیای و ۋەرکەوتوو میامینی و گرڎو جەهانی فرە گرنگا. پۊکەی مەبۊ ئینسان وڕاو فاشیزمی ئاکەپە - مەهەپەی بە چېۋېوە ئاسایی بزانۊ. بە کەوتەو فاشیزمی ئاکەپە - مەهەپەی ڕا پۍ ئازاڎیی کورڎی و تورکیای دیموکراتیکی کریۊوە. سیاسەتی عەقڵییەت و مەژگی پاکتاوکەر، ئەرەگیر و فاشیستی جە ڕاوەبەری ئیتیحاد و تەرەقیۊ حەتا ئیسە ئامان، دلېنە مشۊ. دەوڵەتو کۊماری تورکیای سەرو بنەماو ئازاڎیی کورڎی و دیموکراتی بیەو تورکیای ملۊنە سەڎەی دوۋەمۊ. سەرو بنەماو ئازاڎیی کورڎی و، ژەنا و باوەڕیەکا، تورکیا بۊ بە ۋڵاتێۋە دیموکراتیک و ئازاڎ. تورکیای دیموکراتیک ڕا پۍ دیموکراسیکەرڎەو ۋەرکەوتوو میامینی کەرۊوە و سەرو ئاستی میان نەتەوەینە هەنگامېوە فرە بەقوەتە پۍ ڕاپیماو ئازاڎیی مرۊڤایەتی منیۊ.
وەرو ئانەی، پۍ ڕاگېرتەی چا وەڵۍ کۊتەیە سەرو ئاستو جەهانی و مەنتیقەی و نەتەوەیی، گرڎ دماکەوتەیۍ و خیانەتۍ کورڎی کە پەشتیوانی جە فاشیزمی ئاکەپە - مەهەپەی کەرا و گەرەکشانە مەرحەلېوە تەر دەسەڵاتەنە مەناوە. سەرو ئی بنەمۍ فاشیزمو ئاکەپە –مەهەپەیچ پۍ مەنەیۊیش دەسەڵاتەنە، گرڎو توانا و دەرفەتەکا تورکیای بەکارمارۊنە و پەنا بەرۊنە وەرو گرڎ جۊرە فشارۍ و گەمێوە و فێڵ و تەڵەکېوە. پېسە ئانەی ئاڎۍ پۍ وېشا ماوەو ٢١ ساڵان دەسەڵاتەنە نەبیێبا، چن وەعدېوە درۊینۍ تازۍ مڎا و حۊڵ مڎۊ گەلی ھورخەڵەتنۊ. پېسە ئانەی کە تورکیا موڵکو تاتەو ڕەجەب تەیب ئەردۊغانی بۊ، گرڎو ئا کەسا کە ۋەران ۋەر بە ڕاوەبەری تەیب ئەردۊغانی مرڎاوە بە 'خیانەڎکەرڎەی جە ۋڵاتەنە' تۊمەڎبار کریا. جە سانای بە زەڕی حەتا میاوۊ هەڕەشە کەرڎەی پەنا بەرۊنە وەرو گرڎ ڕېوە و شێوازۍ و گەرەکشا دەنگو مرۊڤەکا دزۊ. یاسا و داڎپەروەری، هونەر و ئەدەب، گرڎ جۊرە چەتەگەریېوە پۍ درێژکەرڎەیۊ عمرو دەسەڵاتو وېشا بە شێۋېوە فرە بۍ منەتانە بەکارمارا. جە ڕوۋەداکا ئی دماییەیەو گېرتە و زینڎانیکەرڎەکانە ئانە بەرکۊتۊ، کە بە گېرتەو ڕۊشنفکراو دیموکراتوازاو هونەرمەنڎاو، سیاسەڎمەداراو، مافناسا و پارێزنەرا و ڕۊنامەنۋیسا حۊڵ مڎۊ ڕا بە حیچ کەسۍ نەڎۊ، کە بانگەشە کەرۊ. حۊڵ مڎۊ بە تەمامو ئانیشاوە، کەشێوە بەقوەت جە ۋێشەنە وەش کەرۊ و دەسەڵاتەنە مەنۊوە، پۊکەی پەنا بەرۊ وەرو گرڎ شێوازەکا و ئامرازەکا تنوتیژی.
ئینە جە وەختېنە فاشیزمی ئاکەپە - مەهەپەی جە بنەڕەتەنە ڕېزانەرە. فاشیزمی ئاکەپە-مەهەپەی مەتاۋۊ بە حییچ جۊرە تنوتیژیۍ، فشار و کۊکوژیۍ، دروۍ و تەڵەکەبازیۍ، بە فاڕاو دیمۊگرافی و دزی جە دەسەڵاتەنە مەنۊوە. پرۊسەو دماییپنەئارڎەی پۍ فاشیزمی ئاکەپە - مەهەپەی دەسشپنەکەرڎەن و چی ڕوۊ ھورچنیەو ۱٤و ئایاری بۊنە بە وێستگېوە سەرەکی. بێگومان فاشیزم تەنیا بە ھورچنیەی ورمەشېویۊوە، بەڵام ھورچنیەو ١٤و ئایاری جە خەبات پۍ وڕناو فاشیزمی ئاکەپە – مەهەپەینە دەورێوە فرە گرنگش بۊ. کۊشیای دیموکراسی و ئازاڎیی و دژە فاشیستی، کە ئێمە بە گرڎ شێوێوە حۊڵش پۍ مڎەیمۍ و ڕاوەبەرش کەرمۍ، بە ھورچنیەکا ۱٤و ئایاری وەڵێکۊتەی گۊرە بەدەس مارۊ. بە دڵنیایۊ ئاخېزو ئازاڎیی فاشیزمی دلېنەبەرۊ، ۋۍ تازەکەرڎەیۊ فاشیزمی دلېنەبەرۊ و پی جۊرە ملۊ وەڵېوە. پۊکەی پێۋیسا ھورچنیەکۍ ۱٤و ئایاری بە گرنگ تەماشە کریا، مشۊ دەنگدای ئەنجام دریۊ، مەبۊ ڕا دریۊ یەک دەنگیچ بە زایە بلۊ، مشۊ پۍ دلېنەبەرڎەو فاشیزمی ئاکەپە - مەهەپەی و مسۊگەرکەرڎە و دڵنیابیەی جە سەرکۊتەو هێزە دیموکراتییەکا، یانە بە یانە، جاڎە بە جاڎە ھەرمانە کریۊ. مشۊ ئینسان گرڎ وەختۍ پۍ مدرامانی جە دژو گرڎ جۊرە ھجومېوە فاشیستی ئاماڎە بۊ.
جە ۱و ئایارینە مجیەیمېرە مەیڎانەکا و جە ۱٤و ئایاریچەنە دەنگ مڎەیمۍ
کەواتە پۍ ئانەی فاشیزمی ئاکەپە - مەهەپەی دلېنەبریۊ و ڕا پۍ ئازاڎیی کورڎەکا و دیموکراسیکەرڎەو تورکیای کریۊوە، پۍ ئانەی گەلا تورکیای و مرۊڤایەتی جە مەژگ و سیاسەتی فاشیستی، ئەرەگیرکەری و پاکتاوکەری ڕزگار کریا، جە دژو گرڎ جۊرە فشارۍ و سیاسەت و عەقڵیەتو باڵادەسی پیای و پۍ وەڵێوستەو ئاخېزو ئازاڎیی ژەنا، پەی ئازاڎیی ھەرمانەو ڕێکوزیای، فیکرو باوەڕیەکا تورکیای، پۍ ماڕاو سیستەمو گۊشەگیری و ئەشکەنجەی جە ئیمراڵی و بەدیئاورڎەو ئازاڎیی جەستەیی ڕابەر ئاپۊی و مسۊگەرکەرڎەی ئازاڎیی جەستەیی گرڎو زینڎانیا سیاسی، پۍ دمایی ئارڎەی بە سیستمی تاڵانکاری جە تورکیا و کورڎسانەنە، پۍ ڕزگاربیەی چی دیکتاتۊرە فاشیستییە، کە دوژمنو ئینسانی و سروشتیا، کە حۊڵو ھورخەڵەتناو زەرەرۋنەکۊتا بوومەلەرزەکەی مڎۊ. پۍ ئانەی تورکیا جە ئاژەو هەڕەشاو ھجومی جە جبەرو سنووریۊ ڕزگار بۊ، پۍ وەڵۍ وستەو ڕاپیمای ئازاڎیی مرۊڤایەتی ئازاڎی و ۋەرکەوتوو میامینی دیموکراتیکی و پۍ دەسپنەکەرڎەو پەیوەنڎیېوە، جە ۱و ئایارینە مجیەیمېرە مەیڎانەکا و سەرو جاڎەکا و جە ۱٤و ئایارینە دەنگەکاما بەکارمارمۍ.
ئێمە جۊشو خرۊشو ۸و مارسی و نەورۊزی یاونمۍ بە ۱و ئایاری و بە ئیراڎەو مدرامانی و سەرکۊتەی ۱و ئایاریچ لکەمڎەیمۍ بە ۱٤و ئایاریۊ.
ئێمە ۱و ئایارو ئېساڵی کەرمۍ بە سەرەتاو سەرکۊتەیۍ گۊرەی پۍ دیموکراسی. ئێمە پېسە کرێکارا، زەحمەڎکێشا، ژەنا و جوۋانا، گەلوو کورڎی ۋڵاڎپارێزی و چەوەسیای، هێزە شۊڕشگېڵ و سۆسیالیستییەکا، مەیڎانەکا ۱و ئایاری پەڕ کەرمۍ و دەس بە ڕاپیمایما پۍ دیموکراسی و ئازاڎیی تازەی مکەرمۍ. جە ۱و ئایاری تا ۱٤و ئایاری پردەو دیموکراسی و ئازاڎیی، پردەو سەرکۊتەی تاریخی وەشەکەرمۍ.
جە ۱و ئایاری حەتا ۱٤و ئایاری، حەتا وڕاو فاشیزمی ئاکەپە - مەهەپەی و زامن بیەو سەرکۊتەی دیموکراسی ئێمە مەیڎانەکانە بیمۍ و بە بۍ مرڎای جە چالاکیی دیموکراتیکی وەردەوامۍ بیمۍ.
جە ۱٤و ئایارینە پۍ وڕناو فاشیزمی ئاکەپە - مەهەپەی و پۍ ماڕاو گرڎ جۊرە ھجومېوە فاشیستی، ئێمە گرڎ وەختۍ ئاماڎۍ بیمۍ.
ئێمە ئایارو ٢٠٢٣ کەرمۍ بە سەرەتېوە پۍ کورڎسانی ئازاڎی و تورکیای دیموکراتیکی.
سەرو ئی بنەمۍ ئێمە ۱و ئایاری ڕۊو یۊگېرتەی و، هامپەشتی و خەباتی جە کرێکارا و زەحمەتکێشاو، ژەنا و جوۋانا، گەلە ۋڵاڎپارێزەکەیما و گرڎو مرۊڤایەتیی سۊسیالیستی و دیموکراتیکی مبارەک کەرمۍ، بە ڕێزو پنەزانایۊ یاڎو گەشمەرڎە قارەمانەکاما کەرمېوە و داوا جە گرڎ لەیۍ کەرمۍ جە دژو فاشیزمی خەبات و کۊشیای دیموکراسی و ئازاڎیی گۊرە کەرا."
ھ . ش
