کۊمیتەو ۋېڕاوەبەری پەکەکەی ئەرەیاۋنېوەش بەبۊنەو ۱۸و ئایاری ڕۊو گەشمەرڎا کورڎسانی ۋەڵاکەرڎۊ. ئەرەیاۋناکە پی جۊرەنە:

"پېسە مزانیۊ، ئێمە ئەۋەڵ گەشمەرڎەی گۊرەو جمیەرو ئازاڎیی کورڎسانیما جە ۱۸و ئایارو ۱۹۷۷ی جە دیلۊک بەخشا. مدرامانو ئازاڎیما و پارتەکەیما، کە وەڵېوەبیەو ئازاڎیمانە، پۍ یاڎکەرڎەیۊ ئەۋەڵ گەشمەرڎەی گۊرەیما هامڕا "حەقی قەرار" ئەرەمەرزیا. ڕابەر ئاپۊ پۍ هامڕا حەقی قەراری ماچۊ، 'ئاڎ پېسە ڕۊحو پەنھان و من بۍ'. خۊتانکەرڎەی ڕاستەقینە  پۍ یاڎو هەڤاڵ حەقی قەراری، شۊنەو ۋېشەرە مدرامان و گەشمەرڎەبیەی تازەش ئاورڎ. جە ۱۹و ئایارو ۱۹۷۸ینە هامڕاما "خەلیل چاڤگون" جە حیلوان گەشمەرڎەبی. وېرەگاو ۱۷و ئایارو ۱۹۸۲ بە چالاکیی مدرامانی تاریخی چوۋارەکەی، زینڎانو ئامەڎی ڕۊشن بیۊ. جە ۱٦و ئایارو ۱۹۹۷ی، نزیکەو ۷۰ ھەڤاڵاما جە هۊلێر بە خیانەتو(پەدەکە)ی کۊکوشکریۍ. پا جۊرە گرڎ ڕوۋۍ جە مانگەو ئایارینە دەیان گەشمەرڎېما دۍ، پۊکەی ئایار بی بە 'مانگەو گەشمەرڎا کورڎسانی' و ۱۸و ئایاری بی بە 'ڕۊو گەشمەرڎا کورڎسانی.'

بە ڕێزو، وەشەویسی و پنەزانایۊ

ئێمە جمیەرو ئازاڎیی کورڎسانی و گەلوو کورڎی، لوۋایمۍ دلۍ مانگەی تازۍ گەشمەرڎاوە و ملمۍ روۋېوە تازەو گەشمەرڎاوە، کە ۱۸و ئایاریا. جە ٤٦ەمین ساڵوەگەڕو گەشمەرڎەبیەو حەقی قەراری شۊڕشگێڵی گۊرە، بە ڕێز و پنەزانایۊ بە بەقوەتی یاڎو ھەڤاڵ حەقی قەراری کەرمېوە. جە کەسایەتیی ھەڤاڵ حەقی قەرارینە ئێمە بە ڕێز و پنەزانایۊ یاڎو گەشمەرڎا قارەمانی و ئازاو ڕاپیماو ئازاڎیی گۊرەی ٥٠ ساڵەو ئازاڎیی کەرمېوە، وەعدو ۋېما پۍ بەدیئارڎەو ئامانجەکاشا واوەی کەرمېوە و خۊتانکەرڎەی جە  یاڎیشا و ڕۍ کېشا کەرمېوە. ئێمە ڕابەر ئاپۊ، کە ۋېش بە قسەکەرو گەشمەرڎا پێناسە کەرۊ، سڵام جە مدرامانی تاریخی ئیمراڵی کەرمۍ. ئێمە ئەرەیاۋنمېش، جە ٤۷ەمین ساڵەو کۊشیای سەرو خەتەو ڕابەرایەتی و گەشمەرڎاوە وەرەنگاری و مدرامان کەرمۍ و بە دڵنیایۊ سەرگنمۍ.

پۍ خۊتانکەرڎەی جە یاڎ و ۋیرەوەرییەکاشا

پېسە مزانیۊ، جە مانگەو ئایارینە گەشمەرڎۍ گۊرۍ جمیەری شۊڕشگێڵی تورکیایچ هەنۍ. "دەنیز گەزمیش، یوسف ئاسلان و حوسێن ئینان" جە ٦و ئایارو ۱۹۷۲ جە ئەنقەرە دریۍ  قەنارە. جە ۱۸و ئایارو ۱۹۷۳ ېنە "ئیبراهیم کایپاک کایا" جە ئاسایشو ئامەڎینە چېرو ئەشکەنجەینە گەشمەرڎەبی. جە ئاخرو مانگەو ئایارینە، "سینان جەمگیل" و هامڕېکېش جە نورهەق جە جەنگەنە گەشمەرڎۍ بیۍ. جە ٥۰ەمین ساڵیاڎو گەشمەرڎەبیەیشانە، قارەمانا شۊڕشگێڵۍ گۊرۍ "ئیبراهیم کایپاک کایا و سینان جەمگیل"، بە ڕێز و پنەزانایۊ یاڎو گرڎو گەشمەرڎە قارەمانەکا کۊشیای دیموکراسی و سۊسیالیزمی جە تورکیا کەرمېوە. ڕابەر ئاپۊ پۍ پارېزنا و خۊتانکەرڎەی چی یادەوەرییە دەسش بە کۊشیای ئازاڎیی کەرڎ، مدرامانی شۊڕشگێڵانەش یاۋنا پی ئاستیە و بە دڵنیاییۊ جە ئیسە بەدمایچۊ سەرو هەمان خەتۍ درێژەش پنەدریۊ.

خەتەو سەرکۊتەی دیاری کریا

ئاشکران، کە بەرزبیەیۊ و گەشەکەرڎە و گۊرەبیەو ئی دۊزیە بە گەشمەرڎەکاشەرە بەرگنۊ، کە چا ڕېنە دېنێش. ئا گەشمەرڎۍ، کە چا ڕېنە دریېنۍ، بیۍ بە شایەتحاڵ و نیشانۍ گەشەکەرڎەی و سەرکۊتەی ئا دۊزەیە. گرڎو وەڵېکۊتە ئەرێنییەکا بە کۊشیای سەرو خەتەو گەشمەرڎا، بە وەڵېوەبیەو گەشمەرڎا بەدەس مېنە. جمیەرو ئازاڎیی کورڎسانیچ جمیەرۍ تاریخی چا جۊرەنە، دۊزی ئازاڎیی کورڎسانی دۊزێوە پا جۊرە بەرز و گۊرەن. سەرچەمەو گۊرەبیەکەیچش بە دەیان هەزار گەشمەرڎېنۍ، کە جە ھامڕا حەقی قەراریۊ دەششپنەکەرڎەن و حەتا ئیسە جە زاپ و ئاڤاشین و مەتینانە وەردەوامییشا ھەن. خەتەو سەرکۊتەی جە لایەنو گەشمەرڎە ئازا و قارەمانەکاماوە دیاریکریا، کە بەبې دوودڵی جە دژوو دوژمنی فاشیستی - پاکتاوکەری سەرو خەتەو فیدایی جەنگشا کەرڎ.

سەرچەمەو ئەساسی قوەتینۍ

گەشمەرڎەکېما بنەڕەتیتەرین هێزېنۍ، کە ئێمە پېسە گەلی و جمیەری پەروەردە مکەرا، ڕێکما وزا، یۊما وزا و ڕاوەبەرما کەرا. ۋیەرڎەو ئارۊ و ئاینڎەمانۍ. گرڎ وەختۍ و جە گرڎ شۊنېنە سەرەکیتەرین سەرچەمەو هێزینۍ. هەمیشە فەرمانڎەو کۊشیای ئازاڎیمانۍ. ئاشکران، کە جە پەنجا ساڵی ۋیەرڎەنە گرڎو ئا چېۋا بە نامۍ ئازاڎییۊ بەدەسئامېنۍ  سەرو بنەماو فیداکاری و غیرەتو گەشمەرڎە ئازاکاماوە بەدەسئامېنۍ. وەختۍ ئێمە بە شېۋېوە ڕاس سەرو خەتەو گەشمەرڎاوە ملمۍ، هەمیشە سەرکۊتۍ بیمۍ. پۊکەی ئێمە هەمیشە ۋېما سەرو خەتەو گەشمەرڎاوە پەروەردە کەرڎەن، پەرسایۊما جە ۋېما کەرڎەن و سەرو ئا بنەمۍ هەمیشە وېمارە لوېنمۍ و ۋېما ڕاس و تازە کەرڎەنۊ. ئێمە کەوتیمۍ سەرو خەتە و ڕاو سەرکۆتەی.

کۊشیای تەنیا بە ھۆرچنیەی سەرمەگنۊ

بێگومان ئانە ڕاسین جە ئیسە بەدماوە پی جۊرە بۊ. ئێمە پېسە جمیەری و گەلی هەمیشە ۋېما سەرو خەتەو ڕابەرایەتی و گەشمەرڎا پەروەردە کەرمۍ و سەرو ئی بنەمۍ جە دژوو دوژمنی جەنگیەیمۍ، سەرکۊتەی تازە و گۊرەتەر خوڵقنمۍ. حەر ۋېش دوژمنی فاشیستی، ئەرەگیر و پاکتاوکەر ڕېوە جیاوازەش پۍ ناستېنمۍ. ئانا ئەنجامەکۍ ھۆرچنیەکا ۱٤و ئایاریچ جە ئێمە وازۊ و پېۋیسیما پانەینە، کە ئێمە جە دژوو سیاسەت و عەقڵییەتی فاشیستی – پاکتاوکەری بەبۍ مرڎای و بە شېۋېوە بەقوەتتەر کۊشیەیمۍ. ئانە ئاماژەن پانەی، کە کۆشیای جە دژوو سیاسەت و عەقڵیەتی فاشیستی - پاکتاوکەری تەنیا جە ڕاو ھۆرچنیەیۊ سەرکۊتە مەبۊ، بەڵکم مشۊ هەمیشە بە گرڎ شێوە و ڕێبازێوە کۊشیای ڕاوەبەرکریۊ. بێگومان ئێمە بە پاو ئانەی جمېوە و پۍ دلېنەبەرڎەو فاشیزمی، پۍ ماڕاو گۊشەگیری و سەرو بنەماو ئازادیی جەستەیی ڕابەر ئاپۊی پۍ ئازاڎکەرڎەو کورڎسانی و دیموکراتیکەرڎەو تورکیای جە گرڎو بوارەکانە، وەردەوامۍ بیمۍ جە وەڵېوستەو مدرامانی دژ بە فاشیستی.

کۊشیای فرەڕەهەند و حېقمتەر

پېسە جمیەری و گەلی و دۊسا کورڎی، ئێمە سەرو ئی بنەمۍ دەس بە ڕۊ و مانگەو گەشمەرڎا کەرمۍ. هەلومەرجەکۍ داواما ۋنە کەرا، کە ئەرەکۊشایۍ حېقمتەر و فرە لایەنانەتەر جە دژوو عەقڵییەت و سیاسەتی فاشیستی – پاکتاوکەری ڕاوەبەرکەرمۍ. پۍ ئانەی ئێمە تاۋمۍ جە ئەرەکۊشایۍ پی جۊرەنە سەرکۊتۍ بیمۍ، پێۋیسا جە گرڎ وەختۍ زیاتەر جە ڕاسیی ڕابەرایەتی و گەشمەرڎا یاۋمېنە و جابەجېش کەرمۍ. پێۋیسا ئێمە ۋېما سەرو خەتەو گەشمەرڎا و ڕابەرایەتی زیاتەر پەروەردە کەرمۍ و ۋېما بە ڕێکوستەی کەرمۍ.

سەرو ئی بنەمۍ داوا جە گرڎو ھامڕایا جمیەری و گەلی ۋڵاڎپارێز و نیشتمانپەروەریما و، دۊسە دیموکراتییەکاما کەرمۍ، کە سەرو خەتەو گەشمەرڎا و ڕابەرایتینە زیاتەر ڕەخنە جە ۋېما گېرمۍ، ۋنەپەرسایۊ جە ۋېشا کەرا، ۋېشا تازە کەراوە و بە شېۋېوە ڕاس و دروس جە ڕاسیی گەشمەرڎە ئازا و قارەمانەکاما یاۋانە، کە بە ھامڕا حەقی قەراری دەسشپنەکەرڎ و حەتا هامڕایاما گوڵچیا ، هەژار و دڵخواز وەردەوام بۍ. چالاکیی یاۋاینە ئەنجام دەیدۍ،  سەردای زیارەتگای گەشمەرڎا کەرڎۍ، بەشېۋېوە ڕاستەر خۊتانکەرڎەی جە ڕاسی گەشمەرڎا کەرڎۍ، هەمیشە سەرو خەتەو گەشمەرڎا لودۍ، دوژمنی فاشیستی – پاکتاوکەری دلېنەبەرمۍ، ژیایۍ ئازاڎیی، کە پەشتبەستەن بە ئازاڎیی ژەنا جە کورڎسان، بە بەقوەتی بنیاڎ بنیەیدۍ."

ھ . ش