چنی وڕاو ڕژێمو بەعسی، بە تایبەت کە ژەنی چێرو سیستەمو دیکتاتۆری ڕژێمو بەعسینە جە گرڏ مافێوە بێبەش کریێبێنێ، مۆڕاڵو گەلو سوریای بەرز بییۆ. هەرپاسە بە ئیدارەو وێڕاوەبەری دیموکراتیکی، مافو گرڏو گەلا جە سەرنیشتوو وەرکەوتوو سوریای پارێزیا بێ. هەرپاسە ژەنی جە گرڏو بوارە کۆمەڵایەتیەکانە دەورێ ئەساسی گێڵنێنێ. بە ئاماو ئیدارەو کاتی سوریای، ژەنی گەرەکشانە مافەکاشا جە دەستوورو تازەو سوریاینە بە شێوێ دادپەروەرانە پارێزریا بۆنە. بەڵام دەسەڵاتو تەحریرو شامی (هەتەشە) گەرەکشا سوریانە مافو ژەنا پاشێل بکەرۆ و سیستەمو پیاسالاری تازە بکەرۆوە.

چا چوارچێوەنە، جە ٧و کانوونو دووەمی ٢٠٢٥، ژەنا گرڏو پێکئاماکا و ڕێکوزیاکا چا بارۆ وۆرک شۆپێوە ڕاوێژکاریشا ئەنجامدا و جەختشا چانەیە کەردۆ کە بە بێ وەرچەم گێرتەو مافو ژەنا، ئەرەمەزنارەو سوریای قەبوڵ نمەکەرا. جە مییانو وۆرک شۆپەکەینە، هەدیە شەمۆ، واتەواچەو یۆبییەو ژەنا ئێزیدو وەرنیشتی، چنی ئاژانسو هەواڵو فوراتی قسێش کەردە.

'سوریا پێکئامێ فرێ گێرۆ وێ'

 هەدیە شەمۆ واتەواچەو یۆبییەو ژەنا ئێزیدو وەرنیشتی جە درێژەو قسەکاشەنە ئاماژەش پانەیەکەرد: "سوریانە جوانترین چێو فرە چەشنی گەلان. جە حیچ یاگێ جەهانینە ئنەو سوریای پێکئامێ هەمەچەشنێ جە دەور یۆیرە گلێرێ نەبیێنێ. گرڏ پێسەو واڵە و برای پێوەرە ژیوای مکەرا. بەڵام داخەم مەشۆ جە سیستمو دیکتاتۆری بەعسینە بەشێوە فرە چا گەلا جە مافەکاشانە بێبەشێ کریێ. نموونەی وەرچەم گەلو ئێزیدییا کە وەرگەو گرڏ جۆرە ئەشکەنجە و کۆمکوژی و کوشتار و قڕکەردەیش گێرتەن. هەرپاسە ئێمە بە حیچ شێوێوە حیچ مافێما نەبێ و جە گلێرگەکانە یاگێما نەبێ."

'هەتەشە نمەتاوۊ عەقڵیەتو وێش سەرو ژەنارە سەپنۆنە'

هەدیە شەمۆ قسەکاشەنە ئانەیشش وات؛ کە ئارێ فرە دڵوەشێ بێنێ کاتێ سیستەمو دیکتاتۆری بەعسی وڕیا. بەڵام وینمێ ئی ئیدارە تازە جە سوریانە گەرەکشا هەمان سیستمو بەعسی سەرو ژەناو و گەلا سوریاینە سەپنۆ. هەتەشە گەرەکشا سوریای بە پا عەقڵیەتو وێش بەرۆ ڕاوە و بەتایبەت گەرەکشا بی عەقڵیەتەیە ژەنا بکەرۆ ئامانج و مافەکاشا سەرکوت بکەرۆ. ئی عەقڵیەتە نمەتاو ئیدارەو سوریای بکەرۆ، چونکە ژەنی ئیتر ژەنێ جارانی نیەنێ ئەر مافەکاشا زەوت کریا، هێزو ئانەیشا هەن وەراوەرو ئی عەقڵیەتەیە مرداوە و داواو مافەکاشا بکورا. بە پاو عەقڵیەتو وێشا ژەنیشا پەروەردە کەردێنە پەی ئانەی بەژەنا تەری یاونا داواو مافەکاشا نەکەرا. بەهەزاران ژەنی پەی ئازادی گیانو وێشا بەخت کەرد، ئێمە قەد ونەو گەشمەرڏاما سەرو زەمینیۆ جیا نمازمێ و هەتا دماین خاوەنداریش چنە کەرمێ. جە سوریانە گرڏو پێکئاماکا مژیوا، بەدەیان ئایین و بڕوێ هەنێ پۆکەی نمەتاویۆ ئی عەقڵیەتە سەرو گەلارە سەپیۆنە."

'ئێمە قەبوڵ مەکەرمێ سوریا بەبێ ڕاوێژکاری چنی ژەنا بنیات بنریۆ'

هەدیە شەمۆ یاڏ ئاردیمێ کە وۆرک شۆپو ڕاوێژکاری ژەنا بە بەشداریی گرڏو پێکئاماکا بە ئامانجو ئانەی هەرکەس دان بە ئیرادەو ژەنا سوریای بنیۆ دەسش پنەکەرد و واتش: "بەمەڵامەتو ئی دۆخەی و ئا یاسێ کە ئیدارەو تەحریرو شامی سەرو ژەنارە سەپنۆش، ئێمە پێسەو ژەنا جە گرڏو پێکئامای و ڕێکوزیاکا وۆرک شۆپێوە ڕاوێژکاریما ئەنجامدا. چی وۆرک شۆپەنە فرەو چێوی باس و هۆرسەنگنایش پەی کریا، ژەنیش کاردانەوەو وێشا وەراوەرو ئی عەقڵیەتەیە نیشانەدا. ئامانجی سەرەکیما پەی ئی وۆرکشۆپەیە ئانەبێ کە ژەنی جە دەستوورو تازەو سوریاینە پێگوە سەرەکیێ بانە. پۆکەی قەد بەبێ مافو ژەنا و ڕاوێژکاری چنی ژەنا سوریایێ تازە قەبووڵ نمەکەرمێ. مشۆم سیستەمو ئیدارەو وێڕاوەبەری دیموکراتیک بۆ بە نوقتێ سەرەکیە جە دەستوورو تازەو سوریاینە. پۆکەی ئینایمێ چا بڕوێنە گلێرگێوە کە سەرو فکرو ژەنا بنیات بنریۆ قەد شکست نمارۆ و هەمیشە بەوەڵکەوتەی مەنۆوە."

جە دماینە هەدیە شەمۆ سڵامش جە مڏرامانو یەپەژە کەردو بەنداو تشرینی و سردەو قەرەقۆزاقینە واتش: "ئێمە پیسەو ژەنا ئێزیدی داوا مکەرمێ جە دەستووری تازەو سوریاینە مافو ژەنا مشۆم پارێزریا بۆ و سوریێوە دیموکراتیک مەرزیۆرە."