دەسەو ڕاۋەبەری کەژەکەی بۊنەو ١و ئایاری ڕۊو جەهانیی کرێکاراوە یاونەریېش ۋەڵاکەرڎۊ و ئەرەیاۋناش، تورکیا ۋەرەن ڕوو قورستەرین کێشە کۊمەڵایەتی و چینایەتیەکا و ژەنا بیەنۊ و ئەرەیاۋنایچش، "وەخت وەختو وڕناو دەسەڵاتی فاشیستین".
دەسەو ڕاۋەبەری کەژەکەی بۊنەو ١و ئایاری ڕۊو جەهانیی کرێکاراوە یاونەریېش ۋەڵاکەرڎۊ.
جە ئەرەیاۋناکەو کەژەکەینە ئامان:
"١و ئایاری ڕوۋېوەن، کە ساڵەو ١٨٨٦ ی جە شیکاگۊ وەڵېوەبیەکۍ کرێکارا جە لایەن و دۊڵەمەنڎا و دۊڵەتیۊ قەتڵ و عام کریۍ، قوربانیۍ فرۍ پۍ ئا ڕوۋەیە دریېنۍ. جە ساڵەو ١٩٧٧ ینە جە تورکیا و هەمان ڕۊنە جە مەیڎانو تەقسیمی ٣٤ کرێکارۍ قەتڵ و عام کریۍ. ۋەڵۍ گرڎ چېۋېنە ئێمە یاڎو گرڎو گەشمەرڎا ١و ئایاری مکەرمېۋە، کە بە قوربانیداو گیانو ۋېشا ئەرەکۊشاو ڕەنجو ۋېشا گۊرەتەر کەرڎ.
جەهانېۋە داڎپەروەر و ئازاڎ
١و ئایاری ڕۊو کرێکارا جەهانی، کە گرڎو زەحمەتکێشا جەهانی جە ۋېش کۊمکەرۊوە، وەڵۍ گرڎ کەسېنە ڕابەر ئاپۊ، کە پۍ ژیایۍ ئازاڎیی ڕەنجێوە فرەشدان، جە ئەڎایا زەحمەتکێشی، کە جە دژوو ئا سیستەمە ڕېزایە کۊشیانە، جە گرڎو مرۊڤایەتیی ئازاڎیی پیرۊز بۊ. ئێمە ھومېڎەوارېنمۍ ١و ئایاری ڕۊو کرێکارا جەھانی بۊ بە مەڵامەتو جەھانێوی یەکسان و داڎپەروەری و ئازاڎیی.
سیستمو کاپیتالیستی، کە ئێمە دلېشەنە مژیۋمۍ، ئابووری، کە یۊ جە دیموکراتیتەرین چالاکییەکا گلېرگەین، پۍ ڕائاورڎەو گلېرگەی جە دژوو گلېرگەی بەکارش ئارڎەن. وەختۍ ڕابەر ئاپۊ ۋاتش، "ھەرمانە ئازاڎین'' سیستمو کاپیتالیستیچ ھەرمانەش کەرڎېنە بە چالاکیېۋە پۍ کۊیلایەتی و بە چەمو کۊیلەیۊ تەماشەو خەباڎکارا و کرێکارا مکەرۊ.
ئینسان پۍ ئانەی بژیۋۊ و تیکێوە نان پەیڎا کەرۊ جە هەلومەرجېۋە نامرۊڤانەنە ھەرمانە مکەرۊ، سوپاو بێھەرمانا، کە بە مەبەس وەشکریان گرڎ وەختۍ داواشا ۋنەکەرا ئا ئاژەو کۊیلایەتیە قبوڵ کەرا. جە لایۍ تەرۊ تاقمېۋە گولانە جە کۊشکەکانە مژیۋا، ڕەنجو کرێکارا، ژەنا و گلېرگەی زەوت کەرا و داوا جە زەحمەتکێشا و کرێکارا مکەرا، کە دڎان بنیا وېشارە.
ڕەنجو ژەنۍ مەوینیۊ
سیستمی کاپیتالیستینە جە گرڎ چېۋۍ زیاتەر ڕەنجو ژەنا پەشتگۊش وزیۊ. ژەنی چېگەنە بۊ بە هەرزانتەرین کۊیلەو ئا سیستمەیە. قورستەرین ڕەنجو پیرۊزی ئەڎایەتی بە فریودای ئەڎۍ ڕەنج مەڎۊ ئەڎېکۍ چەوەسیاوە و ئا ڕەنجە مەوینیۊ. ئەڎا گنۊنە چېرو بارو قورسی ویژدانیش کە مەتاۋۊ خۊتانکەرڎەی جە زارۊڵەکاش کەرۊ و سەرکوت کریا. ئا سیستمە، کە ڕەنج و ئابوری تەنیا بە زەڕی و قازانجی مزانۊ، سەرەڕاو ئانەی بەبۍ مرڎای ڕنج مڎا، بەڵام رەنجو ئەڎایا مەوینیۊ و حسابش پۍ مەکریۊ.
ژەنی جە وەختو کرێکاریی ھەرەوەزینە ملا پۍ گۊرە شارەکا و جە دماو کامیۊنی و گەڵابەکاوە تووشو تراژیدیای با، هەراسان کریا و پەلامارە دریا و دەسدرێژیشا جە دژ ئەنجام دریۊ، سەرەڕاو ئانەیچ ھجومی زایەندەیی(سېکسی) سیستمو پیا سالاری ئەنجام دریۊ. سەرەڕاو ئانەی ژەن و پیا هەمان ھەرمانە کەرا و فرەو جاریچ جە قورستەرین ئاژەنە ھەرمانەشا پنەکریان، بەڵام پېسە یۊی مەعاششا پنە مەڎریۊ، کە بە پیېۋە دریۊ. جە وەختو دەسەڵاتی فاشیستیی ئاکەپە و مەهەپەینە بە قەرارەکا بارو نائاسایی، فرەو ژەنا جە سەرو ھەرمانەکاشانە بەرکریۍ و جە سەردەمو پەتاو کۊرۊناینە ئا دیارڎە زیاڎش کەرڎ، زەحمەتکێشۍ نەتاواشا نان پۍ یانەکاشا بەراوە و یاۋۍ بە ئاستێوە، کە هەوڵو ۋێکوشتەیشا دا.
کرێکارۍ پێسە کۊیلەی کارشا پەنە کریۊ
جە سەرڎەموو دەسەڵاتداریی ئاکەپەینە ڕەنجڎەرۍ، دەگانشینۍ و گرڎوو کرێکارا بەتایبەتی ژەنی و زارۊڵی ڕووبەڕووۍ زەحمەت و دژواریۍ فرەی بێنێوە. کرێکارۍ پێسە کۊیلەی هەرمانەشا پەنە کریۍ، بەهەڕەمەکی و بێپاساو جە هەرمانەکایچشانە بەرۍ کریێنۍ، ڕووبەڕووۍ بێهەرمانی کریێنێوە و تووشوو تاوانی بێنیوە یاگۍ هەرمانێنە. هاموەخت پێسە ئانەی جە سۊما و ئاماسراینە ڕووەش دا، ڕووەبەڕووۍ کۊکوشی بێنێوە سەروو هەرمانێوە. دەگانشینۍ نەبییەی زەمینی، نەبییەی بنەتۊمی و وشکەساڵیشا ملەرە سەپیۍ و زەمینە بەپیت و بەرەکەتەکۍ و ڕەنجی مەبارەکوو دەگانشینا یاوۍ ئاستوو دلێنەشییەی. ڕەنج و مانیای ژەنا، کرێکارا، دەگانشینا، کاسبکارا و ڕەنجڎەرا بەدڕندانە وزیۍ خزمەتوو بەرژەوەنڎییەکاو دەسەڵاتی فاشیستی ئاکەپە-مەهەپەیۊ. فاشیزموو ئاکەپە-مەهەپەی جە دەسەڵاتداریی ٢١ ساڵەو وێشنە دزیەی ڕەنج، گەنڎەڵی و بێئەخلاقییش زیاڎتەر کەرڎەن و گلێرگەی ڕەنجڎەر هەژارتەر بییەن، ئەرڎۊغان و لایەنگێرەکێش دەوڵەمەنڎۍ بیۍ.
دژوارتەرین و چەپەڵتەرین جەنگ
باجوو ئا جەنگە دژوار و چەپەڵەی جە کوردساننە کەرڎەنش، وستەنش سەروو شانەو گەلوو کورڎی و گەلاو تورکیای و ڕەنجڎەرا. وەروو ئانەی(چەنەشییە)تێچوو و ئا جەنگی کۊلۊنیالیستییەی کە دابین کریۍ، 'واریاتی کەم و بازاڕی گرانشا' ملوو خەڵكیرە سەپنان و خەڵکشا بەرەو وێکوشتەی، هەژاری و ئاوارایی بەرڎەن. جە تاریخوو تورکیاینە جە گرڎوو وەختەکا زیاڎتەر چی سەرڎەمەنە قۊرتە کۊمەڵایەتییەکۍ، چینایەتی و قۊرتەکاو ژەنا ئامێنۍ ئاراوە.
وەختوو ئانەی ئامان کە دەسەڵاتداری فاشیست دلێنە بریۊ
وەختوو ئانەیە ئامان، کە وەراوەروو ئانەیە مردمێوە، ئی دەسەڵاتدارییە فاشیستە، دووەڕووە، ونچەکن و چەوسنەرەی دلێنە بەرمۍ. کۊشیای ١وو ئایاری کۊشیای ژەنێن و جە هەمان وەختنە کۊشیای ڕەنج و ئازادیین. ساعیبداری جە ڕەنجووکۊشیای ئازادبییەی، وێڕاوەبەری، خوڵقنەروو ژیوای، گلێرگە و کەسایەتیی ئازادین. ئێمە چەنی بابەتوو ڕۊی و پەرسەو ورچنیەی جە تورکیانە و سەرنیشتوو کوردسانینە خێرامای جە یەکوو ئایاروو ٢٠٢٣ۍ کەرمۍ. ئی ورچنیەیە بەینوو ڕژێموو ئاکەپە-مەهەپەی فاشیستیوە جە لایۍ، کە بەدڕندانە ڕەنج تاڵان کەرۊ، چەولایچۊ گەل و ژەنی، کە بە ساعیبداری جە ڕەنجی گەرەکشانە ئازادۍ با، کریۊ. بێگومان ورچنیەی گرڎ چێوۍ نییا، بەڵام جە تاریخوو کۊشیای و ڕەنجینە ئاستێوە گرنگا.
لە ١وو ئایارینە ئێمە مجیەیمێرە مەیدانەکاو کۊشیای
ئێمە داوا جە ژەنا و گەلاما کەرمۍ، کە لایەنگیرۍ و هۊگرۍ ڕەنج، ئازادی و دادپەروەرینۍ، جە ١وو ئایاروو ئێساڵینە مجیارە مەیدانەکاو کۊشیای. ڕژێمی فاشیستوو ئاکەپە-مەهەپەی گەنڎەڵی و چەمچنۊک ئیتر بە پێویسش مەزانۊ، کە دوژمنایەتیی وێش وەراوەر بە ڕەنجی و ژیوای و ژەنا شارۊوە و فرە بەئاشکرا ئانەیە کەرۊ. پەوکای وەختوو ئانەیە ئامان، کە ئی ڕژێم و سیستمە دلێنە بریۊ و دماییش پەنا باریۊ. جە ١وو ئایارینە مشۊم ئێمە یۊ بەیۊ چەنەپەرسایۊ جە دوژمنایەتیی وەراوەر بە ڕەنجی کەرمۍ و جە دژوو ئی دەسەڵاتدارییە فاشیستەیە هێزوو کۊشیایما کەرمۍ بە یۊ. حەرپاسە جە ورچنیایەکایچنە بە گیانوو ١وو ئایاریوە هامپەیمانی ڕەنج و ئازادی ورچنمۍ. گرنگا کە جوابی پێویس بە سیستمی ئەرەگیری، ئاغایەتی و کۊشکۍ دریۊوە، بە ئیرادەو گەلی و ژەنا دماگورز چی دەسەڵاتدارییە ونچەکن و چەوسنەرەیە دریۊ. ڕاسییی ژەنا، ڕەنجڎەرا، دەگانشینا، پیشەوەرا، دوکاندارا، ڕەنجی بێوەراوەر و زەوتکریاو ڕەنجڎەرا، ئا ئینسانا جە وەختوو هەرمانکەرڎەینە کوشیێنۍ، ئا ڕەنجڎەرۍ تووشوو کەمئەنڎامی بیێنۍ، ئا ئینسانۍ کە جە ڕاو هەژاریوە ڕووبەڕووۍ ژیوایۍ جبەروو ئینسانیەتی کریێنۍ، ئینەیچوەرپەرسبییەی ئانەیش وستەن سەروو شانەیما، کە جە ورچنیایەکانە جە دەسەڵاتوو ئاکەپە-مەهەپەینە کەرمۍ. ئینە وەرپەرسبییەی تاریخی گەرڎەنوو گرڎوو ئینسانەکامانە کە هۊگرۍ و لایەنگیرۍ ڕەنج و ئازادینۍ.
پەی ئەرەمەرزنای جیهانێوە ئازادی بانگەواز ئەرەیاونمێ
ڕەنجڎەرۍ گرڎشا بەتایبەتی ژەنی مشۊم ساعیبداری جە ڕەنج و مافوو وێشا کەرا، جە ١٤و ئایارینە مافوو وێشا بە دروستتەرین نۊع بەکار بارا، بە گیانوو ١وو ئایاری جوابی تاریخی بە دوژمناو ڕەنجی بداوە. گیانوو ١وو ئایاری گیانوو هەرمانگەین، زەمین، یاگۍ هەرمانەکان، مشۊم ئی گیانوو یەکوو ئایاری جە دەنگداینە نیشانە بدا، پەی ئانەی سیستمێوە جە ڕووەو ڕەنجی و مافیوە بە دەسوو وێما بنیاد بنیەیمۍ، مشۊم هەنگامێوە تاریخییە ورگێرمۍ.
بە بۊنەو یەکوو ئایاری ڕۊو جیهانیی ڕەنجدرا ئێمە جارێوە تەر داوا جە ژەنا، ئەدایا، دەگانشینا، ڕەنجڎەرا کەرمۍ، کە بە دەوروو پاڕادیگمای دیموکراتیکی، ئیکۊلۊژیک و ئازادیپارێزنوو ژەنا کوۍ باوە و بە کۊشیای جیهانێوە ئازادی دروست کەرا".
س.ز/ ھ . ش
