یاگەگیروو هامسەرۆکایەتی ۋېڕاوەبەری دیموکراتیکی هەرێموو سەرنیشت و ۋەرکەوتوو سوریای گابریێل شەمعون ئەرەیاۋناش، کە پەیماننامەو کۆمەڵایەتی مافوو گرڎوو پێکئامایەکا مسۆگەر کەرۆ و واتش، "حەز و وەرموو گەلاو سوریای پۍ ژیۋایۍ شکۆمەندانەی و ئازاڎیی وێنا کەرۆ".
دەسەو هامسەرۆکایەتی ئەنجومەنوو گرڎیی ئیدارەو ۋېڕاوەبەرایەتی و نوێنەرایەتی ئەنجومەنەکاو یاسا نیایرەو حۆت هەرێمەکەی ١٢و کانونوو یوۋەمی/دیسەمبر، پەی پەسەنڎکەرڎەی پەیماننامەو کۆمەڵایەتی کوۍ بیېوە، جە ئاکاموو گلېرۊبیەکەینە ١٣٤ خاڵۍ پەیماننامەو کۆمەڵایەتی ۋېڕاوەبەری سەرنیشت و ۋەرکەوتوو سوریای پەسەنڎ کریۍ.
یاگەگیروو هامسەرۆکایەتی ئیدارەو ۋېڕاوەبەری دیموکراتیکی هەرێموو سەرنیشت و ۋەرکەوتوو سوریای گابریێل شەمعون باسش چانەی کەرڎ، کە پەیماننامەو کۆمەڵایەتی بناغېوە دیموکراتیکیش نیارە، کە جە ئیراڎەو گەلی پێکمۍ و واتش، "گرڎوو ئا گروپا کە نوێنەرایەتی گلېرگەکا کەرا، گروپ و پێکئاما سیاسیەکۍ، گەنجا، ژەنا و گرڎوو هێزە کۆمەڵایەتیەکا بەشدارۍ ئاماڎەکەرڎەو پەیماننامەی کۆمەڵایەتی بێنۍ".
ماوەو چن مانگېنە جە ڕاو کۆمیتەیۍ ۋەرفراوانیۆ کە گرڎوو بەشەکا گلېرگەی وێنا کەرۆ چنی گەلی، دامودەزگا مەڎەنیەکا، کۆمین و پارتەکا کۊبیەیۆ سازکریا و پێشنیاز کریا کە پڕۆژەو پەیماننامەی کۆمەڵایەتی پێشکەش بە کۆمیتەی گرڎیی کریۆ. دماتەریچ دماو گفتوگۆیۍ ۋەرفراوانی پەسەنڎ کریا".
'پەیماننامەو کۆمەڵایەتی دیموکراسی راستەقینەن'
شەمعون ئانەش وست ڕووە، کە پەیماننامەو کۆمەڵایەتی کە پۍ گرڎوو پێکئامایەکا، گەلاو هەرێمەکەی وەرمېوەن و واتش، ئیراڎەو گرڎوو پێکئامایەکا وێنا کەرۆ و پی جۆرە بەردەوام بۍ: "جە تەرەفوو دەسەو گرڎیینیۆ کە نوێنەرایەتی پەرلەمانوو سەرنیشت و ۋەرکەوتوو سوریای کەرۆ پەسەنڎ کریان. پەیماننامەو کۆمەڵایەتی مافوو گرڎوو پێکئامایەکا مسۆگەر کەرۆ. حەزوو وەرموو گەلاو سوریای پۍ ژیۋایۍ شکۆمەندانەی و ئازاڎیی وێنا کەرۆ. ئینە هەنگامېنە پۍ گرڎوو گەلاو سوریای و پۍ دماڕۊو سوریای دەسکۊتېوە دیموکراسی راستەقینەن. دماو کاولکاری و ئا جەنگا کە سوریا رووبەڕووشا بیۆ، ئارۊنە ئێمە موینمۍ کە کەسانېوە سوریانە دیموکراسی راستەقینە خوڵقنا".
'ئەنجومەن نوێنەرایەتی قەرارە کۆمەڵایەتیەکا کەرۆ'
شەمعود خاڵە گرنگەکۍ پەیماننامەی کۆمەڵایەتیش پی جۆرە پۆلێن کەرڎۍ، "پڕەنسیپ و بنەماکاو پێکئامایەکا، دیموکراسی و مافەکاو مرۆڤی و سەروو چەمکوو ئەنجومەنەکاو گەلیچ هەڵوېسە کریان. مشۊم ئەنجومەنێوە کە گرڎوو دەستەکا چنەشەنە بەشدارېنۍ و نوێنەرایەتی قەرارەکاو گلېرگەی کەرا، پێکبېنە. حەرپاسە جە ستراتیجوو ئەنجومەنوو ڕاوەبەری گرڎ پارێزگېوەنە ئەنجومەنێوە داڎوەری و داڎگېوە داڎوەری کۆمەڵایەتی دیاریکریان. داڎگا سەروو ئا مژارا کە پێچەوانەو پەیماننامەو کۆمەڵایەتی و بنەما و پرەنسیپەکا پاشێل کەرۆ، قەراری پێویس جە بارەشاوە مڎۆ".
