هەواڵسازو بەشو عەرەبیی ئاژانسو ڕۊژنیوزی سلێمان ئەحمەد ڕۊو ١ تشرینو یوەمی بە مەبەستو دیداری چەنی بنەیانەکەیش گەڕەکەو شێخ مەقسودو حەڵەبینە، گێڵابێوە پەی وەرنیشتو کوردستانی. سلێمان ڕۊو ٢٥ تشرینو یوەمی وەختو گێڵایۊنە پەی پانیشتوو کوردستانی دەروازەی سنووری سێمالکا (پیشخابوور)ینە هێزەکاو پەدەکەی ئڕفانان و تا ئیساتێچ ئازاد نەکریان.

ڕۊنامەوان و ئەندامو پەلیانەو زێوە نەوسۍ پیر حەیدەر سەبارەت بە گوشارەکاو سەرو ڕۊنامەوانا قسێش پەی بۊ ئاژانسو هەواڵو فوراتی (ANF)ی کەرڎۍ. هەیدەر وستش ڕووە، کە پەدەکە جە هێزو ڕۊنامەوانا متەرسۊ و پەی ئانەیە هەقیقەتوو وێش بشارۊوە پەنا پەی فشاری و پاشێلکارییا بەرۊ.

'ڕاسی هەرگیز گلێرگەنە مەشاریۊوە'

پیر حەیدەر باسو ئانەیشە کەرد، کە چی سەرڎەمەنە ڕۊنامەوانی و ئەرەیاونای دەور و یاگێوە گرنگەش هەنە و متاوۊ دەوری سەرەکی گێڵنۊ، پەوکای دەسەڵاتدارۍ فرە جە  ڕۊنامەوانا تەرسا و بە چندین نۊعۍ هجوم و فشارێشا  سەرۊ وەش کەرا و پەی بێدەنگکەرڎەی ڕۊنامەوانا پەنا پەی گێرتەی و کوشتەیشا بەرا.

ئا ڕۊنامەوانە هجوومەکاو دەوڵەتو تورکی پەی سەرو ڕۊنامەوانا بە وەرهەڵێسکاری نیارە و واتش، کە پەدەکەیچ پانیشتو کوردستانینە هەمان ورسونیشتو دەوڵەتو تورکی وەراوەرو ڕۊنامەوانا ئەوەخوای کەرۊوە.  پانیشتو کوردستانینە دژو ڕۊنامەوانا فشارێوە گەورە ئینا ئارانە و ڕا مەدریۊ، کە بەئازادانە هەرمانەکاشا کەرا. گێرتەی هەواڵسازو بەشو عەرەبیی ئاژانسو ڕۊژنیوزی نموونێوە ئا فشارەینە. ئا فشار و زەختە نیشانۍ و بەروزو  تەرسێشانە. تا بە ڕاسیی ئاشکرۍ نەبا ڕاگێریە جە ئەرەیاونای ئازادی کەرا".

'گەل جە دەسەڵاتداراو پانیشتی تووڕە و نیگەرانا'

حەیدەر ئاماژەش پەی کەڵەکەبییەی چندین قەیرانە سیاسی و ئابوورییا کەرد، کە پانیشتو کوردستانینە و ئا تەنگەژەیەش ویر وستۊ، کە بەینو هەولێری و بەغداینە سەرو پەرسەو مووچەی هەن و پێسە دۊخو هاموەڵاتییاو هەرێمی جە ڕووەو داراییوە تا مۍ خراپتەرە بۊ و گردو ئانیشایچ تووڕەیی و بێزاریی هاموەڵاتاش دژو دەسەڵاتداراو پانیشتو کوردستانی زیاتەر کەرڎەن و بە ئەنواع شێوە ئا ناڕەزایەتییەشا بەروستەن، وەلۍ دەسەڵاتداراو پانیشتی بە گێرتەی و فشاروستەیسەرو ڕۊنامەوانا هەوڵۍ مدا، ڕاگێری وەنەو فاڕایۊ ئا ڕاسییا پەی بۊ ڕای گردینی کەرا و گەرەکشا نیا کەس دژو ئادیشا هیچ واچۊ ".

'پێویسا ڕێکوزیۍ و ئەرەمەرزیا پەیوەندیدارەکۍ هەرمانەو وێشا بیاونا یاگێ'

رۊنامەوان پیر حەیدەر ئاخرۊ داواش وەنەو ڕێکوزیا و ئەرەمەرزیا پەیوەندیدارەکا کەرڎە، کە هەرمانەو وێشا بیاونا یاگۍ و واتش، "مشۊم دەمودەس هەواڵسازو بەشو عەرەبیی ئاژانسو ڕۊژنیوزی سلێمان ئەحمەد، ئازاد کریۊ. ئێمە پێسە ڕۊنامەواناو شەنگالی، دژو گێرتەی و فشارو سەرو ڕۊنامەوانانمۍ. هەرپاسە داواو ئازادکەرڎەی ڕۊنامەوان سلێمان ئەحمەدی کەرمێ".