پیران هەرکی، یۆ جە زینڎانیکریایا بادینانی جە بارەو زینڎانیکەردەی چالاکا و ڕۆنامەنویساوە جە تەرەفوو پەدەکەیۆ ماچۆ: "دەنگی ئازاڎ بە زینڎانیکەردەی کپ مەبۆ"، هاموەخت چن پاشێلکاریێوە زەقوو مافەکا مرۆڤی دلۍ زینڎانوو هۊلێرینە ئاشکرا کەرۆ.
سلێمان ئیسماعیل ئشناسیا بە پیران هەرکی، یۆ جە زینڎانیکریایا بادینانی و چالاک و چەمڎاری سیاسی و پێشمەرگەی قەڎیمی بیەن. ئاڎ جە بارەو زینڎانیکەردەو زینڎانیکریایا بادینانیۆ جە تەرەفوو پەدەکەیۆ بە ئاژانسوو هەواڵوو فوراتیش وات: "ماوەو ساڵێوە و دووۍ مانگا جە گێرتەخانەو گرڎیی هۊلێرینە بە ناحەق گیریانی، پەدەکە ئی هەڵمەتێشە جە ساڵەو ٢٠٢٠ دژوو چالاکا و ڕۆنامەنوویسا و کەسایەتییە سیاسییەکا دەسپنەکەرد و جە ماوەو یەرۍ مانگانە زیاتەر جە ٢٣ کەسێش جە چالاکا و ڕۆنامەنویسا جە گێرتەخانەو گرڎیی هۊلێرینە زینڎانی کەردۍ."
پیران هەرکی سەبارەڎ پانەی کە پۍ چی پەدەکە ڕۆنامەنوویسا و چالاکا زینڎانی کەرۊ و ئەشکەنجەشا مڎۆ واتش: "یۆ چا مەڵامەتا ئانەن کە پاسە بە پەدەکەی کەرۆ کە دەنگی ئازاڎیی زینڎانی کەرۆ ترسینە چانەی کە دەنگی ئازاڎ ڕاسی و حەق بە گەلی میاونۆ و بێ پلانی و بێ سیستمی و گەندەڵی ئاڎیشا مڎۆ گۊشۍ گەلیرە، پەدەکە زیاتەر جە دەوروبەر و سنورەکەو ۋێش تەرسۆ، پۊکاتی ڕا بە ئازاڎیی جە سنوروو ۋێشەنە مەڎۆ و زینڎانیما کەرۆ، بەڵام مشۊم ئانەی بزانۆ دەنگی ئازاڎ بە زینڎانیکەردەی کپ مەبۆ، دەنگی ئازاڎ بە ئازاڎیی بێدەنگ بۆ، بەڵام پەدەکە هیچ وەختۍ وەشش جە دەنگی ئازاڎیی نامان هەمیشە بەسەرچەمەو ئاشکرابیەی بێ پلانی و گەڵدەڵییەکا وێشش زانان."
پیران هەرکی جە بارەو مامەڵەو دلۍ زینڎانوو پەدەکەیۆ ئانەیچش وست ڕووە:" ئەگەر پنەشا واتەبیێنا دلۍ کوردسانینە زینڎانێوە چانە هەن حیچ وەخت باوەڕ نەکەرێنا، زینڎانێوە کە پانیەکەش ٥.٥ بە ١٢ مەترۍ بۍ، ١٥٠ زینڎانیکریێش حەر جە مامۆساو زانشتگەی و ڕۆنامەنوویس، مهەندیس و زینڎانی سیاسی چنی کەسانێ کە کەیسوو دزی و بازرگانی بە ماددەی هۆشبەریشاوە بۍ چا زینڎانیێ بێنۍ، ئینەیچ پۍ ئانەی بەکار ئارێنۍ تا ئاژەی دەروونیما تێکبڎا و هیواما بە ژیۋای جە دەس بڎەیمۍ. ڕووۍ ئا یاگێمە پیمانە کەردە کە من و دووۍ تەر جە زینڎانیکریایا بادینانی چنەشەنە نان و ئاوی وەرێنمۍ و نیشێنمێرە کە تەنیا ٦٥ سم بۍ، ئینە تەنانەڎ پۍ مافوو ئاژەڵیچ مەشیۆ نەک ئینسان. یۊتەر جە قۊرتەکا دلۍ زینڎانی ئانە بۍ کە نە واردێوە عال بۍ کە وریۆ نە دکتۆر و حیچ دڵنیایێوە تەندروستی بیەیش بۍ، ئینەیچ یۆ بۍ چا ڕایا پەدەکە جەنگی دەرونیش جە دژوو ڕۆنامەنویسا و دەنگی ئازاڎیی پنەکەرۍ. دلۍ زینڎانوو گرڎیی هۊلێرینە بەحیچ جۆرێ کتێب و سەرچەمەی هەواڵی جە تیڤییەکاوە بیەیش نەبۍ کە یۊبۍ جە پێویسییەکاما، ئانەی کە بۍ تەنیا جەمۍ کەناڵۍ تەرفیهیۍ بێنۍ و حیچی تەر."
پیران هەرکی چالاک و چەمڎاری سیاسی سەبارە بە مامەڵەو دادگای چنی ئاڎیشا واتش:" ئێمە ٧ جار ڕووبەڕوو دادگای کریایمێوە و کەیسەکەما نا تەمام مەنۆ، حەرچنە چنڎین دادوەرۍ سەروو کەیسەکەو ئێمە سزا دریێنۍ، بەڵام نەتاوێنۍ قەرار بڎا سەرما و بێدەنگێما کەرا."
