پەژاک ھجومو سەرو تەیارەخانەو سلێمانییش شەرمەسار کەرڎ
کومیتەو پەیۋەنڎییەکا پارتو ژیای ئازاڎیی کورڎسان (پەژاک)ی بە ۋەڵاکەرڎەیۊ ئەرەیاۋنێۋە ھجومو سەرو تەیارەخانەو میان دۊڵەتیی سلێمانییش شەرمەسار کەرڎ.
دەقو ئەرەیاۋناکەو پەژاکی:
شەرمەسار کەرڎەو ھجومو سەرو تەیارەخانەو سلێمانی
پۍ ڕای گرڎی
بە درێژایی عمرو، شارو سلێمانی پېسە مەڵبەنڎێۋە نیشتمانپەروەری و وڵاڎپارێزی نامیەبیەن و جە ڕوۋە قورس و زەحمەتەکانە یاۋان بە فریاو گەلەکەیما جە بەشەکا تەرو کورڎسانینە. هەردەم بیەن بە ناۋەنڎێۋە پۍ ناستەو پاوانوازی و صەڎێۋەبیەن دژوو ئەرەگیری. ئانەیچ بیەن بە مەڵامەتو ھجوم و پەلامارداو دوژمنا و ناحەزا کورڎسانی پۍ سەرو ئا شاریە و قوربانیۍ فرە بە نرخېش بۊنەو ئا هەڵۋێسەیشۊ دێنۍ.
پەلامارداو فڕۊکە بۍ فڕۊکەوانەکا دۊڵەتو ئەرەگیری ترکی پۍ سەرو تەیارەخانەو شارو سلێمانی، حەوڵێۋە نامرۊڤانەن، کە سەروەریی هەرێمو پانیشتوو کورڎسانی و عێراقیش پاشێل کەرڎ. بۍ گومان ئانە جاری یوۋەم نییا کە ھجوم کریۊنە سەرو پانیشتوو کورڎسانی و دەیان هامۋڵاتیۍ مەدەنی و پێشمەرگۍ جە ئاکامو ئا ھجومانە گەشمەرڎۍ بیێنۍ. ئەگەر حەدۍ پۍ ئا دەسدرێژیا دۊڵەتو ترکیەی نەنریۊرە ئەگەرو واوەی بیەیشاۋە هەن.
کومیتەو پەیۋەنڎییەکا پارتو ژیای ئازاڎیی کورڎسان (پەژاک)ی ھجومو سەرو تەیارەخانەو میان دۊڵەتی سلێمانیش بە تنی شەرمەسار کەرڎ و چەمەڕاو هەڵۋێسېۋە یۊگېرتەو مەردمو پانیشتوو کورڎسانی مکەرۊ پۍ پەشتگیری چا شارە نیشتمانپەروەریە. داوا جە جەمە میان دۊڵەتییەکا و دۊڵەتو عێراقی و پانیشتوو کورڎسانی مکەرۊ چینەی زیاتەر جە ئاستو ئا ھجومانە بێدەنگۍ نەبا و دمایی بە ئەرەگیرکاری دۊڵەتو ترکیەی سەرو خاکو عێراقی و پانیشتوو کورڎسانیۊ بارا.
ھ.ش
