پەژاک ئەرەیاۋناش: سەپنای سزاو قەنارەی سەرو پەخشان عەزیزیۍ و پاگیری سەرو جابەجێکەردەی ئی حوکمە دژە مرۆییە، روانگەو ئامانجی هامبەشو رژیمو ئیسلامی و داعشین جە ۋەرا ۋەر بە ژەنا ئازادیوازی گەلوو کوردی نیشانە مڎۆ.
مەجلیسو پارتو ژیۋای ئازادی کوردەسانی (پەژاک) سەبارەت بە پەسەنکەردەی سزاو جە قەنارەدای پەخشان عەزیزیۍ جە لایەنو دادگاو باڵاو ئێرانیوە ئەرەیاۋناش: " جە بنەڕەتەنە سەپنای سزاو قەنارەی سەرو پەخشان عەزیزیۍ و دماتەریچ سەرو وریشە مورادیێرە تەنانەت بە پاو خودو یاسا نامرۆییەکا رژیمو ئیسلامی، هیچ پێگێوە یاساییش نیاو بە تەمامی بڕیارێوە سیاسییا. ژەنە ئازادیوازە پەخشان عەزیزیە کە یاردیدەرەو گەلو ۋێش بیێنە جە دژو تیرۆرو داعشی، لایەق بە ستایشی و رێزو پنەزاناین نەک گێرتەی و سزاو قەنارەی. "
ئەرەیاۋنانیچش: " سەپنای سزاو قەنارەی سەرو پەخشان عەزیزیێرە و پاگیری سەرو جابەجێکەردەی ئی حوکمە دژە مرۆییە، روانگەو ئامانجی هامبەشو رژیمو ئیسلامی و داعشی جە ۋەرا ۋەر بە ژەنا ئازادیوازی و گەلوو کوردی نیشانە مڎۆ. کۆمارو ئیسلامی ئێرانی کە شکسە سەرەمڕەکێش جە مېڎانوو سیاسەتو جبەرینە یاونانش بە خالێ هەرە لاواز جە تاریخو ۋێشەنە، تەنیا ڕاو درێژکەردەیۆ تەمەنو ۋێش و مەنەیۊیش جە دەسەڵاتەنە، جە پەیرەوکەردەی سیاسەتو مشتەی ئاسنینۍ جە دلێینەنە موینۆ".
مەجلیسو پەژاکی جەختیچش کەردەنۆ: " مڎرامانوو ئازادیوازا و بە تایبەتی ژەنا، دەسەڵاتدارا کۆمارو ئیسلامیش بێچارە و دەسەوسان کەردەن. مڎرامانو ژەنا ئازادیوازی، پېسە پەخشانۍ و وریشەی و زەینەبۍ کە پەشت هێقمێنۍ بە فەلسەفەو "ژەنی ژیۋای ئازادی"، نوێنەرایەتی ئیرادە و ویسو گرڎو ئشناسنامە، گەلا و ژەنا ئێرانی و کوردەسانی مکەرۆ. ئا ئیرادە بە سەپنای سزاو جە قەنارەدای سەرو تاکی ئازادیوازیرە هەر هێقمتەرو بەهێزتەر بۆنە."
هەر جە ئەرەیاۋناکەینە ئامان: " هەر جۆرە هەڵسووکەوتێوە جە ۋەرا ۋەرو ژەنا ئازادیوازینە، هەڵسووکەوتا جە ۋەرا ۋەرو قیمەتی و کەرامەتو گەلوو ئێمەنە. هەرپۊکەی پەنەوازا دەمودەس سزاو جە قەنارەدای سەرو پەخشان عەزیزیۍ و وریشە مورادیۍ و گرڎو زینانیا سیاسی تەرینە هۆرشێویۆوە و جە زووتەرین وەختەنە ئازاڎۍ بکریا."
پەژاک داویچش جە گلێرگەی مېیاننەتەوەیی کەردەن دژو سەپنای سزاو قەنارەینە جە ئێران هەڵوێسی تن هۆرگێرا و بانگەوازیچش ئاراسەو ئازادیوازا جە ئێران و کوردەسانەنە کەردەن پانەی کە بە پەرەپنەدای بە " هەڵوێس و چالاکییەکاشا ئاستو خاوەنداریەتی جە پەخشانۍ و گرڎو ژەنە ئازادیوازەکا و گیریایا سیاسینە بەرزتەر بکەراوە، با بە رۆحو شۆرشو "ژەنۍ ژیۋای ئازادی"، نیشانەو کۆمارو ئیسلامیش بڎەیمۍ کە قەنارەو ئاڎیشا جە ۋەرا ۋەرو مڎرامانوو ئێمەنە نمەتاوۆ ۋێش ڕاگێرۆ."
دەقو ئەرەیاۋناکەو مەجلیسو پارتو ژیۋای ئازادی کوردەسانی (پەژاک)ی:
بە مڎرامان شکس بە سیاسەتو قەنارەی مارمۍ
سزای سەپیاو قەنارەی سەرو ژەنە ئازادیوازە و کۊششکارەو بواری کۆمەڵایەتی، پەخشان عەزیزیێرە جە لایەنو دادگاو باڵاو کۆمارو ئیسلامی ئێرانیوە پەسینیا. بێ گومان هەر جە بنەڕەتەنە سەپنای سزاو قەنارەی سەرو پەخشان عەزیزیۍ و دماتەریچ سەرو وریشە مورادیێرە تەنانەت بە پاو خودو یاسا نامرۆییەکا رژیمو ئیسلامی، هیچ پێگێوە یاساییش نیاو بە تەمامی بڕیارێوە سیاسییا. ژەنە ئازادیوازە پەخشان عەزیزیە کە یاردیدەرەو گەلو ۋێش بیێنە جە دژو تیرۆرو داعشی، لایەق بە ستایشی و رێزو پنەزاناین نەک گێرتەی و سزاو قەنارەی. سەپنای سزاو قەنارەی سەرو پەخشان عەزیزیێرە و پاگیری سەرو جابەجێکەردەی ئی حوکمە دژە مرۆییە، روانگەو ئامانجی هامبەشو رژیمو ئیسلامی و داعشی جە ۋەرا ۋەر بە ژەنا ئازادیوازی و گەلوو کوردی نیشانە مڎۆ. کۆمارو ئیسلامی ئێرانی کە شکسە سەرەمڕەکێش جە مېڎانوو سیاسەتو جبەرینە یاونانش بە خالێ هەرە لاواز جە تاریخو ۋێشەنە، تەنیا ڕاو درێژکەردەیۆ تەمەنو ۋێش و مەنەیۊیش جە دەسەڵاتەنە، جە پەیرەوکەردەی سیاسەتو مشتەی ئاسنینۍ جە دلێینەنە موینۆ.
ئانەی ئاشکران، لاوازی و پاشەکشەکۍ رژیمی جە ۋەرا ۋەرو سیاسەتو جبەرینە، بە درێژەدای و زیاتەرکەردەی سەرکوتکاری جە دلێنەنە نمەشاریۆوە. کەمامەو کۆمارو ئیسلامی کۊتەنو هەیبەتش پەی هەمیشەی جە ۋەرا ۋەرو گلێرگەی نەتەوەکا دلۍ ئێرانینە مەڕیان. حاکمیەت کە هیچ ڕەوایەتیێوەش نەمەنەن و بە خێرایی بەرەو شێویای ملۆ، هەر جۆرە ئیرادێوە جە ۋەرا ۋەرو ۋێشەنە بە مەترسی موینۆ و گرڎو هێزو ۋێش پەی دژمنایەتیکەردەی بەکار بەرۆ. بە پێچەوانەو چەمەڕایی دەسەڵاتی، ئی سیاسەتە نەک تەنیا ئیرادەو ئازادیوازا لاواز نمەکەرۆ بەڵکم رووبەڕوو هەڵوێسی و کاروەدای زیاتەری بۆوە و گلێرگە بە بەرزکەردەیۆ بەهیزکەردەی ئاستو مڎرامانی، یۆگێرتانەو بە شێوێوە ۋەرفراوانتەر ۋەرپەرچو ئی سیاسەتەیە مڎۆوە.
مڎرامانوو ئازادیوازا و بە تایبەتی ژەنا، دەسەڵاتدارا کۆمارو ئیسلامیش بێچارە و دەسەوسان کەردەن. مڎرامانو ژەنا ئازادیوازی، پېسە پەخشانۍ و وریشەی و زەینەبۍ کە پەشت هێقمێنۍ بە فەلسەفەو "ژەنی ژیۋای ئازادی"، نوێنەرایەتی ئیرادە و ویسو گرڎو ئشناسنامە، گەلا و ژەنا ئێرانی و کوردەسانی مکەرۆ. ئا ئیرادە بە سەپنای سزاو جە قەنارەدای سەرو تاکی ئازادیوازیرە هەر هێقمتەرو بەهێزتەر بۆنە. ئیتر دروشمۊو "مڎرامان ژیۋاین" کلتوورو ئەوەکۊشای گلێرگەو ئێمەن. ئیرادەو ژەنا ئازادیوازی نوێنەرایەتی ئیرادەو گەلوو ئێمە مکەرۆ. ئاڎۍ قیمەتو گلێرگەی و سەرمەشقۍ نەتەوەو ئێمەنۍ. ئا ژەنە سەرمەشقۍ هێڵۊو سوورو گەلا ئازادیوازی و هەر جۆرە هەڵسووکەوتێوە جە ۋەرا ۋەرو ژەنا ئازادیوازینە، هەڵسووکەوتا جە ۋەرا ۋەرو قیمەتی و کەرامەتو گەلوو ئێمەنە. هەرپۊکەی پەنەوازا دەمودەس سزاو جە قەنارەدای سەرو پەخشان عەزیزیۍ و وریشە مورادیۍ و گرڎو زینانیا سیاسی تەرینە هۆرشێویۆوە و جە زووتەرین وەختەنە ئازاڎۍ بکریا.
بانگەوازیما پەی گلێرگەی مېیاننەتەوەی و کەسایەتییە دیمۆکراتەکا و رێکوزیاکا مافو مرۆڤی ئانەنە کە بە تنی جە ۋەرا ۋەرو سزاو قەنارەینە جە ئێرانەنە هەڵوێس هۆرگێرا و پەی پارێزناو ژیۋای پەخشان عەزیزیۍ ئەوەکۊشای ۋێشا فراوان بکەرا و فشار وزا سەرو کۆمارو ئیسلامی پەی ڕاگێرتەی حوکمو قەنارەی.
داوا جە گەلەکەیما و گرڎو ئازادیوازا ئێرانی و کوردەسانی بە تایبەتی ژەنا و جوانا، ئەڎایا و بنەیانەو گەشمەرڎا مکەرمۍ کە بە بەردەوامیدای و پەرەپنەدای بە هەڵوێس و چالاکییەکاشا ئاستو خاوەنداریەتی جە پەخشانۍ و گرڎو ژەنە ئازادیوازەکا و گیریایا سیاسینە بەرزتەر بکەراوە، با بە رۆحو شۆرشو "ژەنۍ ژیۋای ئازادی"، نیشانەو کۆمارو ئیسلامیش بڎەیمۍ کە قەنارەو ئاڎیشا جە ۋەرا ۋەرو مڎرامانوو ئێمەنە نمەتاوۆ ۋێش ڕاگێرۆ.
مەجلیسو پارتو ژیاۋای ئازادی کوردەسانی - پژاک
٢٣ۍ بەفرانبارو ١٤٠٣
