بۆنۊو ١٣ ەمین ساڵیاڎو شۆڕشو ١٩و تەممووزو ۋەرنیشتیۆ، پەژاک بە پەیامێوە شۆڕشو ۋەرنیشتیش پیرۆز کەرڎ و واتش: " شۆڕشو ۋەرنیشتی مۆدێلێوەن پەی سەرەتاو ئەوەفاریای دیموکراتیکی جە ۋەرکۊتوو مېیامینینە."
پارتو ژیۋای ئازادی کورڎەسانی (پەژاک) بۆنەو ١٣ەمین ساڵیاڎو شۆڕشو ۋەرنیشتیۆ پەیامێوە مبارەکبایش وەڵاکەرڎۆ و ئاماژەش پانەیەدا مۆدێلو شۆڕشو ۋەرنیشتی عالتەرین مۆدێلو چارەسەرییا پەی گرفتەکا ۋەرکۊتوو مېیامینی.
دەقو پەیامەکەو پەژاکی پی جۆرەنە:
"مبارەکبایی ١٣ ساڵەو شۆڕشو ۋەرنیشتی و سەرنیشتوو سوریای جە گرڎو گەلا ناوچەکەی مکەرمې. ئی شۆڕشە مۆدێلێوە دیموکراسییا پەی تەمامو ۋەرکۊتوو مېیامینی، هەرپاسە ڕەنگدایۆش سەرو کۆو ناوچەکەیچ هەن. مۆدێلو دیموکراسیی ۋەرنیشتی، جە ۋەرکۊتوو مېیامینینە کە جە قەیرانێوە فرەلایەنی گۊرەنە گیرش کەردەن، سەلەمنانش تەنیا مۆدێلێوەن کە متاوۆ بۆ بە بە چارەسەرێوە یاگەگیر پەی چارەسەرکەردەی گرفتەکا. پېسەنە مۆدێلێوە کە گرڎو نەتەوەکا و فرەچەشنی کولتووری بتاوا جە سیستەمو دیموکراسی ۋێشانە پێوەرە بژیوا. ئی مۆدێلە دیموکراسییە سەرو بنەماو وەشکەردەی ئازادیی ژەنا و بەهێزکەردەی گلېرگەی ئەرەمەرزیان.
ئیساتې کە سووریا و ۋەرنیشتوو کورڎەسانی ئینې هەستیارتەرین قۆناغەو ۋێشانە، هەر دەسوەردایێوە جبەری سیاسی دەسەڵاتوازی و تێکدەرانەی زەرەر بە ستاتۆکەی مېیاونۆ. کۆمکوژییەکې سوریای نیشانەش مڎا کە چارەسەری بنەڕەتی ئانەنە جارێوەتەر یاگە فاڕای بە دیکتاتۆرییەکا نەکریۆ و قەیرانەکې قووڵتەر بکریۆوە. چارەسەری حەقەتینە ئانەنە کە سروشتو سیستمەکەی، جە دیکتاتۆریێوە مېیانی و نکۆڵیکەریوە فاڕیۆ پەی سیستەمێوە پەی ئانەی گرڎو فرەچەشنییە نەتەوەیی و کولتوورییەکا سووریای و ۋەرنیشتوو کورڎەسانی جە سەیەشەنە ۋێڕاوەبەریێوە دیموکراتیک دەس وزۆ.
شۆڕشو ۋەرنیشتوو کورڎەسانی جە قۆناغێوەنە ڕووەشدا کە سووریا جە گێجاوې ترسناکو تیرۆریستا داعشی و هێزە بەکرێگرتەکا تەرین گیرش کەردەبۍ. هەر ۋەرو ئی مەڵامەتیچە ئا حەقەتینەی کە ۋەرنیشت و سەرنیشتوو سوریای تاواشا سیستەمێوە دیموکراسی سەرو بنەماو پێوەرەژیۋای دیموکراسیی هەمەجۆریی و پرەنسیپی بێلایەنی بنیاڎ بنیا، فرە بە قیمەتا. ئی سیستەمە متاوۆ مۆدێلێوە بۆ پەی دیموکراتیزەکەردەی ۋەرکۊتوو مېیامینی و بە تایبەت جە ئێرانەنە. گومانەش چنە نیا کە دەسکەوتە دیموکراسیەکې ئی شۆڕشەیە متاوا ئیسفاڎە بە گرڎو گەلا ۋەرکۊتوو مېیامینی بیاونا و نیشانە کاریگەرەکې ئی پرۆسەو دیموکراسیکەردەیە تا ئیساتێچ بیەیشا هەن و چالاکێنې. شۆڕشو ۋەرنیشتی مۆدێلێوەن پەی سەرەتاو ئەوەفاڕیای دیموکراسی جە ۋەرکۊتوو مېیامینینە.
پېسە پارتو ژیۋای ئازادی کورڎەسانی (پەژاک) مبارەکبایی ١٣ ساڵەو ئی سیستەمە پەڕ جە دەسکەوتە دیموکراسییە جە گرڎو گەلا و بەتایبەت خەڵکو سووریای و خەڵکو ۋەرنیشتوو کورڎەسانی مکەرمې. وەڵێکۊتەی و گەشەکەردەی سیستەمو دیموکراسی سەرو بنەماو بەشداریی گرڎو مرۆڤەکان، گەڵا ئاڵتونیەکې تاریخیچ پارێزیێنې. سیستەمو دیموکراسی و لامەرکەزی لایەق بە گرڎو گلېرگەو سوریای بۆ و ۋەرنیشتوو کورڎەسانی جە سەقامگیری و ئاسایش و ئارامینە بەردەوام بۆ، وە ئایندێوە تازە پەی گرڎو خەڵکو سووریای بنیۆرە."
