هامسەرۆکایەتی کۆنسەو ڕاوەبەری کۆما جڤاکێن کورڎەسان (کەجەکە) بۆنەو ١٣ەمین ساڵیاڎو شۆڕشو ۋەرنیشتیۆ ئەرەیاۋنێوەش وەڵا کەرڎۆ و شۆڕشەکەش جە گەلا کورڎەسانی و گرڎو مرۆڤایەتی پیرۆز کەرڎ.

ئەرەیاۋناکەو کەجەکەی پی جۊرەنە:

"ماوەو ١٣ ساڵا سەرو شۆڕشو ١٩و تەممووزو ۋەرنیشتیرە موېیەرۆ، کە وەڵێکۊتەیې تاریخیا. جە ئیساتێنە ١٣ەمین ساڵیاڎو شۆڕشی تاریخی پیرۆز مکریۆ. ئێمەیچ ساڵیاڎو شۆرشو ۋەرنیشتی جە گرڎو گەلا ۋەرنیشتی و سەرنیشتوو سووریای، جە گرڎو گەلا کورڎەسانی و سووریای، گەلاو عەرەب، ئەرمەنی، دروزی، تورکمان، سوریانی، عەلەوی، گەلا ۋەرکۊتوو مېیامینی و جەهانی، ژەنا، جوانا و گرڎو هێزە سۆسیالیست، شۆرشگێڵن، دیموکراتیک و ئازادیوازەکا پیرۆز مکەرمې. هەرپاسە جە گرڎو هەمڕایا ئەنتەرناسیۆنالیستی پیرۆز مکەرمې کە دەورێوە گۊرەشا گێڵنا جە وەڵێکۊتەیی و پارېزنای شۆڕشەکەینە. سڵام چی وەڵێکۊتەیە تاریخیە مکەرمې کە شۆڕشو هامبەشو گەلان. جارێوەتەر بە ڕێز و وەشەسیایی و پنەزانایۆ گرڎو گەشمەرڎا شۆڕشی یاڎې مکەرمېوە.

شۆڕشو ۋەرنیشتی قیمەتې تازەش وست سەرو تاریخو مرۆڤایەتییما. وەڵې گرڎ چێوێنە گلېرگێوە کە جە لایەنو سیستەمو دۊڵەت-نەتەوەیۆ چەوەسیێوە، بەبې ۋێپارێزنای جە پەلوپۆ وزیابې، سەرجەنۆ درکش بە هێزو ئیرادەو ۋێش کەرڎ. ڕاش ۋەردەمو دینامیکی بنەڕەتی کۆمەڵاتینە کەرڎۆ، کە مافشا چنە هۆرگیریا بې، سەرکووت کریێبېنې، ڕەنجشا وریابې، پاسشە کەرڎ بە ڕێکوستەبیەی و هۆشەمەندیوە ئیرادەو ۋێڕاوەبەری بەدەس بارانې. جیاوازی زوان، ئاین، مەزهەب و ئیتنیک جە بیەی بە مەڵامەتوو ناکۆکی بەینو گەلانە دووروستۆ و ڕاش پەی ئانەی کەرڎۆ کە پېسە دۆڵەمەڼیێوە کۆمەڵایەتی هۊرگیریۆ. پاسشە کەرڎ گەل، باوەڕی و چاند جە چوارچێوەو ئەنەیاوای دیموکراتیکینە سەرجەنۆ بە واڵەو-برایەتیۆ بژیوا. زەمینەش وەشکەرڎ پەی ئا ژەنا کە پەی دوورتەرین گۆشەو بەشداری ژیۋای کۆمەڵایەتی دورې وزیێبێنې، بە هۆشمەڼی و جە پارېزنای و بنیاڎنیای شۆڕشینە ئاستو سەرمەشقایەتی بەدەس بارا. هەلومەرجش پەی پنەیاونای نەوێوە جوانۍ هۆشیاری، ڕێکوستەی و ڕۊشنی وەشکەرڎ.

بەپوختی شۆڕشو ۋەرنیشتی بە ئەنەیاوای نەتەوەیی دیموکراتیکی و ئازادیوازی ژەنې بی بە چارەسەریێوە گرنگ. جە پراکتیکو ماوەو ١٣ ساڵی ۋېیەردەینە جە فرەو ڕواوە ۋێش سەلەمنا. جە لېوە دژو هرووژمەکا پەی دلېنەبەردەی شۆڕشی، هامشانو گەل و هێزەکاو شۆڕشی مڎرامانێوە گۊرەش کەرڎەن و شۆڕشش پارێزنان، جە لێوەتەرۆ بەردەوامیش بە وەڵېکۊتەی سیستەمو دیموکراتیک، ئازادیوازی و کۆمیناڵی دان. چی ڕوۆ شۆڕشو ١٩و تەممووزی قۆناغێوە تاریخی گرنگش بە سەرکۊتەیی ۋېیەرنان. شۆڕشەکې جە تاریخەنە بە مەڵامەتوو هرووژمە دلېینەیی و جبەریەکاوە نەتاوانشا هێڵۊو مڎرامانی و شۆڕشو پێوەرەبیەی وەڵې وزا، بەڵام جە سەرنیشتوو ۋەرکۊتوو سوریاینە ئینە سەرکۊتەن.

١٩و تەممووزی کە جە سەرنیشتوو ۋەرکۊتوو سوریاینە پراکتیزە بۆ، جە هەمان کاتەنە پەی تەمامو سوریای عالتەرین مۆدێلو چارەسەرییا. ئازەو پشێوییەکا سووریای، فرە بە ڕۆشنی ئی حەقیقەتەیە نیشانە مڎۆ. چارەسەری کێشەکاو سوریای و پێکئاوردەی یۊبیەی تەنیا بە ئەنەیاوای نەتەوەیی دیموکراتیک، ئیدارەو ۋێڕاوەبەری دیموکراتیکی و ئازادیوازیی ژەنې کە ڕەگەزو شۆڕشو ١٩و تەممووزینې مې ئاراوە. سەپنای تاکڕەوی، مەزهەبی و نەتەوەپەرسیەکې جگە چانەی جەنگ و کۆمکوژییەکا قووڵتەر مکەراوە، پەی یەکڕیزی سوریایچ گۊرەتەرین هەڕەشێنە.

جارێوەتەر شۆڕشی تاریخی ١٩و تەممووزی جە گرڎو گەلا پیرۆز مکەرمې. ئێمە باوەڕیما پاسەن کە بە ڕێککەوتەی دیموکراتیک، ڕێکوستەبیەی و ئا ئەوەکۊشایەی کە گەلا سەرو هێڵۊو شۆڕشو ١٩و تەممووزی وەڵێش وزا، ئاشتی ژیۋای دیموکراتیک و ئا ئازادییە بەدیمې کە جە ۋەرکۊتوو مېیامینینە داوا مەکریۆ."