بەشی دووەم و دمایی هۊرسەنگنایەکا ئەنداموو کۆمیتەو ڕاوەبەری پەکەکەی موراڎ قەرەیلانی پۍ ئاژانسوو هەواڵوو فوراتی (ANF)ی پی جۆرەنە:

چی ٩ ساڵەو دماینە بە گرڎیی جەنگێوە فرە دژوار جە کوردسانەنە ڕووەشدا و جە یەرە ساڵی ۋیەردەیچەنە ئا جەنگە گەرمتەر و تنتەر بیەن. نەک هەر جە هەرێمەکاو پارێزنای مەدیاینە یاخوڎ خەتەو پانیشتوو کوردسانینە، جە سەرنیشتیچەنە جەنگ بۍ. جە ساڵەو ٢٠٢٣ێنە دژوارتەرین جەنگ جە سەرنیشتەنە بۍ. بەڵام ئانەو سەرنیشتی مەگنۆ دلۍ یاۋنەریەکاوە. دەوڵەتوو تورکیچ باسش مەکەرۆ. ئێمەیچ جە وەختوو ۋێشەنە مەژنەومێش. دماو مانگێ دووۍ مانگا مژنەومێش. ئا وەختیچە ئا هەواڵە گنۆ بەروو مژارە گەرمەکاوە. جە سەرانسەروو ئەیالەتەکا سەرنیشتینە جە دێرسیم تا گەڤەر، جە گەڤەر تا مێردین، جە مێردین تا خەرزان و سەرحەد، ئامەد، بۆتان و جە گرڎوو یاگەکانە جەنگی فرە دژوارۍ مەیانە ئارا و چا جەنگایچەنە ژمارێوە جە هەڤاڵاما گەشمەرڎۍ بیۍ. گرڎوو ئا هەڤاڵا جە کەسایەتی لەیلا سورخوێنۍ، یاشار، ئاخین موش، دڵگەش گوزەرەش، جانشیر ماکو، هێژار زۆزان، رێدور سیسەری و گرڎوو ۋێڕاگرا سەرنیشتوو کوردسانی ویرمارووە. ئینۍ گرڎ جە ساڵەو ٢٠٢٣ێنە ڕووەشا دا.

چنی ئانەیچە جە پانیشتوو کوردسانینە ماوەو یەرۍ ساڵان جەنگێوە فرە دژوار جە دەوروبەروو زاپ، ئاڤاشین، مەتیناینە مدرامانێوە گرنگ هەن. دماو ئا جەنگ و مدرامانا، وەڵۍ وستەی هەڵمەتەکا فرە گرنگۍ بێنۍ. هەڵمەتەکۍ بە چالاکیەکەو ١/١٠/٢٠٢٣ ئەنقەرەی دەسشپنەکەرد. هەڤاڵا فیدایی رۆژهات و ئەرداڵ دەسشا پنەکەرد. دماو ئانەی جە مانگەو تشرینوو دووەمینە هەڵمەتەکۍ وەڵۍ کۊتە. چا هەڵمەتێچەنە هەڤاڵا ئاندۆک و جوان، بۆتان و عەگید کۆبانێ گەشمەرڎۍ بیۍ. جە مانگەو کانوونوو یووەمیچەنە بە سەرمەشقایەتی هەڤاڵ وڵات، هەڵمەت حسێنی و مەمیانی ئا هەڵمەتۍ کۊتە ڕا و ئا هەڤاڵۍ گەشمەرڎۍ بیۍ. هەڵمەتەو مانگەو کانوونوو دووەمی بە سەرمەشقایەتی هەڤاڵ سەرخۆبوونی و رزگاری ئەنجام دریا. هەڵمەتەو شوباتیچ قارەمان و گەشمەرڎە بەقیمەتەکەیش شەڕڤان ڤارتۆ بۍ. گرڎوو ئا هەڤاڵا بە رێز و پنەزانایۆ ویرمارمێوە و یاڎشا بە زینڎەیی ڕاگێرمۍ. خەتەو ئاڎیشا گێرمێنە ۋەر. ئاڎۍ وێناو رۆحێوە کەرا. بە رۆحێوە فیدایی هەڵمەتەکێشا بەردەڕاوە. چا هەڵمەتانە تا ئیسە بە گرڎی ١٣ گەشمەرڎێما بیێنۍ. پێویس مەکەرۆ چێنە باس جە زەرەرە گیانیەکا دوژمنی کەرمۍ. واتە بە سەڎان کەسێنۍ، ئێمە وەڵتەر ئاشکراما کەردەن. زەرەرە گیانیەکۍ فرێنۍ. ژمارێوە فرە چەک و میقدارۍ فرە تەقەمەنیشا دەسش سەرەرە گیریا. ئانەی گرنگا ئانەن کە عەرشوو روومی ئێرش وەردریانە. ئانە مەعناڎارا. ئاڎۍ فرەو دەگایا و مەنتیقۍ ئێمەشا سۊچنۍ.

بەتایبەتی هەردووە چالاکیەکەو ئی دماییەو مانگەو کانوونوو دووەمی و شوباتی پی جۆرە ئەنجامدریۍ. بێ گومان ئا چالاکیۍ هۊرگیروو پەیامێوەنۍ و ئامانجێوەشا هەن. مەبەسشا ئانە نییا کە دوژمن زیاتەر کوشیۆ. تەنیا ئانە نییا. ئا چالاکیە پێرفۆرمانسوو گەریلاکا ئازاڎیی کوردسانیش نیشانەدا. گەریلا بە چ جۆرێ متاوۆ بە شارەزاییوە جمۊوە. گەریلا بە ئاردەینەیرە و کۆردینەیی بە چ رۆح و شێوازێوە متاوۆ چالاکی کۆنترۆڵکەردەی ئەنجام بڎۆ. چن زاڵا سەروو تاکتیکی و تەکنیکیرە؟ ئانەش بە گرڎ لێوە نیشانەدا. گەریلا پێرفۆرمانسوو ۋێش بە دۆس و دوژمنی نیشانەدا. جە هەمان وەختەنە راسی سەروازا کرێگرتەو تورکی، کە زەڕ بەکرێ گیریێنۍ، ئاشکرا کەرد. وەختۍ جە نزیکۆ جەنگ کەرا، ئانەی کە گنا چ ئاژێوە بە عالی وینیا. گرنگتەر چانەی دەوڵەتوو تورکی چنڎین ساڵێن تەمەنوو ئێمە پیمۆ. گرڎ وەختۍ ماچۆ ساڵێوەش مەنەن. کەسێوە بۍ نامێش سلێمان سۆیلو بۍ، جە ٢٠١٦ەنە واتش؛ تا نیسانوو ٢٠١٧ی دمایشا پنەمۍ. تەماشەو تاریخی کەردۍ، چا ڕوۆن ئێمە بەرۍ کۊتێنمۍ تا ئارۆ دەوڵەتوو تورکی پی جۆرە قسۍ کەرۆ. ساڵێوە عمرشا پۍ ئێمە نیابێرە. ئانا ئی گرڎ ساڵۍ ئی ئەرەکۊشایە بەردەواما. ئینە کۊشیای گەلێوەن. سەروو بناغێوە ملۆڕاوە. خاوەن هێز و ئیراڎەن. چی ساڵا دماییەینە جەنگی دەروونیشا زیاتەر پەرەپنەدابۍ. ئی چالاکیۍ ئا پرۆپاگەندۍ جەنگی دەروونی رژێموو فاشیستی ئاکەپە-مەهەپەیشا چنی زەمینی تەخت کەردۍ. ئا دروۍ ئاڎیشاش ئاشکرا کەردۍ. گەریلا گەرەکش بۆ متاوۆ جە هەستیارتەرین یاگۍ ئاڎیشانە، دلۍ دڵوو ئاڎیشانە جە ئەنقەرەیچەنە چالاکی کەرۆ. متاوۆ ئێر جە بارەگاو سەروازی ئاڎیشا ۋەربڎۆ و گرڎوو ئاڎیشا کە چا بێنۍ پاکتاوشا کەرۆ. هێزێوە پا جۆرەنە کە بە پسپۆری گژیۆ، متاوۆ گرڎ چێوۍ کۆنترۆل کەرۆ. بلۆ چ شارێوە، بەرەو چ ئامانجێوە بلۆ، دۆش ۋنە و ئەنجام بەدەسبارۆ. ئا هێزەما هەن و بڕواما بە هێزوو ۋێما هەن. بەتایبەتیچ چی ساڵا ۋیەردەینە یاوان بە ئاستێوە. واتە هەم پسپۆڕی ۋێش بەقوەتتەر کەردەن، هەم شارەزایی ۋێش، هەمیچ رۆحی گیانبازی ئاپۆیی بەرزتەر بیەن. واتە چی ساڵانە جە لاو هەڤاڵا ژەنۍ و هەڤاڵا کوڕاوە رۆحی ئاپۆیی، گیانبازی فرە گەشەش کەردەن. گرڎ پێسە رۆژهاتی و ئەرداڵی متاوا چالاکی کەرا.

بەرزی رۆحی گیانبازی و وەڵێکۊتەی شارەزایی، باڵادەسی تەکنیک و تاکتیکی خوڵقنەرانە پێرفۆرمانسوو هێزەکا ئێمەشا بەقوەتتەر کەردەن. ئانە پۍ ئێمە زیاتەر ڕۊشن بیۆ. ئێمە مزانمۍ کە ئێمە چنی بیاومۍ ئەنجام. بە چ تێزێوە بەرەو سەرکۊتەی بلمۍ. چا ڕووانگۆ ئێمە دڵنیێنمۍ. تێزوو جەنگوو ئێمە ڕۊسن بیۆ. جە ۋەرا ۋەروو تەکنەلۆجیاینە ئێمە چنی ئیراڎەو ئینسانی، بەکاربارمۍ. ئێمە چنی جە ۋەرا ۋەروو تەکنەلۆجیاینە بەکارش بارمۍ. بە چ رێبازێوە، سەرزەمینوو، چێر زەمین، جە ئاسمان و جە زەمین. چا خاڵانە گەریلاکاو ئازاڎیی کوردسانی یاوۍ بە ئاستێوە. ئێمە جە گرڎ یاگێنە زیاتەر جە بارەو سەرکۊتەیۆ دڵنیێنمۍ و بڕواما هەنە. پا رێبازۆ، سەروو بناغەو ئی تێزەیە ئێمە ئەنجام بەدەس مارمۍ. بێگومان مشۊم زیاتەر خوڵقنەری بەرەو وەڵۍ بلۆ و حەرپاسە خەتەی راسە گێرمێنە ۋەر. سەروو خەتەو دڵنیایی مسۆگەرۍ با. ئەگەر ئانەی کەرمۍ گەریلاکاو ئازاڎیی کوردسانی جە سەڎەو ٢١ینە ئینسان بتاوۆ مێڎانە ئازاڎەکا پارێزنۆ. چنی بتاوۆ جە ۋەرا ۋەروو تەکنەلۆجیاو سەردەمینە پی جۆرە جمۊوە و ئیرادەو ۋێش سەروو نەیارەکاشەرە سەپنۊنە و سەرکۊتە بۆ. ئیتر ڕاو ئانەی ڕۊشن بیەنۆ. ئێمە ماچمۍ سەروو ئا خاڵا وەڵۍ کۊتەی گەریلاکاو ئازاڎیی کوردسانی، قارەمانی و نەکۊتەی گەریلایش جە سەردەمی تازەیچەنە مسۆگەر کەرد.

ماوەو سەڎ ساڵان هجوومە ئەرەگیریەکۍ ئینۍ ئارانە. هجوومی جیاجیا ڕووەشادا. بە تایبەتی تەکنەلۆجیاو فڕۆکەی بێ فڕۆکەوانی هجومکەری ئامۍ ئاراوە و دماو ئانەی واتشا 'تەمەنوو پەکەکەی ساڵێوەش مەنەن'. واچێنۍ گوایە پا تەکنەلۆجیایە میاوا ئەنجام. ناستشا کەس هەناسە بڎۆ. بڕواشا پانەی بۍ و پڕۆپاگەندە کەرێنۍ. چی ساڵا دماییەینە گەریلایچ ئانەش بە بنەماگرت کە دژوو ئا تەکنەلۆجیایەیچ ڕا چارە هەن. گەریلا ڕا چارەش هەن. جە ڕاو وەڵۍ وستەی ئا را چارەیۆ ئەنجامشا بەدەسئارد. سەروو ئا بنەمایۍ ئێمە زیاتەر مسۆگەرۍ بیەیمۍ و زیاتەر پا گیرینمۍ کە ئێمە مزانمۍ ئامانجما چێشا و ئێمە ئامانجەکەیما پێکمۍ.

ئی دەوڵەتەو تورکی جە ئەنجاموو هامپەیمانێتیێوە پێکئامان. ئا هامپەیمانیە جە بەینوو مەهەپە و ئەرگەنەکۆنی نەژاڎپەرستی و ئاکەپەینە ئامان ئاراوە. هامپەیمانیەکە ئامانجێوەش هەن. ئامانجەکەش چێشا؟ وەڵێکۊتەی و گەشەکەردەی گەلوو کوردی جە ۋەرکەوتوو دلێڕاسەینە بە مەترسی پۍ سەروو ۋێش منیۆرە. مشۊم ئا تەرسۍ نازۆ. پۍ ئانەیچ پێویسا پەکەکەی پاکتاو کەرۆ. دەسکۊتەکا گەلوو کوردی و قەوارەو ئیسەی دلێنەبەرۆ. بە شێوازێوە ئەرەگیرش کەرۆ و سەروو ئا بنەمایا سازکریان. ماوەی نۆ ساڵان پەی ئانەی جە دژوو ئێمە جەنگ کەرا. گەرەکشا بێ فرە زوو بیاوا بە ئەنجام، بەڵام سەرۍ نەکۆتۍ. دما جار گەرەکشا بۍ جە ساڵەو ٢٠٢٣ێنە بیاوا ئەنجام و سەرکۊتەی ۋێشا ئەرەیاۋنا. پۍ چی؟ ۋەروو ئانەی ٢٠٢٣ سەڎ ساڵەو ئەرەیاۋنای کۆماروو تورکیای و جە هەمان وەختەنە سەڎ ساڵەو پەیماننامەو لۆزانی بۍ. گەرەکشا بۍ چا ساڵێنە سەرکۊتەی ۋێشا ئەرەیاۋنا، بەڵام نەتاواشا. ئانە حەقەتینەکەن. واتشا 'ئێمە جە یەرۍ مانگێنە زاپی و دەوروبەروو زاپی چارەسەر کەرمۍ، ئەرەگیرش کەرمۍ و تەماموو هەرێمەکا مێدیای دلێنە بەرمۍ'. یەرۍ مانگۍ ۋێڕاگریشا کەرد. بەڵام ماوەو یەرۍ ساڵان هەڵای دەورووبەروو زاپیرە خەریکێنۍ. یاۋێنۍ بە بنبەس. گەرەکشانە جارێوەتەر پلانەی تازۍ مجارە. ۋەروو ئانەی سیستموو تورکیایچ چێروو ئا جەنگەینە فرە لاواز بیەن، بەتایبەتیچ جە روو ئابووریوە فرە لاواز بیەن. ۋەروو ئانەی گرڎوو داهات و ئایندەو ۋێش چا مەجالەنە سەرف کەرۆ. سیاسەت، دیپلۆماسی و گرڎ چێوۍ بەپاو دژایەتی کوردی ڕاوەبەر کەرۆ. واتە بە شێوێوە ئاسودە مەجماوە، گرڎ وەختۍ بە شێوۍ نائاسایی جماوە ۋەروو ئانەیچ گەرەکشانە زوو دمایش پنە بارا. واتە دیشا کە مەتاوا درێژش کەراوە. ئیسە بە پاو ئانەی جماوە، بەڵام چێوۍ هەن ئاڎیچ ئانەنە کە ۋێشا تەنیا دەرەقەتوو گەریلای نمەیا. بەڵام تەماشەکەردۍ جە شوباتوو ٢٠٢١ینە و وەڵۍ ئانەیچەنە کاربەدەسا دەوڵەتوو تورکی ئەرەگیری لووۍ بەغڎا و دماتەریچ لووۍ هەولێر. شاندێوە گەورەیچ بۍ. چا دیڎارایچەنە بە ۋەرپەرسا بەغڎای و هەولێریشا وات، ئەگەر شمەیچ چنیما بەشدارۍ بیدۍ ، عال بۆ، ئەگەر نەبیدیچ ئێمە متاومۍ ۋێما کەرمێش. تەکنەلۆجیا، سەرواز و سوپاکێما بەشوو ئانەی کەرۆ کە ئێمە پەکەکەی جە گارەنە تەمام کەرمۍ و ئا مەنتیقا پاککەرمێوە. بەڵام جە روو هەواڵگرییوە پێویسا کە شمە هامکاری ئێمە کەردۍ. جە روو سیاسیچۆ شمە ئانەی پەسەنڎ کەردۍ و دژوو ئێمە مەمردێوە. ئاڎێچ داواکاری دەوڵەتوو تورکی ئەرەگیریشا قەبوڵ کەرد. ۋێش جە ۋێشەنە چنی ئاڎیشا بێنۍ. شمەیچ مزاندۍ ئا سەروازۍ ئا وەختە ئامۍ گارە جە بةعشیقۆ ئامۍ بێنۍ، جە تورکیاوە نامێبێنۍ. ئانەیچ بە مەعناو ئانەینە ڕاوەبەرایەتی بەغڎای و هەولێری ئانەشا پەسەنڎ کەردەبۍ. واتە دەوڵەتوو تورکی بڕواش بە ۋێش بۍ کە بەتەنیا ۋێش پەکەکەی شکس مڎۆ. بەڵام ئیسە دماو یەرۍ ساڵا جە جەنگی یاوۍ ئا قەناعەتەی کە بەتەنیا ۋێشا دەرەقەتوو پەکەکەی نمەیا. ئیسەیچ شۊنەو هامپەیمانیرە گێڵۆ. شۊنەو ئا کەسارە گێڵا کە چنی ئاڎیشا متاوا جە دژوو گەریلاکا جەنگ کەرا. ماچا کە پێویسا شمەیچ چنیما بەشدارۍ بیدۍ. پۍ ئانەیچ داواو هامکاری جە ناتۆی کەرۆ. زیاتەر داواو چەکی و پاڵپەشتی کەرۆ. جە هەمان وەختەنە داوا جە عێراقیچ کەرۆ کە بە سەروازەکاشاوە بەشداریشا چنی کەرا. واتە گەرەکشا هێزێوە هامبەش ساز کەرۆ. داوا جە پەدەکەیچ کەرۆ کە راسەوخۆ بەشداری جە جەنگینە کەرۆ. دیدارەکۍ ئی دماییەیشا پۍ ئانەینە. راسا دیڎارۍ ئەنجام دریۍ و لووۍ ئەمریکایچ. ئەنجاموو ئا دیداراشا جە بەینوو ۋێشانە تاوتوێ کەردۍ. دیارا کە دیسان بە شاندۍ گەورەتەرۆ مەیا بەغڎا و هەولێر، پۍ ئانەی داواکارییەکاشا واوەی کەراوە. بەپاو ئانەی دیارە کە تا ئیسە بە تەمامی نەیاوێنۍ بە ئامانجەکاشا. چی مژارەنە فرە پا گیری کەرا. جە ئەرەیاۋناکایچۆ دیما کە شاندێوە سەروازی و هەواڵگریچشا پۍ ئانەی پرسوو سنوورەکا تاوتوێ کەرا، دیدارشا ئەنجامدا و دیدارەکێشا بەردەوامێنۍ. تورکیا فرە قورساییش وستەن سەروو ئانەی بڕۍ هێزۍ تەرێچ چنی ئاڎیشا بەشداری جە جەنگەنە جە دژوو ئێمە کەرا. واتە حۊڵەکۍ تورکیای پۍ ئانەینۍ و مەڵامەتوو ئا دیڎارایچە ئانەن. ئیسە جە بەینوو پەدەکەی و تورکیاینە فرەو وەختی دیڎارۍ ئامێنۍ ئاراوە. بەڵام پەدەکە جە بارەو ئا دیڎاراوە ئەرەیاۋنای مەڎۆ. ئانەی مشارۊوە. بەڵام تورکیا بەین بەین ئەرەیاۋنای مڎۆ.

جیا چانەیچە زانیاریی هەواڵگێریما هەن، چا دیدارانە ئانە بارەشۆ زانیارییما هەن. بە پاو زانیارییەکاما پەدەکە بەشدارێ بیێنێ بو جەنگ دژوو ئێمە ڕەت نمەکەراوە. بەڵام ماچۆ بەتەنیا بەشداری نمەکەروون، پێویسا یەنەکەچ بەشدار بۆ یا عێراق. ئا داواکاریێشە جە تورکیایی بیێنێ. دیارا کە پەدەکە گەرەکش نییا، بە نامێ بە حزبەکەیشۆ پاسە ڕاستەوخۆ بەشداریی جەنگی بکەرۆن. گەرەکشانە چێروو عەلەمەو عێراقینە بەشداریی ئا جەنگییە کەرا. بە پاو ئا زانیارییا کەوتێنێ دەسما بەرگنۆ. وێش جە وێشنە دیدارەکاو دەوڵەتوو تورکی چەنی یەنەکەی دیاریێنێ. یەنەکە جوابوو داواکارییەکاش دێوە. هاکان فیدان، یاشار گولەر و ئەردۆغانیچ هەڕەشێ وەنەو یەنەکەی کەرا. چی دماییوە سەرۆکوو یەنەکەی بافڵ تاڵەبانییچ دژوو ئا هەڕەشا جە ڕاو ئەرەیاونایۆ هەڵوێستوو وێش نیشانە دا. من وێم بافڵی نمەسناسوو نەدیەنم، بەڵام فرەو جارا مام جەلالم دیەن. متاوو بواچوو ڕەفێقێ بێنـمێ، ئا قسێ کە کەردێنێش و ئەرەیاونایەکاوە ژنیێنێم فرە ئاسایێ و نەتەوەیێ بێنێ. چێش ماچۆ؟ چی ئێمە دژوو پارتێوە کوردی گژیەیمێ؟ ئێمە چەنی هیچ پارتێوە کوردی مەگژیەیمێ. مەگەر چانەیە ئاساییتەر چێش هەن. پێویسا گرد کوردێوە ئانەیە بواچۆ و پارتە کوردییەکێچ ئانەیە بواچان. یانێ ئا هەڵوێستەو سەرۆکوو یەنەکەی  وەراوەروو ئا هەڕەشا بێگومان یەنەکەی گەورە کەرا. یانێ ئا هەڵوێستە مانێوە  نەتەوەییەش هەنە. بافڵ یەنەکەی ئایندەنە قەوەتتەر مکەرۆ. ئانە ئاشکران. بەڕێز مام جەلال تاڵەبانییچ  وەختوو وێش تورکیایش واتەبێ، هیچ بە تورکیای مەدەیمێ، ئێمە چەنیلێوەیچما مەدەیمێ بە تورکیای. دیارا کوڕەکەیچش ئینا سەروو ڕاو تاتەیشۆ، ئینە هەڵوێستێوە نەتەوەیین. ئانە نەک هەر پێوەس بە ئێمە، ئادێ وێشا سیاسەت پا هەڵوێستا ڕۆشن کەراوە، کە پێویسا گرد کوردێوە چانە بۆ.

چیوێ تەری سەرنجکێش ئانەن، کە چی ماواو دمایینە کاربەدەساو تورکیای ماچا ئێمە چەنی پەدەکەی هامڕێنمێ. یانێ گەرەکشا پەدەکە زیاتەر هامکارییشا بکەرۆ. ئایا ئا هامکارییە زیاتەرە چێشا؟  پەی نموونەی سیخوڕیی کەرۆ. وەڵتەرێ تەنیا دەزگاو پارێزنای ئانەیە کەرێ. ماوەو دوویساڵان ئانەشا وافرتەر کەرڎەن، ئیتر ئاسایشیچ ئانەیە مکەرۆ، بڕێ هێزێ تایبەتیچشا پێسەو پێشمەرگەی تایبەتی و زێرەڤانیچ ئانەیە مکەرانێ. وەختێ موینا گەریلا یاگێوەرە ویەرۆ یا کامێرەکێشا مویناش، یەکسەر و دەمودەس هجوومی عاسمانیی تورکیای کریۆ، یانێڕوانە ئینەی وینمێ و کەس نمەتاوۆ بواچۆ بوختانی کەردێ و هەرکەس بڕوا مەکەرۆ با بێ و دوێ ڕوێ جەنیما مەنۆوە و  بە چەمێ وێش بوینۆش.

 

هجوومەکا پێسەو وستەیرەی ڕێ، ئابڵوقە و هەوڵەکاو تەوقدای ئینێ ئارانە. وختێ کەسێوەیچ دووێ فەردێ هاردیما پەی مارۆ گێراش و وزاش زیندانەکاو دهۆکی و هەولێری. ئێمە مزانمێ ژمارەو کورداو بادینانی، کە گیریێنێ چندەنێ. ئێمە مزانمێ ئانێ کە گریا چنی ئەشکەنجە مدریا. ئینە مایێ شەرمەزاریینە. نمەبۆ دلێ پارتە کوردییەکانە ئەشکەنجە بۆ. ڕەنگا تۆ دژبەر بی، بەڵام ئانەیچ کەسێوە سیاسیین. تۆ گێرتەنت، تۆ متاوی گێریش و بواچی یاساکێما پاشێلە کریێنە. بەڵام چی ئەشکەنجەش مدەی؟  ئێمە مزانمێ کە ئا هامرێما گێرتێنێشا ئەشکەنجەشا ڕاو ئەشکەنجەیۆ گەرەکشانە زانیارییی هەواڵگێری بەدەس بارا. ئینە چی پێسنەن؟ کوردستاننە مەلا مسەفا بارزانی داراو دەورێوە گرنگین. گرنگتەرین قسێ مەلا مسەفا بارزانی ئانێنە واتەبێش؛ 'ئانە کە سیخوڕیی پەی  دوژمنی بکەرۆ، چەک پەی دوژمنی ورگێرۆ، جاشا'. پەنەش واتێنێ جاشێ. ئەی ئینە چەنی بۆ؟ شەرمە، پێویسا ئا چیوی ڕووە نەدانێ ئیساتێ مشۆم ئا چێوێ بزانیا. یانێ من چێگەنە گردوو چێوەکا دژوو پەدەکەی مزانوو،  بەڵام نمەواچووشا. بڕێ چیوێ هەنێ ئەگەر ئینسان بواچۆشا، ڕا کەرۆوە پەی ئانەیە کە پەتەو پەیوەندیی بەینیما بپڕچیۆن، گەرەکما نییەن ئا پەتەو پەیوەندییە بپڕچنمێن، پەوکای باسوو گرد چێوێوە نمەکەرمێن و گرد چێوێچ مزانمێ. هاگادارێ گردوو چیوەکانمێ، ئێمە چێ خەبات کەرمێ، یانێ ئانە کە ئیسە چێڕووە مدۆ بەکوڵی دەوڵەتوو تورکی پنەشا مواچۆ چا کردەوانە زیاتەر هامکارییما بکەردێ. هامکاریی زیاتەر بە ماناو جەنگینە. زانیارییما لا یاوان کە ئەمرەشا کەردێنە تا ئاخروو مانگەو ئاداری هێزەکاشا ئامادێ بکەرا. بکەن. ئینە چێوێوە خاس نییا. گەرەکما گەلەکەما بزانۆن، بەتایبەتی گەلەکەما بادیناننە، کە گرد چیوێ وەرەچەماشاوە ڕووە مدۆ، و چەمدارێنمێ و کەسانێوە فیدایینمێ و کوڕ و کناچەما زەڕ ورمەگێرا  و تەنیا پەی پارێزنای خاکی مەبارەکوو کوردسانی پەی ئامانجی مەبارەکی وێشا بەخت کەرا، گەرەکما جەنگوو واڵە-براکوشی بکەرمێ. ئێمە پەی جەنگوو دژوو پەروەردێ کریێنمێ و پیشا جممێوە. پەوکای پێویسا گەلەکەما بادیناننە، تەماموو پانیشتوو کوردستانینە و سەرتاسەروو کوردستانینە ئانەیە بزانا. گەرەکما نیا کورد چەنی کوردی گژیا. باوڕتا بۆ هەبێت تا ئیساتێ چند جارێ ئەگەر ڕاما جە هامرایاما نەگێرتێ جەنگوو دلێ ساز بێ. دەبوو. ئێساتێ ئێمە ئینایمێ سەدەو ٢١ینە. چی سەدەنە پیسەو کوردی بەیمێ و دەیمی یۆترینی، ئانە بۆ بە دماکەوتەیی و پەیما جەنگێوە گەورەن. یانێ پەی سیاسەتوو کوردا شەرمەزاریی گەورە ئینەن. گردوو جیهانی پەنەما خوۆ و ماچا قسێ تورکەکا ڕاسەنە. تورکێ ماچا ئانێ نەتەوە نییەنێ، خێڵنێ. پەی بەرژەوەندیی وێشا وەرێ بیێنێنە یۆترینی، پاسە ماچا، پەوکای ئێمەیچ گەرەکما نیا بیاومێ ئا قۆناغە.

دەوڵەتوو تورکی گەرەکشا پەدەکەی و پەکەکەی بدۆ جەنگ. خاس کاربەدەساو  تورکی مشناسمێ، چندین ساڵێن خاس ئادیشا و لایەنی دەروونییشا مشناسمێ. ئادێ گەرەکشانە ئێمەی کوردی دلێنە بەرا. یانێ نەک هەر پەکەکەی دلێنە بەرا. یانێ گەرەکشانە تەماموو کوردی بەرا دلێنە. قەوارە و کیانوو کوردا دلێنە بەرا. ئامانجشا ئانەن، پەی نموونەی ئیساتێ گەرەکشانە بەیا و گارەی گێرا. گارە یاگێوە ستراتیژیییەنە. بناروو گارەی بڕێ ڕێ بەینوو هەولێر و دهۆکیش پۆرەرە ویەرا. گرد کەس و گەلەکەیچما مزانا. گەرەکشانە پێسە پانیشتوو کوردستانینە یاگێ قایم بکەرا. دماییچ وێشا خزنا کەرکوک. ئیساتێ تورکمانەکاو کەرکوکی چۆشاوە نزیکێنێ پەروەردەشا مکەرۆ و ئامادێشا مکەرۆ. بدیەیدێ پەی نموونەی ئایر یاگێوە هەولێرینە کەوتۆ. کێ گێرتش گەردەن؟ رێکوزیاێوە تورکمان، شۆڤینیستی، تورانچی سەر بە میتی بێ، کە پەروەردێش کەردێبێنێ. بەڵام ئایا بە بێ میتی ئا یاگێشا سۆچنا؟ کەرکوکنە بڕێ یاگێ سۆتێ، ئینسان بە تاکتیکی ئاسان مامەڵە نەکەرۆ، پێویسا بە شێوەی ستراتیژی بوینۆ. ئا دەوڵەتەو تورک، مەژگوو مەهەپە، ئەرگەنەکۆن و ئاکەپەین تا قەوارەو کوردا بەرا دلێنە. یانێ ئەقڵیەتشا پیسنەن ئامانجشا و سیاسەتێوە بنچینەیی ئەرەوزیاشا هەن ئینە شاریاوەن، پاسە گەرەکشانە بیاوا ئەنجام.

ئێمە ماچمێ با پاسە نەکەرا، کاربەدەساو پەدەکەیچ ئانەی موینا، بڕیو ستراتیژیانە مامەڵە بکەرا. ئاندە تاکتیکی نزیکێ نەباوە. تورک ماچۆ هامکارییەکاتانە یەک هەنگام زیاتەر بەیدێ وەڵێوە. یەک هەنگامتەر پەی وەڵێ ماناو جەنگینە وەختێ جەنگ بۆ چێش ڕووە مدۆ؟ یاوا ئانەیە ئێمە پێسەو جمیەری داوا وەنەو سەرجەموو گەلوو کوردستانی، دۆستاو گەلوو کوردستانی مکەرمێ وەنەو سەرجەموو ئاپۆچییەکا. ماچمێ ئاپۆییەکاو کوردستانی گر یاگێوە کوردستانیوە هجووم بکەرا.  جەنگ ڕووە بدۆ ئینەش چەنە گنۆوە. پەی نموونەی هێزەکاو پەدەکەی چەنی تورکەکا بلا مەتینا و هجووم کەرا سەرما و بەیا گارە و هەمان چێو کەرا، ئا وەخت ئێمەیچ ئانەیە مکەرمێ، یانێ جە ئێمە ویەرۆ، مشۆم گەلەکەما ئینەیە بزانۆ. ڕەنگای گرد چێوێ دلێنە بشۆ، هەڕەشێ وەنەو کەسی نمەکەروو بەڵام مشۆم گرد لایێ ئانەیە بزانا. فیداییێما هەنێ و متاومێ وێما بیاونمێ گرد لێوە، هێزوو تەکنەلۆژیچما هەن میاومێ گرد شارێ. نمەبۆ پێسە بەخراپی فکرێ جە یۆی بکەرمێوە، بەتایبەتی یانەو بارزانی، چی خاڵانە وەرپەرسانە مامەڵە بکەرا. ئەگەر ئانە ڕووە بدۆ قەوارە و کیانوو کوردایچ نمەمەنۆوە. تورک ئینەش گەرەکا، دۆخەکە چێوە گرنگ و تەرسناکا. پەوکای داوا مکەرمێ گرد لایێ خاوەنداری وەنەو وەرپەرسیارییشا بکەران.

وەڵێ گرد کەسینە هونەرمەندێ و ڕۆشنویرێ و کەسێ وەڵاتپارێزنێ و نیشتمانپەروەرێ دژش مرداوە، پەی ئانەیچە جارێوە تەر داوا نمەکەرمێن. بەڵام ئینە پەیوەندییش بە گرد لاێوە هەن.  ئینە کێشەو بەینوو پارت و حزبەکا نییا، ئینە کێشێوە نەتەوەیین. ئیساتێ گرد لایێوە ویرێ چانەی کەراوە، کە  وەرکەوتوو دلێراسەینە دیزاینی دمایین چەنین بۆ. سوریا و عێراق بە چە نۆعێوە بانێ. تورک ماچا هەڵای کە هیچ ڕووەش نەدێنە وازشا چەنە ناروونە و بوزووشا جێروو کۆنترۆڵوو وێمۆ. عێراق و سوریای بوزوو چێروو کۆنتڕۆڵوو وێمەوە.  میساقی میللیی گێرونە. تورک پێسە جووڵیۆوە. پەی ئینەیچە داواو وەرپەرسیی جە گرد لاێوە کەرمێ. وێش پەی وێش چیولای ئیتر جەنگا.  دمایی بە هامکارییەکاتا چەنی تورکەکا باردێ. بە نامێ  پەروەردەی هەواڵگێرییوە سیخوڕی مەکەردێ. شەرما. ئا ئەقڵیەتە کە ڕاو تورکەکاوە ئێمە دلێنە بەردێ، ڕاس نییا. ئێمە پێسەو پەکەکەی دلێ  دلێنە نمەشمێ. ئێمە جمیەرێوی ئایدۆلۆژیکینمێ، ملوێنان هەوادارێما هەنێ و بە هەزاران کادرێچ. پەکەکە گەورەن،  وەڵتەر باسوو ئا کارەساتەیمە کەردەبێ. دیسان ماچووشۆ جەنگوو دلێ پەی کوردەکا کارەساتا. با کەس نەواچۆ ئێمە وێما ڕزگار بکەرمێ، نمەزانوو پەشتیمان هەنە. گەورەتەرین پەشتەو گرد کەسی گەلا. پەشتیما بە گەلی قایمەنە و بڕواما بە گەلەکەیما هەنە و ئێمە هەرمانەکاما بە یارای و پاگێرتەیرەوە مکەرمێ. حەرچێوێچ ڕووە بدۆ ئێمە مکەرمێش. هیچ چێوێوە چانە جەدەس نمەدەیمێ. چا ڕووەوە ئێمە بڕواما بە وێما هەنە. با کەس نیگەرانوو ئانەیە نەبۆ.

ئینایمێ سەروبەندوو نەورۆزینە. نەورۆز بە ڕۆحێوە نەتەوەییوە گەشتەر بۆ. سەروو بناغەو ڕۆحی نەتەوەیی نەورۆزیوە با بەهەستیاری نەتەوەییوە بژیومێ، مشۆم یۆبییەی نەتەوەیی بوزیۆ وەڵێ. گەلە بەنرخەکەما، مشۆم بزانا کە ئێمە لاو وێماوە هەوڵەکاما وزمێ هەرمانە. بەڵام گرد چیوێ تەنیا بە ئێمە نمەکریۆ وەروو ئانەیە ئانێ وەراوەریما گرد وەخت زیاتەر مەیا وەڵێوە. تا مێ زیاتەر ڕا وزارە. لە دەوروبەرنە کامێرە و گرد چێوشا نیانرە دەی ویژدانتا بۆ ویژدان. ئێمە و تورکەکێ دەسەویەخە جەنگ کەرمێ، مەگەر چێشما جە تورکەکا کەمتەرا، شمە هاوکاریشا کەردێ؟ مەگەر پاسە نییا، کە بە ملیۆن سەروازێشا هەنێ، تانکێشا هەنێ، تۆپێ، فڕۆکێ، هەلیکۆپتەرێ و گرد چێوێشا هەن. ئادێ هەزاراننێ و ئێمە سەدان. ئێمە پێوە ئینایمێ جەنگنە، ئەگەر کەسێوە ویژدانش بۆ مشۆم هامکاروو ئێمە بۆ، مەگەر پاسە نیا؟ ئێمە گردما کوردێنمێ، ئێمە گردوو خاکوو کوردی مپارێزنمێ و هەمیچ ئا لایەنێ کە هجووم کەرا سەرما ئینایمێ گەمارۆنە.

فرەفرە تاسیەونە و سەرەم سڕ مەنۆ دەبن ئا فەرمانداێ چە فەرماندێوەنێ، پاسەوانێ سەروزاو تورکیاینێ. تا دەنگما نەیاوۆ بە تورکەکا، کەمینەما پەی منیا. تا ئیساتێ چند چالاکیێوە ئێمەشا پاسە جەبار بەردێنێ، ئەگەر پاڵپەشتییەکاو پەدەکەی نەبیێنێ بەرێما کەردێبێنێ. با وێشا بوزا لاێوە و بدیا. ئێمە داواو ئانەیە مکەرمێ. نمەواچمێ هامکاریما بکەرا. لاێوە مردا، بزانا کێ دەرەقەتوو کێ مێ، گرد چێو ئاشکرا بۆ. مەگەر دەوڵەتوو تورکی گرد چێوێوەش نییا؟ ئێمەیچ دڵما هەن، بڕوامان هەنە، باوڕ، وەشسیای وەڵاتیما هەن. با بەیا، ئەگەرتاواشا دلێنە بەراما مەبارەکشا بۆ. بەڵام هامکارییشا مکەرا، زانیاریی هەواڵگێرییشا مدا پەنە و ڕاشا وەنە مگێرا. ئینە نمەبۆ، جە ڕووەو ویژدانیوە نمەبۆ، هەم دادپەروەرانەیچ نیا. هیچ چێوێ نییا. وەختێو ئینسان تەماشەو ئەرەیاوناکەیشا مکەرۆ، بە شەو و ڕۆ باسوو کوردایەتی مکەرانێ، بەڵام بە کردەوە پاسە نییا. ئینە دژییۆیین. پەوکای هومێدەوارێنمێ کە ئا دژیۆیی و ناکۆکیییە کە هەن نەمەنۆ. هامکاری چەنی دەوڵەتوو تورکی تەرسئاوەرا. تا مێ تەرسئاوەرتەر بۆ. پەوکایچ گەرەکمابێ  گرد کەسی هۆشیار بکەرمێوە. ئێمە چەمەڕوانێنمێ، کە گرد لایێ وەرپەرسانە مامەڵە بکەران. تا ئیساتێ دیدارەکاو بەینوو دەوڵەتوو تورکی و دەوڵەوو عێراقینە بەرکەوتەن، کە دەوڵەتوو عێراقی بڕێو وەعدێش دێنێ پنە. بەڵام بە پاو قسەکاشا قبووڵشا نەکەردەن. بەتەمامی ڕێکێ نەکەوتێنێ. دیارا حکومەتوو عێراقی بە سەرۆکایەتیی سەرۆکوەزیران سودانیی، تا ڕاددێوە بارەو دۆخەکەیۆ بێئاگان.  جە ڕووەو ستراتیژی و سیاسییوە کەموکوڵی هەن، گێرا خاوی و بێئەزموونی بۆ، چەنی؟ ئیساتێ دەوڵەتوو تورکی، فرەو یاگاو پانیشتوو کوردستانیش گێرتێنێ. نزیکەو ٥٠ هەزار سەروازاو تورکی ئینێ خاکوو عێراقینە و وەختوو وێشنە سەرۆکوەزیرانوو عێراقی حەیدەر عەبادی داواش وەنەو دەوڵەتوو تورکی کەردە خاکەکەشانە بلا بەرۆ.  تورکێ نەلێ بەرۆ و ژمارەو هێزەکاشا دووەقاتێ کەردێوە و دمایی دووێ ژەنەڕاڵێ عێراقیێشا هەرێموو برادۆستینە گەشمەردێ کەردێ. ئینە جە وەختێوەنە ئشیا سیاسەتێوە هەمیشەیی بیێ.

ئیساتێ بدیەیدێ، لوای سەروازا پەی وای و ئا سەروازێ ئیساتێ ئینێ هەفتانیننە، مەتینا کە چێروو ناومێ پاسەواناو سنووریوە بنێشا وستێنە، پێسەو پاسەوانیکەردەی ئەرەگیرکەردەی تورکیاین و ڕەوایەتییش بە ئەرەگیری مدۆ. یانێ تورکیا واگەش گێرتەن و عێراقیچ سەروازەکاش پەی وای مکیانۆ و  پاڵشانە، چێروو کاریگەرییشانە بە ئەمرەشا بنێ وزا. ئینە قبووڵکەردەی ئەرەگیریین. پێویس بێ، کە حکومەتوو عێراقی واتەبیێش کە پێویسا شمە کێشیەیدێوە و ئێمە مەیمێ یاگەکێتا. وەلێ ئیساتێ بە فەرمانەو تورکیای ملا و مۆڵەتشا چنە ورگێرا. .. داواو ڕاپەنەدایشا وەنە کەرا. تورکیا چی دمایۆ  وەڵێ دووێ حەفتانە ئا سەروازێشە کە لوێنێ ڕەشپەرەخی مردنا.  دەرەو ماریکینە مردنێش، چا دووێ یەرێ یانێ هەنێ پاڵوو ڕێکێنە، وەڵترێ چا یاگێ واردەی بێ، ئیساتێ چاگە پێسە دیلی گیریێنێ. یاگە ستراتیژییەکێ  گرد ئینێ دەسوو تورکەکاوە، چەمچۆ و بڕێ یاگانە بنێ وزا. ئینە بە چە مانێوەن؟ چە ئیسفادیوەش پەی عێراقی و گەلوو عێراقی هەن؟ ئینە بەس ڕەوایەتیداین بە داگیرکەریی تورکیای. دەوڵەتوو تورکی  بڕێ یاگێنە منیۆشارە کە پێویسش نییا. دەوڵەتوو تورکی پێسە هێزوو ئادیشا و پەدەکەی بەکارمارۆ. پێسەو هێزی شۆنکەوتەو وێش موینۆشا. یاگێ ناپێویسە و ناستراتیژیکەو ئادیشاش دلێنە یاگێ گێرۆ. نمەتاوا هیچ هەنگامێوە بنیا. هیچ سەربەوێبییەێوەشا نمەمەنۆ، پێسە وێشا وزا چێروو خزمەتوو تورکیایۆ. دەوڵەتوو تورکی بە فرتوفێڵ خاکوو عێراقی و پانیشتوو کوردستانی ئەرەگیر کەرۆ. ئامانجوو تورکیای ئینەنە.  پەی نموونەی چی باشیکنە نەلا بەرۆ؟ ئیساتێ گەرەکیچشا گارەی گێرۆ و بە باشیکیوە بەسۆشۆ و دمایی پەشتیبە گارەی بەسۆ و باشیکۆ بەرەو موسڵدا بلۆ. سیاسەتوو دەوڵەتوو تورکی سیاسەتوو ئەرەگیریین. ئاوی دژوو عێراقی پێسەو هەڕەشا بەکارمارۆ. ماچۆ بەسرە تا سنوورەکاو تورکیای ڕا وەش مکەروو، ئابووریی عێراقی گەشە کەرۆ و ئاوی وەرە مدەووە. حکوومەتوو عێراقیچ قبووڵش مکەرۆ. چی چوارچوەنە دیدار کەرۆ. ئیساتێ ڕاسا، چەمەڕایکریان ئاوی وەرە بداوە و ڕایچ وەشە کەرا. بەڵام گەرەکشانە ئیرادەیت بماڕا، خاکەکەیت ئەرەگیر کەرانێ. ستراتیژوو تورکیای- عێراقی موزۆ چێروو دەساو وێشۆ. پەیوەندییەکاو پەدەکەی و پارتە سوننەکێ سەرووو ئا ئامانجەینێ. گەرەکشانە حکومەتیچ سەرقاڵ بکەران.

باسوو ژووری هامبەشی مکریۆ، یا جموجۆڵی هامبەش، ئامانجەکەش ئانەنە، کە گەرەکشا وێش قایم بکەرۆ و بنێ وزۆ و پێسە ماچۆ شمەیچ هەندێ. پیسە مەشغووڵێشا مکەرۆ، دلێ وێچشانە قسێش بارەوە مکەرا. ساعیبێ ئیرادەی نییەنێ. دەوڵەتوو تورکیای دلێ وێشنە پێسە مواچۆ، هەڵوێسوو عێراقی ئاخرۆ بارەشۆ قسێ مکەروو، بارەشۆ بواچوو تائیساتێ پێسە ناڕۆشنا. بەڵام تا ئیساتێ بە تورکیایش نەواتەن. پێسە واچی هاگادارێ نیازەکاو دەوڵەتوو تورکی نییەنێ. پاسە مامەڵە کەرا. گەرەکشانە ئەرەگیریی خاکوو کوردستانی بە ڕەوا بوینا، ئانە چێوێوە ڕاس نییا، هومێدەوارنا دەوڵەتوو عێراقی، حکومەتوو عێراقی چا خاڵانە، درک بە سیاسەتوو تورکیای بکەرۆ و وەراوەروو سیاسەتوو تورکیایۆ هەڵوێستش بۆ. چەمەڕوانیما  پێسنەن، بڕێ هەوڵێ چینێ هەنێ، ئێمە هومێدەوارێنمێ، کە ئا هەڵوێستە زاڵ بۆ. پی جۆرە بەشداریی گەمەکاو دەوڵەتوو تورکی نەکەرا. ئینانێ چا بڕوێنە کە بەرژەوەندییەکاو گەلوو عێراقیچ پی ئاراستەنێ و حکومەت وێش بیاونۆ ئاستێوە، کە بتاوۆ گرد هەلومەرجێوەنە  نوێنەرایەتیی بەرژەوەندیی گەلوو عێراقی بکەرۆ.  

ئیساتێچنە دەوڵەتوو تورکی پەشتیش بە پاڵپەشتییەکاو ناتۆی گەرمەنە. ئێمە مزانمێ ئا تەکنەلۆژیا دەسوو تورکیایۆ هەن، بە نموونە فرۆکەی سیخوڕیی گولانە کە تورکیا ماچۆ 'وێم بەرهەمشا ماروو' ڕاسا تورکیانە وەشێ مکریا، بەڵام وەختێ ئینسان جە پارچە گرنگەکاش ورد بۆوە، موینۆ کە گردش دەوڵەتاو ناتۆیۆ سانێنێ. کەنەدا، بەریتانیا، ئەڵمانیا و ئەمریکای سانێنێ. بڕێ پارچێچشا ئوکرانیانە وەشێ کریێنێ. چی دمایۆ ئاکسونگورەک  کە دەگاو مژێ-نە کەوتەبێرە واری. هامڕێما لوێبێنێ واگە پارچەکێش وڵاتانەوە بێنێ و چینیچش چەنە بێ. پارچەکێ بەرۆ سنیا و وەشێ کریا. ئانە بە پەشتیوانیی گلادیۆو ناتۆی وەشێ کریا. ناتۆ گەرەکشا دووەم سوپاو ناتۆی وەراوەروو گەریلاینە شکس بارۆ، پەوکای پەشتیوانیی گردینش وەنە مکەرۆ.  بەڵام ئێمە وردەکاریی ئا پەشتیوانییە کە بە کردەوە پێشکەشش مکەرۆ و ئانەش کە سیاسییا و چێشین نمەزانمێش. بەڵام مزانمێ  کە هەن. چی وەهارەنە تورکیا ملۆ عێراق و هەولێر، بەڵام وەڵێ ئانەینە لوان ئەمریکا. هەم میت و هەم ئانێ پەیوەندییشا بە جەنگیوە هەن چی پلانێنە ناتۆیچ هەن. ئینا چە ئاستێوەنە، ئینەیچ یاگێ واتەواچینە. ڕۆشنا کە هامکاریی پەدەکەیچ پەی تورکیای لاو ناتۆیۆ پەسەند کریان. ئەگەر پەدەکە چەنی تورکیای نەبیێ ڕەنگای ناتۆ پا ڕاددە پشتیوانییش وەنەو تورکیای نەکەردێ. یا دژوو کوردا پەشتیوانیش وەنە نەکەرێ لێنەدەکرد. پا بۆنەوە درێژە بە پەشتیوانییەکاش مدۆ.

ئێساتێ مشۆم دەوڵەتێ ئەندامێ ناتۆی، بەتایبەتی ئەمریکا خاس ئەوە بزانا. تا ئێساتێ ئێمە دژشا هیچما نەکەردەن. دۆزوو ئێمە دۆزێوە نەتەوەیین، داواو مافە سروشتییەکاو گەلەکەیما مکەرمێ.  وەروو ئانەیە دەسما پەنە کەردەن داواو مافە سروشتییەکاو گەلەکەیمانە، کە جە چوارچوەو مافەکاو ئینسانینە هەنێ، مافوو دیموکراسی و ئازادینێ. مشۆم دژوو دۆزوو گەلوو کوردی نەمرددێوە. دەوڵەتوو تورکی دژوو گەلوو کوردی تیرۆر کەرۆ، گرد جۆرە تندوتیژیێوە مکەرۆ، ماددەی کیمیایی بەکار مارۆ. ناتۆ چەمێ وێش ئاستشنە قووجنۆ، ئادیچ پاسە میارۆنە و بەکارشا مارۆنە  نمەبۆ کەس پاسە فکڕێ بکەرۆوە 'ئێمە پەکەکە کەشەکاوە لاواز بکەرمێ و ئێمە کورداو وەرنیشت و وەرکەوتی بکەرمێ بە هامپەیمانوو وێما و گلێرگەو پەکەکەی بوزمێ خزمەتوو وێماوە'. با کەس وەرمی چانە نەوینۆ، دیارا وەرمی چانە هەن. یا ئانە ئێمە ناوەندوو پەکەکەی دلێنە بەرمێ و بەرهەمەکاو پەکەکەی بوزمێ خزمەتوو وێماوە. ئانە پلانێوە فرە خۆفناکەنە. حەر وەخت پێویس بکەرۆ هەرئاپۆچیێوە متاوۆ  بۆ بە جەنگاوەرێوە. مشۆم ئا هێزێ ئینەیە بزانا. بدیە وەختێ پیلانگێڵنیی میاننەتەوەیی دژوو ڕابەر ئاپۆی وەڵێ وزیا، ئرۆ ملوێنان کەسێ سەروو خەتەو ڕابەر ئاپۆیۆ جماوە و پەی ئازادیی ڕابەر ئاپۆی بانگەواز  کەرا. مشۆم بزانا  وەراوەروو گەلێوە چینەیۆ نەمردا. غەڵەتا، ئی هەڵوێستەو ئادیشا چێشا؟ بدیەیدێ کە کورد وەراوەروو  کوردی بێ ئاراوە. دوژمنایەتیی کوردی کەرا. پی سیاسەتیوە گەرەکشانە لۆزانی دووەمی بیاوناوە یاگێ. مشۆم ەس چا سیاسەتەیە ورگێرا کوردی خراپ و کوردی خاسی دە پێوەرە و بەرژەوەندییەکات خۆت مسۆگەر بکەرە. ئینە نەمەنەن. پەوکای مشۆم چەمی سیاسەتوو خراپوو وێشارە خشکناوە. نەک بە سیاسەتوو بەرژوەندیی هەژمونگەرایییشا، بەڵکوم داواکارییەکاو گەلوو کوردی گێرا وەرەچەم. بە پاو ئانەیە سیاسەت خوڵقنا. ئەگەر جمیەری گەورەو گەلوو کوردی دژوو وێت بنیەیرە، ئانەی کە دەست گنۆ، دوژمنایەتیی گەلوو کوردین. پەوکای ئێمە هومێد مکەرمێ، کە ئا دەوڵەتێ دەست وەنەو سیاسەتی بەرژەوەندیپەرستانەیشا، کە دوورا جە بەهاکاو دیموکراسی و ئازادیوە ورگێرا و سیاسەتێوە دروست بە بنەما بگێرا.