موراڎ قەرەیلان پېوەس بە هەڤاڵ فوادی گەشمەرڎەی کە بە'نەمر' نامێش بەرڎ واتش: "هەڤاڵ فواد واچۍ ئینسان تا ژیۋۆ مشۊم نەمر بۆ. پا ڕەنج و میراتییەیی دماو وێش جیاش ئاست بی بە میلیتانێوە نەمری ئاپۆیی و سەرمەشقێوە هەمیشە زیڼەن."
ئەندامو کۆمیتەو ڕاوەبەری پەکەکەی موراڎ قەرەیلان باسش جە تەمەنی پەڕ جە ئەوەکۊشای یۆ جە ئەرەمەرزنەرا پەکەکەی عەلی حەیدەر قەیتانی کەرد و ئاماژەش پانەی دا هەڤاڵ فواد هەمیشە جە بوارو ڕێکوستەی و بوارەکا تەرو شۆڕشینە دەورێوە سەرمەشقی گێڵنۍ. ئاماژەش پانەیچ کەرڎ پا میراتییەی جیاش ئاست بی بە میلیتانێوە نەمری ئاپۆیی.
بەشێوە جە قسەکا قەرەیلانی پېوەس بە عەلی حەیدەر قەیتانی (فواد) پی جۊرەنۍ؛
جە سەرەتاو قسەکاشەنە موراڎ قەرەیلان باسش جە سەرەتاو ئشناسای ۋێش و هەڤاڵ فوادی مکەرۆ واتش: "شەهادەتو هەڤاڵ فوادی جە ئەوەکۊشای ئازادیمانە گۊرەتەرین شەهادەتا. هەڤاڵ فواد هەمڕاو سەرەتاو ڕابەرایەتیا. جە ڕۊ ئشناسای ڕابەرایەتیوە تا دمایی تەمەنیش بەبێ دووە دڵی بە قەولېوە گۊرۆ چنیش هەنگامەش نیا و دڵسۆزو ڕابەرایەتی بۍ. جە شۆرشمانە ڕەنجێوە گۊرەش دا و کاریگەریش سەرو گرڎیما جیائاست. ماوێوە فرە سەرو گەشمەرڎەبیەیشەرە نەوېیەردەن، رەنگە نەتاوو جە ئیساتێنە بە شێوێوە قسۍ بکەرو. هەزمکەردەی گەشمەرڎەبیەیش ئاسان نەبۍ پەیم. چونکی هەڤاڵێوە قەڎیمی و خاوەن ڕەنجێوە گۊرەن. هەڤاڵ فواد جە کەسایەتی ۋێشەنە نوێنەرایەتی پەکەکەی کەرۍ. جارێوەتەر بە ڕێز و شکۆوە یاڎش مکەرووە و قەولو دڵسۆزبیەی واوەی مکەرووە و جە کوردەسانی ئازاد و ڕابەرایەتی ئازادەنە یاڎش زیڼە ڕاگێرمۍ. سەرساغی ۋێما جە ڕابەرایەتی و گرڎو گەلی وڵاتپارێزنیما مکەرمۍ.
ژیۋایۍ پەر جە ئەوەکۊشای؛ بنیاڎ نیای مۆدێلێوە
موراڎ قەرەیلان ئاماژەش بە ژیۋای و تەمەنی پر جە ئەوەکۊشای گەشمەرڎە عەلی حەیدەر قەیتانی کەرد کە نزیکەو ٥٠ ساڵا چنین بە هەوڵ و رەنجە گۊرەکا و ژیۋای خاکیانەیشۆ ڕێبازێوە ئەوەکۊشایش بنیاڎ نیان و مۆدێلێوەش ئارمانا و واتش: "ئی مۆدێلە پەی گرڎیما نموونێوەن. میلتیانێوە، سەرمەشقۍ مشۊم چنی بژیۋۆ؛ چی مژارەنە هەڤاڵ فواد بی بە ئەرمانەرو پیمەرەکا. پەنەوازا میلیتانی ئاپۆیی چنی بەشدارو ئاپۆیی بۆ؛ هەڤاڵ فواد چی مژارەنە یاگێوە گرنگ و کاریگەرەش هەنە. بە ژیۋایش نیشانەش دا کە مشۊم میلیتان چنی بژیۋۆ، بەڕاسی کەسایەتیێوە نەمرش وەشکەرڎ.
هەڤاڵ فواد کەسێوە نەمرا واچۍ، 'ئینسان تا ژیۋۆ مشۊم نەمرانە بژیۋۆ. بە ڕەنج و بەرهەکاو ۋێشۊ پەی هەمیشەی بی بە ڕابەر و سەرمەشقێوە نەمر، بی بە میلیتانێوە ئاپۆیی. سەرو ئی بنەمایۍ نزیکۍ بیمێوە جە شەهادەتو هەڤاڵ فوادی.
جە حوزەیرانو ساڵۊو ١٩٨١هەڤاڵ فوادم ئشناسا
هەڤاڵ فوادم جە حوزەیرانو ساڵۊو ١٩٨١ جە فەلەستین، لوبنان و جە کامپو بەرەو دیموکراتیکی و کەمپو حەلواینە ئشناسا. چا کاتەنە هەڤاڵا پەی یووەمین کۆنگرەو پەکەکەی کوۍ بێنێوە منیچ وەڵۍ کۆنفرانسەکەینە لوانی پەی وای. هەڤاڵ فواد چنی جەمێوە هەمڕایا ئامۍ چا دیمو ئشناسام. بەڵام چاوەڵتەریچ من ئاڎیی ئشناسێنا. چونکی ئێمە جە کوردەسانەنە بێنمۍ چا کەسا بێنمۍ کە بەشدارۍ جمېیەرەکەی بێنمۍ و بە بەشی دووەم ئشناسیێنمۍ واتە ئەر ئا گروپۍ کە جە ئەنقەرەنە پەروەردەشا دی بەشدارۍ جمېیەرەکەی بیۍ بە کەسانۍ بەشی یووەمی بزانمۍ، ئێمە جە کوردەسانۆ بەشدارۍ بێنمۍ پۊکەی متاومۍ بە گروپی دووەم بنریێیمێرە. بەڵام هەڤاڵاو گروپی یووەمیما بەنامۍ ئشناسێنمۍ.
دەنگ و شێوازو قسەکەردەی هەڤاڵ فوادی فرە کاریگەر و سەرنجڕاکێش بۍ. کاتێ باسو گلېرۊبیەکا هەڤاڵ فوئادی جە دێرسیمنە باس کریۍ، واچێنۍ عەلی حەیدەر قەیتان پاسەش وات. نامێش یاوا دیلۆک و ڕحا. چا کاتەنە هەڤاڵ فوئادم ئشناسا. کاتێ چەمم پنەش کۊت، فرە کەیف وەش بیا. ئاد بە فیداکاری و ڕێزداری نامیە بۍ. یووەم چێوۍ کە دیمو منش سەرسام کەرڎا ئاڎیچ ئینە بۍ، چا کاتەنە پاسە بزانو لاقش زامڎار بیە بۍ تیمار کریابۍ. ئاڎ سەرەڕاو ئانەی لاقش گرفتش بۍ. گرڎ سەعبۍ نزیکەو سەعاتو نیمێوە وەرزش کەرێنمۍ. حەرچڼە هەڤاڵۍ واچێنۍ نمەبۊ بەشداری بکەرۆ، بەڵام واچێ: "ئەر گرڎو هەڤاڵا بەشدارێنۍ، منیچ مشۊم بەشدار بوو ". وەرزشەکەما قورس بۍ و پەی هەڤاڵی قورستەر بۍ. بەڵام گرڎ ڕوۍ تا ئاخر بە بێ ۋۍ بە گۊرە زانای به شداری کەرۍ. ئینە پاسەش کەرڎ کە پەی ئێمە فرە بە قیمەتتەر بۆ. پی جۊرە هەڤاڵ فوئادم ئشناسا."
هەڤاڵ فواد تاریخو دێرسیمی ئەرمانۍ
پېسە هەمڕێوە عەلی حەیدەر قەیتانی چ تایبەتمەندیێوە ئاڎیی فرە کاریگەری سەرت نیێرە؟
وەڵۍ گرڎ چێوێنە هەڤاڵ فوئاد پېسە وێنێوە دێرسیمی بۍ. جە کەسایەتی ئاڎینە ئەوەمەڼنەو کۆمکووژی دێرسیمی و هەڵوێسی قارەمانانە بە گرڎ شێوێوە وینیۍ. واتا هەڤاڵ فوئاد دێرسیم بۍ. بە تاریخ، ۋېیەردە و چنی ڕۊو ئارۊی دێرسیمێوە کوردەسانی بۍ. پەی ئانەی حەقەو تاریخی، حەقەو کۆمکووژی و قڕکەردەی دێرسیمی بکەرۊوە داراو ئی هەڵوێسەیە بۍ.
هەرپاسە یۊ چا لایەناسە لایانەی کە فرە کاریگەریش سەر نیانیرە، نەرم و نیانەیەکەش بۍ. جە کاتو ڕەخنەداینە واچۍ نەرم و نیان نیەنا، بەڵام نەرم و نیان بۍ. جە ئەکادیمیانە سەرسەعب تا وێرەگا دەرز دێوە، وێرەگایچ بە هەڤاڵا واچۍ 'کەم و کوڵی نەبۊ کاتو شمەم گێرت'. ئانڼە میهرەبان بۍ. حەرچڼە ڕەنجی فرەش دا، نەمانیا، کۊششی گۊرەش کەرڎ، هەمیشە سەرو پەیاوە مردا بۍ، بەڵام ئینەی ماچۆ. ئینسانێوە ئاڼنە میهرەبان بۍ. حیچ هەستێوە ۋێپەرستانەش نەبۍ. هەمڕایۍ دڵسۆزانەش بۍ.
تا دما نەفەس دڵسۆزو ڕابەرایەتی، بەها و هێڵەکێش بۍ. داراو زانایۍ گۊرەی بۍ. زانا بۍ، کەلتورێوە بەرزش بۍ. ئینۍ گرڎ کاریگەریشا سەر نیانیرە. ئاڼنە یاوانانە، نەرم ونیان و ڕەنجدەر بۍ.
نمەزانو جە تاریخەنە ئەولیاکۍ چنینۍ بێنۍ، بەڵام باوەڕیم هەن کە ژیۋای هەمڕا فوئادی ژیۋایۍ ئەولیایانە بۍ. هیچش پەی ۋێش گەرەک نەبۍ، تەنیا گەرەکش بۍ خزمەت بکەرۆ. هەمیشە ڕەنج دۍ، بەڵام حیچ هۊرنەگێرۍ. کەسایەتیێوە خاوەن نزیکبیەیۆیۍ پا جۆرە دڵنەرم، پاک، هەستیار بۍ.
هەمڕێوە فرە هەستیار بۍ. لێوەتەریچش پی جۊېرە بۍ. بەڕاسی پېسە ئەولیای ژیۋۍ. بێگومان ئینۍ گرڎ کاریگەری سەرو ئینسانی کەرێنۍ. باوەڕیم هەن ئی تایبەتمەندیۍ هەڤاڵ فوئادی ئانڼە کاریگەریشا سەرو من کەرڎەن، کاریگەریچشا سەرو هەڤاڵا تەریچ کەرڎەن.
