مېیانو ئەرەیاۋنای و چاپەمەنی قەسەدەی ئەرەیاۋناش، جە ئاکامو وەرپەرچدایۆ هرووژمەکا دۆڵەتو تورکی و چەتەکاشەنە پەی سەرو بەنداوو تشرینی و دەگایەکا منبجی زیاتەر جە ٣٧ چەتۍ کوشیێنۍ و چڼین ترۆمبێلۍ سەروازیۍ دلێنەبریێنۍ.
مېیانو ئەرەیاۋنای و چاپەمەنی هێزەکاو سوریای دیموکراتیکی (قەسەدە) سەبارەت بە هرووژمەکا دۆڵەتو تورکی ئەرەگیری و چەتەکاش پەی سەرو بەنداوو تشرینی و دەگایەکا پانیشتوو ۋەرکۊتوو منبجی ئەرەیاۋنێوەش وەڵا کەرڎۆ.
بەپاو ئەرەیاۋناکەی سەعات ١٠:٤٠ دەیەقۍ وەڵۍ نیمەڕۊو رۆو چوارشەممەی دۆڵەتو تورکی ئەرەگیری بە سەرمەشقایەتی فڕۆکەی جەنگی و فڕۆکەی بێ فڕۆکەوانی هرووژمێوە چڕش کەردەن سەرو دەگایەکا عەلوشی و تل عەریشی، هەرپاسە تەپو سریاتلی جە دەوروبەرو بەنداوو تشرینی کە گنا پانیشتوو ۋەرکۊتوو منبجی.
ئانەیچش وستەن ڕووە، کە جە ئەنجامو جەنگو ما بەینو جەنگەوانا و چەتەکانە، بە دەیان چەتۍ کوشیێنۍ و ئانەی پەشڕاس کریانۆ، دیەو تەرمو ٣٧ چەتا بیەن، ئینا جیا جە زامڎاربیەی ٤ چەتا. هەرپاسە تانکێوە و ٤ ترۆمبێلۍ سەروازیۍ چەتەکا دلێنەبریێنۍ و گورزە جە ٣ ترۆمبێلا جە جۆرو ب ئێم بی شنیان.
هەر بە گوێرەو ئەرەیاۋناکەی، جەنگەوانا قەسەدەی نزیک بە تەپو سریاتلینە دامەشا نیێنۆ و چڼین چەتۍ کوشیێنۍ و ژمارێوە فرەیچشا بڕەمێنۍ.
قەسەدە ئاماژەش پانەیچ کەردەن جەنگەکە تا سەعات ١٧:٠٠ بەردەوام بیەن و تەرمۍ چەتەکا بە مەڵامەتو گورزەی قورسەو جەنگەواناوە دلۍ مێڎانەکەینە کەوتێبێنۍ و چەتەکۍ نەتاوێنۍ تەرمەکا هۊرگێراوە.
