مییانو ئەرەیاوناو هێزەکا سوریای دیموکراتیکو (قەسەدە)ی ئامارەو هرووژمەکا دۆڵەتو ئەرەگیرو تورکی جە ٢٢ ی ئادارینە و چالاکییەکێ جوابدایۆ جەنگاوەراش ئاشکرا کەرد. قەسەدە ئەرەیاوناش، جە هرووژمەکانە جەنگاوەرێشا گەشمەرڏە بییەن و جەنگاوەرێشا زامڏاربییەن.

ئەرەیاوناکەی پی جۆرەنە:

"هرووژمەکێ دۆڵەتو تورکی و چەتەکاش ٤ مانگێن بەردەواما. جەسەیەو مڏرامان و هەڵوێسو هێزەکاما ، ئەرەگیرێ و چەتەکێش نەتاوانشا هیچ وەڵکەوتێوە بەدەس بارانە.

بەرەو بەنداوو تشرینی؛ چەتەکێ دۆڵەتو ئەرەگیرو تورکی هیزی سەعات ٧:٠٠ هرووژمشا کەرد سەرو نوقتێوە هێزەکاما. جەنگاوەرەکێما هرووژمەکەشا ماڕا و ٢ چەتێ کوشیێ.

سەعات ١١:٠٠ چەتەکێ جارێوە تەر ژپهرووژمشا کەردۆ پەی هورگێرتەو تەرمەکاشا، بەڵام ئی هرووژمەیش بە مڏرامانو گۆرەو جەنگاوەراما مەڕیا. جە ئەنجامەنە ٢ چەتێش کوشیێ و ژمارێوە تەریچ زامڏارێ بیێ. دماو ماڕاو هرووژمەکا، چەتەکێ بە تۆپە و هاوەنێ هرووژمشا کەرد سەرو نوقتێ هێزەکاما. جە ئەنجامەنە زەرەری ماددی ڕووەشدا. چا دەقەنە فڕۆکەکێ سەرو هەرێمەکەیرە خولیێنێ.

سەعات ١:٠٠ فڕۆکێوە بێ فڕۆکەوانو دۆڵەتو ئەرەگیرو تورکی هرووژمش کەرد سەرو خاڵێوە هێزەکاما جە دەگاکا سەرنیشتوو بەنداوەکەی. جە ئەنجامەنە جەنگاوەرێوە گەشمەرڏە بی و جەنگاوەرێ تەریچ زامڏار بی.

جە وەراوەرو هرووژمو ئەرەگیرا و چەتەکانە، یەکینەکێ گەشمەرڏە هارونی سەعات ١٢:٠٠ چالاکییێوەشا ئەنجامدا. جە ئەنجامەنە تڕۆمبێلێوە سەروازی سەر بە چەتەکاشا ماڕا، بەڵام ژمارەو کوشیایا و زامڏارێ دلێ ترۆمبێلەکەی نەزانریان.

بەرەو قەرەقۆزاقی؛ دۆڵەتو ئەرەگیرو تورکی و چەتەکاش بە زیاتەر جە ١٣ گولـلێ بە ئیسفادە هروگێرتەی جە تۆپێ و هاوەنێ قورس دەگاکا بیر حەسۆی و خەشخاشا تۆپواران کەرد. جە ئەنجامو ئی تۆپواران زەرەرێ وەرفراوان وەرو یانە و موڵکو ئەرەنیشا کەوت.