هامسەرۆکۊو گرڎینەو دەبەپەی چیدەم کلیچگون ئۆچارە پەی ئاژانسوو هەواڵوو فوراتی (ANF)ی قسێش کەردۍ و ئاماژەش پانەی دا پرسو کوردی ئیتر جە زەمینەو ۋەرکۊتوو مېیامینینە ۋېیەردەن یاوان بە ئاستی مېیاننەتەوەیی و جەختش کەردۆ بانگەوازو 'ئاشتی و گلېرگەی دیموکراتیک'و ڕابەر ئاپۆی تەنیا پەی چارەسەری پرسو کوردی نا، بەڵکم پەی دمایی ئاردەی بە جەنگی جە ۋەرکۊتوو مېیامینینە و چارەسەری، کۊششێوەن. هەرپاسە ئاماژەش پانەیچ دا گروپە ڕامېیاریەکۍ و دۊڵەتا دوور جە هۊرسەنگنای سیاسی و مرۆی بی بە یاگۍ گفتوگۆی و واتش هەنگامەی فرە بەهێزەو ئەرەمەرزنای تازەی و دیموکراتیکیا.

دۆڵەت و دەسەڵات پەنەوازا نەخشەڕێوە ئاماڎە بکەرا

ئۆچارە ئەرەیاۋناش هێزە دیموکراتیکەکا و کورد جە دیموکراتیکبیەینە دەوری سەرەکی گێڵنا، گلېرگەی دیموکراتیک و ژیۋای ئاشتیانە مسۆگەرکەردەی ژیۋای هامبەشا و واتش: "سەڎ ساڵێن ۋەرا ۋەر بە سیاسەتو نکۆڵیکەردەی و تاونایۆ مڎرامان مکەرا. زانیان کە سەڎ ساڵی دووەم پی سیاسەتەیۆ بەردەوام نمەبۆ و هەلومەرج فاڕیان. تەڤگەرو ئازادی کوردی پەی گرڎو پێکئامایەکا ۋێش ئەرەیاۋناش پاڵپەشتۍ ئی بانگەوازەیە مکەرا و ئاماڎێنۍ. چی چوارچێوەیەنە چەمەڕۍ پراکتیکی هەنگامەی باوەڕ پنەکریێنمۍ. پەی ئینەیچ مشۊم نەخشەڕێوە ئاماڎە بکەرا. مشۊم هەنگامەی یاسایی و سیاسی پراکتیکیە بنیا و گەلیچ بە بنەماو ئی کۊششەیە هۊرگێرا. بە پێچەوانەیچۆ جە شۊنێنە هەنگامەی متمانە پنەکریۍ نەبۆ ئەنجامش نمەبۆ، وەکەسیچ متمانەش پنەمەکەرۆ. پی جۊرە دەرفەتەکەیچ دەسەنە ملۆ. مشۊم بە ۋەرپرسیاریەتی هۊربێزا".

بازاڕکەردەی سەرو مافە یاسایی و مرۆییەکا نمەکریۆ

ئۆچارە واتیچش: "گۆشەگیری تاوانێوەنە جە دژو مرۆڤایەتی و گلېرگەی بە تەمامی ژەعراوی مکەرۆ. 'مافو هیوای' مافێوە مرۆی و گەردونییا جە پەیماننامە مېیاننەتەوەییەکانە مسۆگەرکریان. بە واتەی ئانەی 'وڵاتێوە سەربەخۆنا' نمەتاوی ئینەی بە شێوێوە ئارەزوومەندانە ئەنجام بڎەی. کۆنسەو ئۊروپای کاتش بە تورکیای دان تا چی مژارەنە سەرراسکەردەیۆ یاسایی بکەرۆ. چێوۍ خاس نیا ئینە بۆ بە مژارو بازاڕکەردەی. ئانەی پەنەوازا ئەنجام بڎریۆ ئانەنە کە 'مافو هیوا'ی جابەجێ بکریۆ، ئازادی بەڎەنی ئېژا ئۆجالانی مسۆگەر بکریۆ. ئەر ئینە بکریۆ گرڎ چێوۍ ۋەرو چەما گلېرگەیۆ بۆ، گلېرگەیچ بەشدار بۆ و پرسەکەیچ بە تەمامی چارەسەر مکریۆ".