فەرماندەیی گرڎینو قەسەدەی بۊنەو ٦ ەمین ساڵیاڎو ڕزگارکەردەی باغۆزیۆ پېسە دماین مۆڵگەو چەتە تیرۆریسەکا داعشی، ئەرەیاۋنێوەش وەڵا کەڕڎۆ.

قەسەدە یاڎو تەمامو گەشمەرڎا مکەرمێوە و سڵام جە مڎرامانوو جەنگەوانا مکەرمۍ، ماچۆ: " جە کاتێنە کە سوپاو دۊڵەتە گۊرەکا بێ‌چارە مەنۍ ۋەرا ۋەر بە ڕێکوزیا تیرۆریستییەکەی، هێزەکېما داعششا ماڕا، کە گەندەڵی و تاریکی و خراپەکاریش وەش کەردەبۍ، ئەمنیەتش پەی هەرێمەکا گێڵناوە، جەهانش جە جەنگی و تیرۆری دووروستۆ. ئی سەرکۊتەیە قۆناغێوەگرنگ بۍ جە جەنگی درێژخایەنەنە دژو ئی ڕێکوزیایە. بەڵام ئەوەمەڼنەو ئا ڕێکوزیا تیرۆریستییە کە هەڕەشۍ سەرەمڕەی پەی سەرو ئاسایشو هەرێمەکاو سەرنیشت و ۋەرکۊتوو سوریای وەش مکەرا، هەڵای مەنێنۍ. پەی وەرگێرتەی جە گێڵایۆ داعشی، کۊششی زیاتەر و هامکاریی هەواڵگری و ئەمنی و هەرێمی و مېیاننەتەوەیی پەنەوازا".

قەسەدە تەئکید مکەرۆوە چالاکی و ئۆپەراسیۆنو هێزەکاشا دژو شانەکا داعشی بەتایبەت چی ساڵا دماینە بەردەوام بیەن، ماچۆ: " جە ئاکامەنە سەڎان شانۍ داعشی هۊرشێویێنۍ و ئەغلەبیەتو ئەندام و فەرماندە سەرەکییەکا داعشی گیریێنۍ، کە بەشێوەشا دەسشا بیەن جە هرووژمەکا سەرو زینانو سەناعەی.

ئا ڕێکوزیا تیرۆریستییە، کەڵک جە ئاژەو پشێوی و هرووژمەکا دۊڵەتو ئەرەگیرو تورکی و چەتەکاش پەی سەرو هەرێمەکەی هۊرگێرۆ و هەوڵو زیڼەکەردەیۆ ۋێش مڎۆ. دماو وڕای ڕژێمو سوریای، داعش چەکی جۆراوجۆرش دەس وست، هرووژم و چالاکییەکێشا زیاتەرۍ کەردێنۍ. داعش هەمیشە جە ژیۋگەو پشێویی و بۆشایی و ناسەقامگیرینە، چالاکا".

قەسەدە جەخت مکەرۆوە، گرفتی هەرە گۆرە زینانیۍ داعشی و خێزانەکێشانۍ کە ئەغلەبیەتشا سەر بە وڵاتا بیانینۍ، ماچۆ: "ئی گرفتە پەنەوازیش بە چارەسەری و هامکاری مېیاننەتەوەیی و دادگێوە مېیاننەتەوەیی هەن. پەی ڕاگێرتەی جە وەڵابیەیۆ فیکرو تنڕەوی داعشی، پەنەوازا ستراتیژی درێژخایەن بۆنە. پەنەوازا دادپەروەری پەی ئا کەسا بەدی بۍ کە قوربانیۍ دەسو تاوانەکا داعشی بێنۍ".

قەسەدە جەخت مکەرۆوە پەنەوازا هەماهەنگی مییانتەوەیی بۆنە تاوەکو ڕا نەدریۆنە داعش ڕەوشی ناسەقامگیری سوریای قۆزۆوە و وێش ڕێکوزۆوە، ماچۆنە: "ئاسایش و هەرێمەکەی و جەهانی، تا ڕادێوە پەیوەسا بە ڕاگیری کەردەی جە گێڵایۆ داعشی".

قەسەدە جەدماینە واوەیش مکەرۆوە، بەردەوامێ بانە جە ئەرکو وەرەنگاربییەیۆ تیرۆری و مسۆگەرکەردەو ئایندێوە ئارام پەی گەلا هەرێمەکەی، ماچۆنە: "بەڵام ئی ئەرکە بەشێوەن جە جەنگی لۆکاڵی و مییاننەتەوەیی دژو داعشی. پۆکەی داوا جە هامکارەکاما و گلێرگەی مییاننەتەوەیی مکەرمێنە، چی جەنگەنە پەشتیوانیما بکەرا، تاوەکو ئاسایش و ئاشتیێ بەردەوام و دادپەروەری پێک بینە".