ئارۊ ٦ ساڵۍ سەرو ھجومو دۊڵەتو ئەرەگیرو ترکی جە دژوو کەشو قەرەچوخو هەرێمو دێرکی جە کانتۊنو قامشلۊینە ۋیەرۊ. بۊنەو ئینەیۊ هێزەکۍ سوریای دیموکراتی (قەسەدە)ی ئەرەیاۋنېۋەش ۋەڵاکەرڎۊ.

قەسەدە جە ئەرەیاۋناکەشەنە ماچۊ، " ئێمە ئارۊ یاڎ جە ٢٠ هەڤاڵاما کەرمېۋە کە ٦ ساڵۍ چېوەڵتەر جە ئاکامو ھجومو دۊڵەتو ئەرەگیری ترکینە جە دژوو ناۋەنڎو فەرمانڎەیی ئۊپەراسیۊنی سەروازی دژوو داعشی و ناۋەنڎو یاۋنەری و یەکینەکا پارېزناو گەلی جە کەشو قەرەچوخی جە هەرێمو دێرک-ینە گەشمەرڎۍ بیۍ. ئێمە چا ھجومەنە فەرمانڎە و شەڕڤانۍ قارەمانېما جە دەسدۍ کە خېرەشا پۍ گەلەکەیما گەرەکە بۍ و میراسو مدرامانی و فیڎاکاریشا دماو ۋێشا جیائاست.

حەرپاسە هەڵۋێسی ۋڵاڎپارێزی و ئەخلاقی گەلەکەیما جە سەرنیشتوو ۋەرکەوتوو سوریای جە ھجومە تیرۊریستیەکەنە کە جە دژوو تیرۊرو دۊڵەتو ترکینە ناڕەزایشا بەربڕی و دەیان هەزار کەسۍ جە کەشو قەرەچوخینە دڵسۊزی ۋێشا پۍ گەشمەرڎا واوەی کەرڎۊ، بەرز جە قەڵەم مڎەیمۍ.

قەسەدە جە بەشێۋە تەرو ئەرەیاۋناکەینە ماچۊ، ھجومەکەو دۊڵەتو ئەرەگیری ترکی پۍ سەرو کەشو قەرەچوخی بەڵگېۋە حاشا ھورنەگیرا کە دۊڵەتو ترکی هامکاری داعشیش کەرڎ.

قەسەدە ماچۊ، هێزەکېما بە وەرپەرسیاریۊ کۊشش کەرا و شەڕڤانەکېما گیان و ۋێشا پێشکەش بە دماڕوۋۍ ئارامو گەلەکەیما مکەرا. حیچ ۋەختۍ دەس جە کۊشیا ماناڎارەکەیما ھورمەگېرمۍ و بە وابەستەبیەی بە ۋنەو گەشمەرڎاۋە، ۋەردەوامی بە ڕاو گەشمەرڎاما مڎەیمۍ دژوو ئەرەگیرا ئەرەکۊشمۍ و خاکە ئەرەگیرکریاکاما ئازاڎ مکەرمۍ."

ھ.ش