"واتاو عەشرەت پی جۆرەنە کە وەنمێشەو"

 یانی هەر ئی خەڵکەنە بە ئاوراو تەژنەیچ هەر خەمەوەرێ زوانیشانێ و هەمیشە حەزشان بە سەرکەوتەیی ئەدەبیات، فەرهەنگ، ئاوڕ و شەخسیەت، دەسەڵاتوو زوانی. عەشرەتوو،گۆران زەمینی و هەورامانی شۆنکەوتێ هۆویەت و کێ بیەو وێشانێ. هەر وەخت دۆنیشا ماچا کورە ئێمە هەورامیێنمێ خۆ پێسەو ئادیشا... کەلەشەقێ نیەنمێ. هەر ئی عەشرەتەنە،حەزشا زوانش پارێزیۆ و زوانوو سەردەمی بۆ و پەنا نەبەرۆ بنە لەهجێتەری و لەهجێتەرێ و زوانێتەری.

"ئەدەبیات؛  ئانەن زوانوو ژیواو ئێمەو تاریخی منویسۆوە"

ئەدەبیاتوو هەر میللەتێوی بە شاکارەکاشوە پارێزنەرو هۆویەتوو ئا میللەتینە گۆران زەمین/ هەورامییەکا یۆ چا شانازی و تاریخسازیشانە، هەر ئی ئەدەبیاتشا بیەن و هەن. گردو عاڵەموو دنیای ددانش نیاپۆرە و منیۆچ پۆرە، شعرەو ئی میلەتی ، زوان کێ بیەی و دەسەڵاتوو سەردەموو گۆران زەمینی بیەن و بەرزتەرین و قەویتەرین سەنەد هەر ئی ئەدەبیاتە بیەن و ئارۆیچ وینمێ حیچ کەمتەرخەمی تخمە ئینسانی هەورامی نەکریان وفرەیچ زەریف ملا ڕانە.

بەڵام گۆرانیێ چێش؟

سیاوچەمانە چێش؟

ئیسە ژیواریەکێ چێش؟

دەسبارو تاریخینە پەی ئێمەی عاشقێ ئی هۆنەری کە یۆ جە بەرزتەرین و هێقمتەرین نەسەقێ مەینێ ئەژمار، دەنگوو گۆرانی واچەکامان و شعرەکاو [بەیتە فولکڵۆرەکاو ئی گۆرانی واچامانێ ]، سیاوچەمانەن. پەنەوازا درکنمێ و هۆشمانە بمانۆوە ژیوارو ژیواریەکێ بنکەو تاریخینە پەی ئاستەیوەو ئی زوانیما و ئی هۆویەتیما، زوانێو سەفا مەخووڵەی و سۆسەڵێ ئەڵەی بە قەڵەموو تاڵب ئەداکی و نیشاتەو سەیدی و  ئارۆ فەیسەڵ ژیواری و جوانەکاشا ماچاشاوە و ئاخواش کەراوە پەیما بێ حیچ خۆفێوە مشۆم واچمێ زوانوو دڵوو ئێمەن و گردما ڕۆحما فێنک بۆوە پەنەش. سەرڕاوحورمەتیم پەی نویسەرەکاو ئارۆیما. بەڵام ئەدەبیاتە دەمواچە کە ژیواریەکێ بە تایبەت فەیسەڵ ماچۆشاوە قسێ ژیواو غیرەتوو ئێمەنێ.

بڕێ چا ئەدەبیاتی کەدەنگەکاو فەیسەڵینە دیارێنێ بە زەریف وزووشا وەروو سەرنجێتا....

چکۆ بیێنێ چکۆ بیێنێ هارەقت کەردەن

کارەکەو خودالەین دڵما تۆ بەردەن

 

یا ئی گۆرانیەشادەو،تازێشەنە ماچۆ::

 

هەورە سیاوەکەی داش لارەتاوە

جە بۆنەو تۆوە مەیمێ گەناوە

دەسەو نازارام هەواریێ بیێنێ

چەنی چنووری تێکەڵێ بیێنێ

هامۆشیەی چەمەی پەوکی نەمەنە

نە من سەفا بیاو نە تۆ سۆسەنە

 

س.ز