پڵاتفۆرموو هۆرام-ی ئانەش وستەن ڕووە کە،فرەو ئا نەتەوا کە کارەساتوو کۆم کۆشتەی ئامان مڵشارە جە کەمتەرین وەختەنە وێشا یاونان پەنەو ئاسوودەیی و سەرکەوتەیشا پێ گەلەکەیشا دەس وستەن. کەردەنشا بە دەرسێ پێ پارێزناو سەرکەوتەی پێ گەلەکەیشا و واتش،"داخەم مەشۆ دەسەڵات و ناوەندی عێراقی درێژەدەروو سیاسەتەکا بەعسی بیەن و دەسەڵاتی کوردیچ جە پانیشتەنە ، هەڵەبجە و هەڵەبجەیەکێش پسۆ بازارێ پێ دۆڵەمەند کەردەو وێشا بەکار بەردێنێ".

حەر جە درێژەو بەیاننامەکەینە پلاتفۆڕمەکە سەرەراو شەرمەزار کەردەو بکەرا کارەساتوو هەڵەبجەی ، رێز و حۆرمەتش پێ کەس و کاروو گەشمەرڎا و گردوو ئا کەسا کە بە هەناسێوە و هەڵسێوە ئازارشا دیەن کیانان.

جە دمادمایی ئەرەیاۋناکەینە ئەرەیاۋییان  کە داوا جە کەس و کاروو قۆربانیا، رێکوزیا مەدەنیەکا کەرۆ کە کارەساتوو هەڵەبجەی گەورەتەر چانەی وینا کە حزبە دەسەڵاتدارەکێ گەرەکشا بۆ بە چن یادێ و مەراسمێ ، کەم کاریەکا و کەمتەر خەمیەکا وێشا شاراوە و ماچۆ،" سەروو ئا ئەساسییە جارێتەر ، جە ٣٦ هۆمین ساڵڕۆ کارەساتوو هەڵەبجەینە داواما ئانەن کە خەڵکەکەما جە هەرێموو هەڵەبجەینە بە رێکوستەو وێشا جە بەروو چوارچێوەو دەسەڵاتیوە نڕخ و پیرۆزیەکا وێشا جارێتەر پێ هەڵەبجەی و هەڵەبجەیەکا گێڵناوە".

بەیاننامەکەو پڵاتفۆرموو هۆرام-ی پی جۆرەنە:

بەیاننامەو پڵاتفۆرموو هۆرام-ی بە بۆنەو سی و ششەهۆمین ساڵرۆ کۆم کۆشتەو هەڵەبجەی .

فرەو ئا نەتەوا کە کارەساتوو کۆم کۆشتەی ئۆمان مڵشارە جە کەمتەرین وەختەنە وێشا یاونان پەنەو ئاسوودەئی و سەرکەوتەیشا پێ گەلەکەیشا دەس وستەن. کۆم کۆشتەی یا کارەساتشا کەردەن بە دەرسێ پێ پارێزناو سەرکەوتەی پێ گەلەکەیشا بەلام جە لاو ئیمەنە بەداخەوە ، دەسەڵات و ناوەندی عێراقی درێژەدەروو سیاسەتەکا بەعسی بیەن و دەسەڵاتی کوردیچ جە پانیشتەنە ، هەڵەبجە و هەڵەبجەیەکێش پسۆ بازارێ پێ دۆڵەمەند کەردەو وێشا بەکار بەردێنێ . ئاڕۆ ٣٦ سالێ سەروو کارەساتوو هەڵەبجەی گۆزەریۆ ، بەلام بە داخەوە نە ئانە هیچ هەنگامێ بنەڕەتییە پێ چارەسەری گرفتەکا خۆلکی و خانەوادەو شەهیدا و گیانبازا جەستەیی و روحی هۆرنەگریەنە . هەڵەبجە و هەڵەبجەیەکێ جە چەموو بەشەکا تەروو پانیشتو کوردستانی کەمتەرین خزمەتشا پەنە کریان .

پسۆ پڵاتفۆرموو هۆرام-ی سەرەراو شەرمەزار کەردەو بکەرا کارەساتوو هەڵەبجەی ، رێز و حۆرمەت پێ کەس و کاروو شەهیدا و گردوو ئا کەسا کە بە هەناسێوە و هەڵسێوە ئازارشا دیەن کیانمێ . هەر چەنی وەڵتەریچ سیاسەت و دەسەڵاتەکا بەغدادی و پانیشتوو کوردستانی جە وەرانوەروو کەمتەر خەمیەکاشا ڕەخنە کریان . بەلام ئانە کە یاگێ داخێنە ، دەسەڵات ئانە کە پێش مۆهێم نیا ، چارەسەری فرەو ئا کەسانە کە بە شێوە جیاوازەکا جە شیمیا وارانوو هەڵەبجەی تا بە ئاڕۆ ئازارە چەشا . دەسەڵات و پانیشتوو کوردستانی نە ئانە کە نەتاواش دەسەڵاتوو عێراقی مڵ کەچ کەرۆ و ئی کارەساتەیە پسۆ کۆمکۆژی بژناسنۆ ، وێچشا بە پەراوێز وستەی هەڵەبجەی و ئازارەکاش ، کۆمکۆژیە رۆحی و دەروونیشا سەروو خەلکوو ئا هەرێمەیە ئارد .

بە جۆرێ کە تاومێ واچمە گرد ساڵێ زامەکا هەڵەبجەی تازە کریاوە . پۆچی پسۆ پڵاتفۆرموو هۆرام-ی داواما جە کەس و کاروو قۆربانیا ، رێکوزیا مەدەنیەکا ئانەن کە کارەساتوو هەڵەبجەی گەورەتەر چانەی وینا کە حزبە دەسەڵاتدارەکێ گەرەکشا بۆ بە چن یادێ و مەراسمێ ، کەم کاریەکا و کەمتەر خەمیەکا وێشا شاراوە . سەروو ئا ئەساسەیە جارێتەر ، جە ٣٦ هۆمین ساڵڕۆ کارەساتوو هەڵەبجەی داواما ئانەن کە کە خەلکەکەما جە هەرێموو هەڵەبجەی بە رێکوستەو وێشا جە بەروو چوارچێوەو دەسەڵاتیوە نڕخ و پیرۆزیەکا وێشا جارێتەر پێ هەڵەبجەی و هەڵەبجەیەکا گێڵناوە . چوون باورما ئانەن کارەساتوو هەڵەبجەی تراژدیاو سەدەی بیەن و فرە دیمێ شاریاویەش هەنێ کە بە رێکوستەو دادگێوە عادڵ کە گەل سەرپەرەستیش کەرۆ بەرگنا .

ڕاوەبەری پلاتفۆرموو هۆرام-ی

١٥-٣-٢٠٢٤