"گوڵجان کاچماز سایگیت"ە کاندیدەو پارتو چەپی سەوزی، یۊبۍ چا هامسەرۊک شارەوانییا، کە مەنسەبەکەش جە لایەن و ئاکەپەیۊ دەسش گیریا سەرەرە. سایگیتە ئەرەیاۋناش، حەجگیز جە خەڵکی نەبڕیێنێرە و جە ئیسەیچ بە دماۋە پېۋەرە چنی خەڵکی ھەرمانە مکەرا.
پارتو چەپی سەوزی وانەنە دەنگش دانۊ. "گوڵجان کاچماز سایگیت"ە، یۊنە جە کاندیدەکا پارتو چەپی سەوزی جە وان پۍ ئاژانسو هەواڵی فورات (ANF)ی قسېش کەرڎۍ.
وان گۊرەتەرین شارو مەنتیقەو سەرحەدین. ژمارەو ئەرەنیشتاش نزیک بە ملۋێنۍ و ٥٠٠ هەزار کەسان. ژمارەو دەنگدەراش زیاڎ جە ٧٠٠ هەزار کەسان. پارتو چەپی سەوزی گەرەکشا جە کۊو هەر ٨ کورسیەکەو پەرلەمانی وانەنە، هەر ۸ کورسییەکەی بەرۊۋە. جە وانەنە پەشتیوانیۍ بەقوەت جە پارتو چەپی سەوزی کریۊ. جە وان گرڎو ناوەنڎەکا چڕیەو ھورچنیەی بە مەراسیمۍ جەماوەری و بە بەشڎاریی هەزاران کەسا کریاۋە. "کاچماز سایگیت"ە کاندیدەو پارتو چەپی سەوزی جە وان ۋاتش؛ "حەجگیز فشار و قەڎەغەکەرڎەی مەمردنۊشا و ئەرەیاۋناش، پۍ چارەسەرکەرڎەو کێشەو کورڎی، مافەکا ژەنا و مافو زوۋانی ئەڎایی زیاتەر کۊشیا".
"سایگیت"ە ۋاتش، "ۋەڵۍ گرڎ چېۋێنە خەبات و ژەنا، من کۊشیای ۋێم پۍ ستەمۋنەکریایا و چېردەسا، سروشتی، زوۋان و ئەڎۍ و کۊشیای جە دژوو گۊشەگیری و یاسا ماڕەکا جە زینڎانەکانە بە بەقوەتی و پا گیریۊ ڕاۋەبەر مکەرو. سەربارو دەسگېرتەی سەرو شارەوانییەکەیمەرە و پنەنەڎاو ئیجازەو ھەرمانکەرڎەی جە شارەوانییەکەمەنە، ئێمە حەجگیز جە گەلەکەیما نەبڕیێنمېرە و مەبڕیەیمېرە. ئێمە جە گرڎ یاگیۋەنە ئینایمۍ چنی گەلەکەیما. ئێمە هەوڵ مڎەیمۍ نوێنەرایەتیشا کەرمۍ، نوێنەرایەتیی ویست و ئیراڎەیشا کەرمۍ. حەر جە ئیسۊ ھەرمانەکېما جە مەیڎانی سیاسینە، چېرو چەترەو پەرلەمانینە، جە مەیڎانەکا مەنتیقەکەیمانە چنی گەلەکەیما پېۋەرە ۋەردەوامیش پنە مڎەیمۍ".
"سایگیت"ە کېنە؟
"گوڵجان کاچماز سایگیت"ە جە ساڵەو ۱۹۸۲ۍ جە مەنتیقەو "وەستان"ی جە وان جە ئەڎۍ بیێنە. دماو تەمامکەرڎەو قۊناغەکا سەرەتایی و ناوەنڎی و ئامادەیی، جە بەشو جوگرافیای کۊلێج و هونەری و ئەدەبیاتی جە زانکۊو "یوزونجویل"ی درێژەژ بە ۋەنای دا و ئا بەشەشە تەمام کەرڎ. جە ساڵەو ۲۰۰۸ینە جە مەنتیقەو کەشی جە وان بیە بە مامۊسا.
ھەمان ۋەختەنە چنی ھەرمانەو مامۊسایی دلۍ رێکوزیاو "ئەیتم – سەن" ینە ھەرمانەو سەندیکایی کەرۍ و بیە بە نوێنەرەو لقو "ئەیتم سەن"ی جە مەنتیقەو کەشی. جە ساڵەکا ٢٠١٤ پۍ ٢٠١٧ینە بیە بە هامسەرکەو "ئەیتم سەن"ی جە وان.
دماو ئانەی جە ساڵەو ٢٠١٥ جە لایەن و دۊڵەتو ترکیوە جە ھەرمانەکېش دوورە وزیاۋە، دیسان جە ساڵەو ٢٠١٧ینە ئەرکەکەش پۍ گېڵاۋە، بەڵام دماو دوۋۍ ڕوۋا جە ھەرمانکەرڎەی جە مەنسەبەکەشەنە ئیجارە دۊڵەتو ترکی بە قەرارو باری نائاسایی جە ھەرمانەکېشەنە لاشبەرڎە.
جە ھورچنیە دلېینەکانە (شارەوانییەکۍ) ساڵەو ۲۰۱۹ ی سەرو لیستو هەدەپەی پۍ هامسەرۊک شارەوانیی مەنتیقەو "ئارتمێنت"ی جە وان بیە بە کاندیدە و جە ھورچنیەکەینە سەرکۊتە و متمانەو گەلیش بە دەس ئارڎەبۍ و بیە بە هامسەرۊکەو شارەوانیی "ئارتەمێنت"ی. دیسان ئیجاریچ بە بەھانۍ ئانەی بە قەرارو باری نائاسایی ھەرمانەکۍ ۋەڵتەریش ۋنە سنیاۋە، ئاماڎۍ نەبێنۍ ئیجازەو دەسبەکاربیەی پۍ هامسەرۊک شارەوانیی مەنتیقەکەیش بڎا پنە. کۊمسیۆنو باڵاو ھورچنیەکا دۊڵەتو ترکی شارەوانیەکەش قۊرخ کەرڎ و کاندیدە دۊڕیاکەو ئاکەپەی، کە نەتاۋابێش متمانە و دەنگو گەلی بە دەس بارۊ، سەپناش سەرو شارەوانیەکەیرە.
ھ.ش
