عەباس شاهین، هامسەرۊکو هەدەپەو ئامەدی واتش، بە ئەنقەست ماددەی هۊشبەر شارە کوردییەکانە وەڵا کریۊوە و واتش:"گەنجۍ هانی دریا ماددەی هۊشبەر بەکار بارا و پێسە جە مەیدانە سیاسییەکەی دوورۍ وزیاوە".
شارو ئامەدی یۊن چا شارا کە بەکارئارڎەی ماددەی هۊشبەری دلێشنە زیادش کەرڎەن. وەڵتەر ماری جوانا جادەکانە ورەشیێ، وەلۍ چی ساڵاو دماینە بڕێوە فرە ماددەی (کریستاڵ) و لیریکا و بۊنزایی ورەشیا. ئی دەرمانە دەسکرڎە ئامێنۍ بەئاسانی سەروو زارۊڵا و گەنجاو عومر ٨ پەی ١٨ ساڵانە وەڵا کریۊوە. عەباس شاهین، هامسەرۊکو پارتو دیموکراسی و یەکسانیی گەلا (هەدەپ)و ئامەدی سەبارەت بە کێشەو ماددەی هۊشبەری چا شارەنە پەی ئاژانسو فوراتی قسێش کەرڎۍ و واتش:"ئینە ڕێککەوت نییا، کە ماددەی هۊشبەر ئاننە دلۍ جوگرافیاو کوردستانینە زیادش کەرڎەن. بەرڎەوام گەنجاو کوردی شارە کوردییەکانە هانی دریا ماددەی هۊشبەر بەکار بارا. یۊ جە هۊکارە سەرەکییەکا گێڵۊوە پەی هەڵوێستی سیاسیی گەنجا. بەتایبەت دماو ساڵەو ٢٠١٥، ماددە هۊشبەرەکۍ شارەکامانە زیاتەر وەڵۍ بیێنێوە و بەئەنقەس دلۍ گلێرگەینە وەڵۍ کریاوە."
پەی بێئیرادەکەرڎەین
شاهین واتش، تەمەنو بەکارئارڎەی ماددە هۊشبەرەکا شارە کوردییەکانە جە ٨ ساڵیوە دەس پەنە کەرۊ و واتش:"ماددەو کریستاڵی بەئاسانی شارەکانە پەی زارۊڵا مشتە گنۊ. ئی دۊخە ڕێککەوت نییا، بەڵکوم دەرئەنجامو سیاسەتێوەن، ئی سیاسەتیچە دژو گەلو کوردین. ژەهراویکەرڎەی گەنجان جە ڕاو مادەی هۊشبەریوە تا گەنجۍ نەتاوا پلانێوە پەی دماتەریشا بنیا. بەتایبەتی دماو وڕیای شارەکانە ساڵەو ٢٠١٥یەوە. قەیرانی ئابووری پاسەش کەرڎەن خەڵکی هەژار، هەژارتەر بۊ، دۊڵەمەندەکۍ بەتەمامی دەوڵەمەندتەرۍ با، نادادپەروەرییەکۍ ئاستوو ماددە هۊشبەرەکا و کۊچبەرییچش پەرەپەنە دێنێ. شارەکاو کوردستانینە گەنجۍ بەینوو عومروو ١٨-٢٤ ساڵینە ڕووە کەرا بەروو وەڵاتی، چونکوم چێگە ئایندەشا خراپ کریان. دەرمان دلۍ گەنجانە زیادش کەرڎەن. ئینە سیاسەتێوە ئەنقەسا، پەی ڕاگێریکەرڎەی وەنەو دۊخی سیاسیی گەلو کوردی، پەی بێئیرادەکەرڎەی گەنجان."
پێسە گەلی دژوو ماددە هۊشبەرەکا مردمێوە
شاهین ڕۊشنش کەرڎۊ، کە پەی ڕاگێری وەنەو بەشکەرڎەی و بەکارئارڎەی ماددە هۊشبەرەکا دەسشا بەهەرمانۍ خاسۍ کەرڎەن و واتش:"هەم پێسە حزبی و هەم پێسە گەلی دەسمان بە کۊشیاێوە گەورەی کەرڎەن. کە هاگاما جە جادەکا بۊ، هاگادارو گەنجەکاما بیمۍ و پاسە کەرمۍ گەنجەکێما بێساعیبۍ نەبا، ئی گەلە وەربەسی فرێش ویەرنێنۍ وەختۍ زیاتەر جە ٤ هەزار دەگایا چۊڵۍ کریێ، زیاتەر جە ٨٠٠ هەزار کەسا کۊچبەرۍ کریێ، کەچی گەلەکە سەروو پایاوە مەنۊ بی بە گەلێوە سیاسی. ئێمە بە گرد هەوڵێوە کۊشیەیمۍ و بە جەماوەری دژو وەڵابییەیوە مادەی هۊشبەری بیمێوە.
