سەرۋنەداکەو شاندو ڕۆنامەنوویسا ئۆروپی کە تایبەت بە گەشمەرڎەبیەو ڕۆنامەنوویسا گوڵستان تارۍ و هێرۆ بەهادینی ئامێبێنۍ پەی سلێمانی بە سەرۋنەدای کوردەسانی نوێ و KNN ی و NRT، دمایشا بە سەرۋنەداکەیشا ئارڎ.
شاندو ڕۆنامەنوویسا ئۆروپی سەرو داواو ڕۆژنی (ڕۆنامەنوویسا ژەنا کورڎەسانی) و دەسوەڵێوستەی ڕۆنامەنوویسا کورڎەسانی ئامۍ سلێمانی پەی ئەوەکۆڵیای جە گەشمەرڎە کەردەی ڕۆنامەنویسا گوڵستان تارۍ و هێرۆ بەهادین، کە ٢٣ۍ ئابینە جە ئاکامو هرووژمېوە درۆنی دۆڵەتو تورکی ئەرەگیرینە سەرو ڕاو سەیسایەق- سلێمانینە بەئامانج گیریۍ، جە سەرۋنەداکەیشا بەردوامێنۍ.
شاندەکە پێکئامان جە ڕۆنامەنوویسا ئالیجە ماگارە، ئێمما ئاودریە، دلێر ئاکرێی، هەندرێن فەرەج محەممەد، ژاڵان زیاعیە و دەڤریم ئاڵپە، ئارۆ سەردای ڕۊنامەو کورڎەسانی نوێشا کەرد. ۋەرپەرسا کورڎەسانی نوێ کەژاڵ ئەحمەدە و جەمال ئارێز و مەروان مەسعود خێرامای شاندەکەیشا کەرڎ و غەمباری ۋێشا بەربڕی بە گەشمەرڎەکەردەی گوڵستان تارۍ و هێرۆ بەهادینۍ. ۋەرپەرسا کورڎەسانی نوێ ئەرەیاۋناشا دۆڵەتوو تورکی هەڕەشۍ جە ئارامی و ئاسایشو سلێمانی مکەرۆ و مشۆم هەڵوێسی هامبەش نیشانە بڎریۆ دژوو ئی هەڕەشا. ئەنداماو شاندەکەی ئەرەیاۋناشا چەمڎاری ڕووەدایەکا مکەرا هەوڵو مردنای هرووژمەکا مڎا.
دماتەر شاندەکە سەردای تەلەفزیۆنی ڕسمی جمېیەرو فاڕیای (KNN)یشا کەرد. ۋەرپەرسا تەلەفزیۆنەکەی داواو هەڵوێسی هامبەشیشا کەرد پەی سڵامەتی ڕۆنامەنوویسا و پەشتگیری ۋێشا پەی کۆششو شاندەکەی واوەی کەردۆ. جە کۆبیەیۆکەینە تەئکیدکریاوە کە هرووژمەکۍ دۆڵەتو تورکی تەمامو کورڎەسانی وزۆنە ۋەردەمو هەڕەشا و پەی واوەی نەبیەیۆ هرووژمی هامشێوەی، مشۆم هەڵوێسی هامبەش بۆنە. ۋەرپەرسا (KNN)ی پێشنیارو هەرمانەی هامبەشیشا کەرد پەی کۆکەردەیۆ زانیاری دەربارەو ڕۆنامەنوویسا گەشمەرڎا.
دماتەر شاندەکە سەردای ئۆفیسو (NRT)یشا کەرد، ۋەرپەرسو (NRT) چیا حسێن خێرئامایش جە شاندەکەی کەرد، شاندەکە هەڵوێسو (NRT)یشا ۋەرا ۋەر بە کۆمکوژییەکەی ڕەخنە کەرد. چیا حسێن ڕەخنەکەش قبووڵ کەرد و ئەرەیاۋناش پەنەوازا ئەرەیاۋنێوە عالتەر ئەرەمەرزیۆ.
سەرۋنەداو شاندەکەی جە سلێمانینە دمایش پنە ئاما.
