ڕۆو پێنج شەممەی (٥ / ١١ / ٢٠٢٠)ی، شارەوانی تەوێڵۍ هورئێستەن بە دەست پنەکەردەی چەنڎ پڕۆژێ خزمەتگوزاریێ جە سنورو شارەوانیەکەیشانە. جە ئی بارەوە شارەوانی تەوێڵۍ ئاشکراش کەردەن، "تیمەکێ شارەوانیەکەیشان دەستشان دان دروستکەردەی چەنڎین پڕۆژێ خزمەتگوزاریێ پەی شارەکەی کە بریتیێنێ جە، قیرتاوکەردەی جادەو مەرزو تەوێڵۍ، سەرگێرتەی دەرەو ئاوێسەری، دروستکەردەی ڤاراناوی پەی چادەو ئاوێسەری".
شارەوانییەکە دەستنیشانش کەردەن: "بە تەمانای هەر یەرە پڕۆژەکەی، سودی فرە بە هاموڵاتیێ ناوچەکەی و کوردستانی بیاویۆنە و کارئاسانی پەی هامۆشیێ جە ناوچەکەنە مەکریۆنە".

شارەوانی تەوێڵۍ ساڵەو (١٩٣٥)ی مەرزیانەرە و سەرەتا شاعیر،نویسەر، وەشنویش و پزیشکی میللی (میزا عبدولقادر) بەوەکالەت شارەدارش بییەن. دماتەر شارەوانیەکە وزیانەرە. جە (١٩٤١/١١/٠١)ی شاروانیەکە جارێوی تەر دەستبەکار بییەنەوە و (محەمەد سان ئەحمەد) ئەشناسیا بە (مام ڕەئیس) بییەن بە شارەدارش. ساڵەو (١٩٥٨)ی مام ڕەئیس جە کاروزیان و (مەلا نوری هەڵەبجەیی) یاگێش گێرتەنەوە. جە (١٩٦٤) شۆنیەرە تا  (١٩٦٤) شارەدار (نوری حەمەی نانەوا) بییەن. ساڵەو (١٩٦٤)ی جارێوی (محەمەد سان ئەحمەد) ئەشناسیا بە (مام ڕەئیس) بییەنەوە بە شاردارو تەوێڵۍ و تاوەکو کۆتایی ساڵەو (١٩٧٥)ی بەردەوام بییەن. دمای مام ڕەئیسی، (شێخ موحسن تاوگۆزی) پەی ساڵێوی بییەن بە شاردار. دماتەر (مەلا جمیل عەبدولئەحەد) بەوەکالەت بییەن بە شاردار. شۆنیەرە (هادی محەمەد سان ئەحمەد) یاگێشەنە بییەن شاردار و تا ساڵەو (١٩٨١)ی بەردەوام بییەن. دماو ئا ساڵێ تەوێڵۍ بەهۆو جەنگو ئێران / ئێراقی چۆڵە و وێرانە بیێنە و شارەوانیەکە وزیانەرە. ئا بارودۆخە تا سەرهۆردای ساڵەو (١٩٩١)ی بەردەوام بییەن و تا ئا کاتە جارێوتەر شارەکە خەڵکەکەش پی گێڵانەوە و هەرمانگە فەرمیەکیێش دەستبەکارێ بیێنێوە. شۆنیشەرە شارەوانی تەوڵێلۍ دەستبەکار بییەنەوە و جارێوی تەر (هادی محەمەەد سان ئەحمەد) بینەوە بە شارەدار. دمای ئاڎی (دڵسۆز)ی براش بییەن بە شارەدار. جە ڕێککەوتو (٢٠٠٢/٠٢/٠٣)ی، پەی یەکەم جاری جە پانیشتو کوردستانیەنە هۆروچنای شارەوانییەکان ئەنجام دریان و (دڵسۆز محەمەەد سان ئەحمەد) فرەتەرین دەنگێ تەوێڵەیەکاش مسۆگەرێ کەردێ و دیسان بییەنەوە بەشارەدار. دماتەر (سەردار لهۆنی، راغب عابد، سیروان علی، حاجی حەسن رشید) جە کات و ساتی جیێنە شارەدارێ بیێنێ. شۆنیەرە جە مانگەو (۲۰۱۰/۱۰)ی تا (۲۰۱۷/۷/۱) ، (هیوا ئیسماعیل سدیق) کریان بە سەرۆکو شارەوانی تەوێڵۍ و جە دمای یانەنشین بییەیش، جە (۲۰۱۷/۷/۲)ی تا بە ئارۆ عماد محەمەد خالد، شاردارەن.

سەرەڕاو شارەوانی، هەرمانگاکێ(کارەبا، ڕەگەزنامە، پۆستە و یاونای، ئاسایش، پۆلیس، کشتوکاڵ، تەندروستی و نەوشخانە، نشینگە، سنتەرو چالاکیی و بارئاوردەی، کتێبخانە، باخچەو زارۆڵان، کتێبخانەی گردی)ی جە شارو تەوێڵێنە هەنێ و سەرقاڵێ کارەکانشانێ.