کۊنگرەو پەنجەموو وێڕاوەبەریی شەنگالی بە دروشموو "بە ڕازیاوەیی نیسانی شەنگالی ئاوەدان کەرمێوە، وێڕاوەبەری مسۊگەر کەرمێ" جە مەنتێقەو سنونێی شەنگالینە دەسش پەنە کەرد. کۊنگرەکە جە سەروبەنڎوو جەژنەو چوارشەممەی سوورینە ساز کریۊ و پەیاموو تازەکەرڎەیۊ و ئاوەدانکەرڎەیۊو شەنگالی ئەرەیاونیۊ.

نوێنەراو ڕێکوزیا و دامودەزگاکاو وێڕاوەبەری، نوێنەراو کۊمەڵە ئایینی و باوەڕییەکاو شەنگالی، هێز و لایەنە سیاسیەکاو شەنگالی بەشدارییشا کۊنگرەکەنە کەرد. حەرپاسە جە دەشتەو نەینەوای، سلێمانی، بەغدا و ئەورووپاوە ٣٥٠ نوێنەرۍ و ١٠٠ مێمانۍ، یانۍ گرڎیوە ٤٥٠ کەسۍ بەشدارییشا کۊنگرەکەنە کەرد. حەرپاسە بنەیانەی سەرمەشقوو گلێرگەی ئێزدی مام بەشیریچ جە کۊنگرەکەنە ئامادەن.

'قوربانیۍ گەورۍ دریێ'

کۊنگرەکە کە ڕوۍ خواینۊ، بە خێرامای مێمانەکاو ڕێزگێرتەی جە جەموو گەشمەرڎاو شەنگالی دەسش پەنە کەرد و دماتەریچ هامسەرۊکوو دەسەو ڕاوەبەریی شەنگالی "حەسۊ براهیم" وتاروو کەرڎەیۊ کۊنگرەکەیش پێشکەش کەرد.

حەسۊ جە قسەکاشنە باسش چانەیە کرد، کە جە کۊنگرەو چواریوە تا ئی کۊنگرە پەی پارێزنای و وەڵیوەبەرڎەی وێڕاوەبەری کۊشیای گەورە کریان و واتش : "جە قۊناغی ویەرڎەنە فرە کەسۍ ڕێزدارۍ و شکۊمەندۍ، کە حەریۊشا پێسە تەوەنۍ کەشوو سەنگالی بێنۍ، ڕووبەڕوۍ هجووموو دوژمنی بیێوە. فەرمانڎە و سەرمەشقا گلێرگەی ئێزدی "سەعید حەسەن" هامسەرۊکوو دەسەو ڕاوەبەریی شەنگالی مەروان بەدەل (دژوار فەقیر) جە لاو دوژمنیوە کریا ئامانج. پا هجووما گەرەکشا بۍ ئیراڎەو گلێرگەی ئێزدی ور شاناوە. دماو ئا هجووما هامڕا "ئەنوەر و ئازاد" کریۍ ئامانج. جە ئەنجوومەنوو گەلوو سنۊنێ-نە، هامڕا ئیبراهیم و زارۊڵاو ئیزدی سەلاحی گەشمەرڎۍ بیۍ. چی دمایچۊ فەرمانڎەی ئازا و نەتەرسما "پیر چەکۊ" و "ئاگر جەفەری" تێکەڵ بە کاروانوو گەشمەرڎا بیۍ. یۊ جە ئەرەمەرزناو ئاسایشوو ئێزدخانی فەرمانڎە شێرزادیچ لوا کارەوانوو گەشمەرڎاوە. گرڎوو ئا هامڕایا بەشدارییشا کۊنگرەو چوارینە کەرڎەبۍ، ئێمە بە ڕێز و پەنەزانایۊ یادشا کەرمێوە".

'مدرامان ڕاگێرییش جە ڕێککەوتەی ٩و تشرینوو یوەمی کەرد'

"حەسۊ براهیم" سەرنجەش کێشتە پەی ڕێککەوتەی ٩و تشرینوو یووەمی، کە بە هامکاریی دەوڵەتوو تورکی، پەدەکە و حوکمەتوو "کازمی" ئیمزا کەرڎەبۍ، واتش: "ئەمرە چێروو نامۍ یاسێنە، ڕێککەوتەی ٩و تشرینوو یوەمی، گەرەکشابۍ ڕاو ئا ڕێککەوتەیۊ ئەمرە سەپنا سەرەمارە. چێوە چنڎین هجوومۍ کریۍ سەرما. بە گیانبازی ئەدایا و ژەنا و بەتەمەنەکا، گرڎوو گلێرگەی ئێزدی و گەلوو عەرەبی وەرگێرییشا کەرد و ڕاشا چا ڕێککەوتەیە گێرتە".

براهیم دمایی قسەکاشنە نیشانەش دا، کە سیستموو وێڕاوەبەریی شەنگالی بە ڕەنج و کۊشیایۍ گەورە یاوان ئارۊ و واتش، " تا ئارۊ وێڕاوەبەریما ئارڎەن و چێولایچ درێژەش پەنە مدەیمۍ. جە ڕاو ئی کۊنگرەیۊ گەرەکمانە سەرمەشقبییەی وێما بەقووەت کەرمۍ، هەنگامەی تازۍ و بەقووەتە ور گێرمۍ، ئێمە ئارۊ کۊنگرە ورچنمۍ. ئێمە ئینایمۍ جە سەروبەنڎوو جەژنەو سەروو ساڵۍ و نیسان و ئەوەڵوو ساڵۍ تازێنە. ئێمە تا ئاخر سەروو بنەماو ویر و بڕوێما گنمۍ ڕا، حیچ کەس جە ئێمە جە یانەو وێشنە بێهەرمان مەنیشۊرە".

هەرماننامەو کۊنگرەی

کۊنگرەکە هەرماننامێوە تێروتەسەلش هەن. کۊنگرەکەنە ئەنجوومەنوو وێڕاوەبەریی دیموکراتیکوو شەنگالی، کە جە ١٠١ ئەنداما وەش بییەن ورۍ چنیا. دماو تازەکەرڎەیۊ ئەنجوومەنوو گەلی، هامسەرۊکایەتیی ئەنجوومەنوو وێڕاوەبەریی دیموکراتیکوو شەنگالی و دەسەو وێڕاوەبەریی شەنگالی ورۍ چنیا. یانۍ جە ڕاو ئی کۊنگرەیۊ هەم ئەنجوومەن و هەمیچ ڕاوەبەری تازۍ کریاوە.

س.ز