بەسەرمەشقایەتی جمیەروو ئازاڎیی ژەنا ئێزدی (تاژێ) جە شەنگال یاڎوو گەشمەرڎە ڤیانۍ جە ١٨ەمین ساڵیاڎوو چالاکیەکەیشەنە بەرزڕاگیریا. دماو یاڎکەردەیۆکەی ناوەنڎوو شەنگالینە، جە گلېرگەو دوگرێچ چالاکی یاڎکەردەیۆ لوواڕاوە.

جە چالاکیەکەنە کە جە ئەنجومەنوو گەلوو گلېرگەو دوگرێنە لوواڕاوە، دماو دەیەقێوە بێدەنگی پۍ رێزگرتەی جە یاڎوو گەشمەرڎا، بەڵگەفیلمێوە سەروو ژیۋای و کۊشیای گەشمەرڎە ڤیانۍ نمایشکریا. حەرپاسە نامەکەو گەشمەرڎە ڤیانۍ کە دماو ۋێش جیاشئاستەبۍ ۋنیاوە.

مەڕاسیمەکە بە دروشمەکا "گەشمەرڎۍ مەمرا"، "بۍ سەرۆکی ژیۋای مەبۆ" و "ژەنی، ژیۋای، ئازاڎیی" دمایش پنەئاما.

ئەندامەو دەسەو هەماهەنگی تاژێ شەمۆ مجۆ سەروو مژارەکەی قسێش پۍ ئاژانسەکەیما کەردۍ و واتش، "کەسایەتیێوە پېسە گەشمەرڎە ڤیانۍ هێز و ورە بە ژەنا بەخشۆ، بەتایبەتی ژەناو ئێزدی. ئێمە وەرم و ئاواتەکا گەشمەرڎە ڤیانۍ کەرمۍ بە ئامانج پۍ ۋێما".

شەمێ ئانەیچش وست ڕووە، "با دڵش ئیسراحەت بۆ. گرڎوو ئانیشا کە دەنگوو گەشمەرڎە ڤیانێشا ژنیەن پەی ئامای دی ئامانجەکاش کۊشیانە. پېسە ژەناو ئێزدی بە ئەرکوو ۋێما زانا کە ژیۋای و کۊشیای گەشمەرڎە ڤیانۍ بشناسمۍ و بە دەوروبەروو ۋێماش بشناسمۍ".

شەمێ جە دمادماینە ئەرەیاۋناش، "پېسە ژەنا و ئەڎایا شەنگالی ئێمە تا تەمەنما مەنەبۆ سەروو رێبازەکەو گەشمەرڎە ڤیانۍ بیمۍ. وەرم و ئاواتوو ئاڎۍ کە وینای رابەرایەتی بۍ مارمێنە دی".