سۆهر: جە سووریانە جە ماوەو ڕوێنە ١٦ کەسێ کوشیێنێ
سۆهر ئەرەیاوناش جە ماوەو ٢٤ سەعاتا ویەردەینە جە ناوچەکا چێرو دەسەڵاتو دیمەشقی و ئەرەگیرییەکێ دۆڵتەی ١٦ کەسێ کوشیێنێ.
ڕوانگەو سووری پەی مافەکا مرۆڤی (سۆهر) ئەرەیاوناش، جە ماوەو ٢٤ سەعاتا ویەردەینە جە ناوچەکا چێرو دەسەڵاتو دیمەشقینە و ئا ناوچێ جە لایەنو دۆڵەتو تورکی و چەتەکاشۆ ئەرەگیرێ کریێنێ ١٦کەسێ کوشیێنێ.
سۆهر ئەرەیاوناش، جە دەگا نشینەکا شارو عەزازینە ئەرەگیر کریێ سەرنیشتوو حەلەبی، جە هرووژم و چەتەکانە پەی سەرو کۆمپانیێوە بازرگانی ترۆمبێلی یەرێ هاموڵاتیێ مەدەنیێ کوشیێنێ.
هرووژمو چەکدارا هەتەشەی پەی سەرو درووزییەکا
سۆهر ئاماژەش پانەیەدان، جە ناوچەو ئەشرەفیەو سەحنایەی جە جەنگو بەینو چەکدارا دروزی و هێزەکا دەسەڵاتو دیمەشقینە دووێ ئەندامێ هێزە ئەمنییەکا ڕژێمو دیمەشقی و پەنچ چەکدارێ هەرێمی کوشیێنێ.
سۆهر دەربارەو چارەنووسو هاموڵاتییە بڕفانەکێ درووزییەکا ئینەش وەڵاکەردۆ: ئانەیش ئا شش هاموڵاتییە دروزییێ کە هەفتەی وەڵین جە بۆسەو هێزە لایەنگرەکا حکومەتو سوریای سەرو ڕاو دیمەشقی – سوەیاینە زامڏارێ بیێ، ژیوایشا جەدەسدا."
جە دماینە ئامان: "جە گەراجو گلێرۆنبیەو ترۆمبێلینە جە ناوچەو تیبای ئیمامی دەگاو سەرنیشتوو حەمانەی، سایەقێ جە لایەنو چن چەکدارێوە نەشناسی کوشیۆنە. کۆڵانە و قسوری شارو حەمای زاڕۆڵێوە کە چن ڕوێ وەڵێ ئیسەی بە مەڵامەتو دەستڕێژو گولـلەیۆ بە سەختی زامڏار بی، دماو چن ڕوێ مەنەیۆ گیانش جەدەسدا."
