هونەرمەنڎوو کورڎی، شڤان پەروەر، تیشکیش وستە سەروو جەنگوو دەسەڵاتوو ئاکەپە و مەهەپەی دژوو گەلوو کورڎی و ئەرەگیراو شارەکاو وەرنیشتی  و ئەرەیاوناش، پەنەوازا ئینسان دژوو ئی ئەرەگیرییە مرڎۊوە، داواش جە گەلوو کورڎی کەرڎە: «با ورچنیەیەکاو ١٤و ئایاری با بە سەرکەوتەی شمە، ئینە پارتوو شمەن و ئینا خزمەتتانە، قوربانی بەنرخ مدۊ، ئارۊ بە نامۍ پارتوو چەپی سەوزیوە ئامان وەڵێوە، پەشتیوانییش کەرڎۍ، بەتەنیا جیاش نمازدۍ، جە ١٤و ئایارینە بە ئیرادەو وێتاوە لوودۍ سەروو سندقەکاو دەنگدای و دەنگ بە پارتەکەیتا دەیدێ».

ڕۊشنش کەرڎۊ تورکیا سەروو بناغەو ڕەتکەرڎەیۊ و نکۊڵی مەرزیانرە، واتش: «کۊمار گرڎوو ڕەنگەکاو ئی جوگرافیایشە وێرانۍ کەرڎێنۍ پیسە وێش مەرزنانرە، حەریۊ جە گەلاو ئەرمەنی، سریانی_ئاشووری، ڕۊمی، کورڎی ڕووبەڕووۍ فشاری و چەوسیایۊ بیێنێوە، ئی سیاسەتە سەدێوەن درێژەش هەن، حوکمەتوو ٢١ ساڵی ویەرڎەیچ درێژە بە هەمان سیاسەتی مدۊ، ورچنیەی یۊن جە ڕایەکاو کۊشیای و ئیرادەو دیموکراتیکی، ئارۊ پارتوو چەپی سەوزی ئامان دلۍ ورچنییەیەکاوە، ئی پارتە تەنیا نوێنەرایەتیی کورڎی مەکەرۊ، بەڵکوم نوێنەرایەتیی گرڎوو پێکئامایەکا کەرۊ، برایەتی و ئاشتی پارێزیۊ، بەڕێز ئۊجالان ساڵانێوەن داواو ئاشتیی کەرۊ، حەرگیز لایەنگێروو جەنگی و تندوتیژی نەبییەن، دایمە بانگەوازش کەرڎەن پەی گفتوگۊی پەی چارەسەروو مشکیلەو کورڎی بە ڕاێوە ئاشتییانۍ، داواو ماف و ئازاڎیی گەلوو کورڎیش کەرڎێنە، ئی داوۍ قبووڵە نەکریێنە؛ بە هەمان نۊع بەڕێز "سەڵاحەدین دەمیرتاش" سەرەمڕ باسوو ئاشتی و برایەتیی گەلا و یۊبییەی کەرۍ، کەچی هەڵای ئینا زینڎاننە، فرەو هونەرمەنڎا و نویسەرا و سیاسییەکا دوورۍ وزیێنێوە، ئی ڕێبازە سەرکوتکار و ستەمکارە جە حیچ ئایینێوەنە ڕاش مەبۊوە ».

شڤان پەروەر ئاماژەش پانەیە کەرد، ڕژێموو تاکەکەسی ستەمکاری پیادە کەرۊ بە ڕێبازوو «من تورکنا، من بەقووەتنا، من سوڵتاننا، مشۊم گرڎ چێوۍ بە ئیرادەو من بۊ». ئاشکراش کەرد، هۊشیاری و سیاسەت و گرڎ چێوۍ گەنجاو کورڎی بەرەو وەڵی لوان؛ ئاماژەش کەرد بە گرنگیی پارێزنای دەسکەوتەکاشا و ووڵاتەکەیشا و بەهایەکاشا و واتیچش: «پەنەوازا زوان و کولتووروو وێشا وەش بسیۊ، مشۊم گرڎلایۍ جە مەیڎانەکاو ورچنیەینە کوۍ باوە، دەنگ بە پارتێوە جیاوازی بدا، چونکوم ئی پارتۍ سەرکوتێشا کەرا و بەششا کەرا، وەلۍ پارتەکەو وێشا، پارتوو چەپی سەوزی پارێزنەروو ئاشتی و برایەتی و یۊبییەی بەینوو گەلان، وتار و بەرنامەو پارتوو چەپی سەوزی ئی بەهایا پارێزنۊ.

شارەکاو عەفرینی و سەرێکانی و کۊبانی و گرڎوو وەرنیشتی، ڕوانە ڕووبەڕووۍ هجووموو ئەرەگیری باوە، ئارۊ دەسەڵات ئینیشا کەرۊ، داوا جە گەلوو کورڎی کەروو؛ با ورچنیەی ١٤و ئایاری بۊ بە سەرکەوتەی شمە، ئینە پارتوو شمەن، ئینا خزمەتتتانە، تا ئێساتێچ قوربانیی بەنرخ بەخشۊ، ئارۊ پارتەکە بە نامۍ پارتوو چەپی سەوزیوە ئامان وەڵێوە، پەنەوازا گرڎوو پارتە کورڎییەکا پەشتیوانیی چەپی سەوزی کەرا، پارتوو چەپی سەوزی ئامادەن، بە گرڎ نۊعێوە مەیڎانەکانە، پەشتیوانییش کەرڎۍ و بە تەنیا جیاش نمازدۍ، جە ١٤و ئایارینە ڕووە کەرڎۍ سندۊقەکاو دەنگدای و دەنگ دەیدۍ بە پارتوو چەپی سەوزی، پەی ئازاڎیی ڕابەر عەبدوڵا ئۊجالانی و سیاسەتمەدارا و هونەرمەنڎەکاما».

س.ز