دمانیمەڕۆو ئارۆی هۆڵوو تەوارینە لاو جووڵیایۆکاو وەرنیشتوو کوردستانیوە، پانێڵێوە پەی ساڵیادوو شۆڕشوو ١٢ ئازاری لوا ڕاوە.

ئەوەڵوو پانێڵەکەی بە خولەکێوە مردای پەی گیانی پاکوو گەشمەردا دەسش پەنە کەرد لاو ئامادەبیاوە.

دماتەر باسێوە کوڵ سەبارەت بە شۆڕشوو ١٢و ئازاروو ٢٠٠٤، پەی ئامادەبییا باس کریا، ئەوەڵوو شۆڕشەکەی گەمێوە گۆڵانێنە شاروو قامیشلۆینە، کە بەینوو دێرەزووری و قامیشلۆینە بێ.  

دماو تەمامیای گەمەکەی جەنگ و ئاژاولێ ڕووەش دا، بی بایسوو شۆڕشوو ١٢ ئازاری .

دمای لاو فەتحوڵا  حوسێنییوە، ئەنداموو پارتی چەپوو کوردوو سوریای باس جە قۆناغوو وەڵێ سەرەوردای شۆڕشەکەی پەی ئامادەبیا کریا، واتش حکومەتوو ئا وەختوو سوریای گەرەکش بێ بییەی نەتەوەکای تەری سڕۆوە سوریانە ڕا بە زوانی جگە جە زوانی عەرەبی نەدێ قسێش پەنە کریا، گەر کەسێوە بە زوانی کوردی قسێش کەردێبیێنێ مەکتەب و زانکۆ و پەیمانگاکانە دوور وزیێوە.

ئا ئەندامە ئانەیچش باس کەرد، کە کوردەکاو وەرنیشتی یانەکاو وێشانە فێروو زوانی کوردی و نویستەی و وانایۆ کەرد بەبێ بییەی کتێبی تایبەتی و مەکتەبی تایبەت بە وانای.

دمایی زەهیا ئەلڕاشی، باسش جە قۆناغوو وەشبییەی شۆڕشوو ١٢ ئازاری کەرد، واتش: "شۆڕشەکە گەمێوە گوڵانێوە وەش بی، کە بەینوو هەردووە تیپاو جیهادی شاروو قامیشلۆی و فتوەو شاروو دێرەزووری، چارەکێوە وەلێ دەسپەنەکەردەی گەمەکەی لاو هاندەراو یانەو فتوەیۆ بە تەوەنی هجوومشا کەرد سەروو گەمەکەراو یانەو جیهادی."

هەرپاسە ڕسموو سەدام حسێن-یشا بەرز کەرەبێوە و  و قسێ نەشیێشا وەراوەروو گەمەکەرا و هاندەراو تیپوو جیهادی بەکارئاردێ، پارێزگاروو ئا وەختەو شاروو حەسەکەی گەرەکش بێ ڕوودایەکە گەورەتەر نەبۆ، بەڵام دمایی بە هۆکاروو بەکارئاردەی چەکی، نۆ کەسێ گەشمەرێ بیێ و سەدان کەسێچ بریندارێ بیێ، ڕا نەدریێ بریندارەکێ بیاونیا نەوەشخانەکا.

ڕۆو ١٣مانگ بۆنەو جەنگی و ئاڵۆزییەکاوە ٢٤ کەسێ گەشمەردێ بیێ، چندین کەسێ بریندارێ بیێ، دمایی عەرەبێ شۆڤینێی خەڵکی کیانێنێ سەروو یانە کوردەکا پەی تاڵانکەردەی یانە و دووکانەکاشا.

ئاماژەیچش کەرد: "دماو حەفتێوە حکومەتوو سوریای هەڵمەتێوە فراوانەو گێرتەی هاموەڵاتە کورداش دەس پەنە کەردە، بەوەروەڵای و هاموەڵاتێشا گێرتێ و جۆرەها ئەشکەنجەشا دێ و چەندین کەسێچ تا ئیساتێ دەسوو ئێش و ئەشکەنجەو حکومەتوو سوریایۆ مناڵنا".

دمایی جاویدان کەمال باسوو قۆناغوو بەینوو ساڵاو ٢٠٠٤ پەی ٢٠١١ کەرد، واتش: دماو ساڵەو ٢٠٠٤ حکومەتوو بەعسوو سوریای گەرەکش بێ گەلوو کوردی خاکوو سوریاینە نازۆ، گەلوو کوردیچ بەردەوام هەوڵێ دێ،  دەدا کە ڕاوبەرایەتیێوە وێمانە ئەرەمەرزنۆ، حکومەتوو سوریای چندین جۆرێ دژایەتیی کوردیش یاونا یاگێ، پێسە کوشتەی و گێرتەی و بەرکەردەی وانیاراو کوردی مەکتەب و زانکۆکانە.

ئانەیچش وست ڕووە: دماو قۆمیایەکاو وەهاروو عەرەبییوە وەرنیشتوو کوردستانینە شۆڕش بەردەوام بی، تا کانتۆنەکاو عەفرینی ڕزگارێ کریێ و حکومەتێوە وێڕاوبەر وەش بی.  

یاگێ داخێنە دەوڵەتی ئەرەگیرکەروو تورکی ئەوەڵوو شۆڕشوو وەرنیشتی دژایەتیی وێش پەی شۆڕشەکەی نەشارتۆ، دماو وەشبییەی حکومەتی وێڕاوبەروو وەرنیشتی بەبەردەوامی دەوڵەتی ئەرەگیرکەروو تورکی هجوومێ کەرۆ سەروو کانتۆنەکاو وەرنیشتی و هەوڵێ سڕیایۆ و لاوازکەردەیشا مدۆ.

دمایی پانێڵەکەیچ ئامادەبیێ بە پەرسەکاشا پانێڵەکێشا دۆڵەمەندتەرە کەردە، پانێڵستەکێچ جوابوو پەرسەکاشا داوە.