مامۆسۍ کۆلێجوو داڎ و مافی جە زانشتگەو یو ئێن ئێس دەبڵیوی سیدنی د. ویکی سێنتاس-ە پەی هۊرگېرتەی گۆشەگیری سەروو ڕابەروو گەلوو کوردی عەبدوڵا ئۆجالانی و بەرئارڎەی پەکەکەی جە لیستوو 'رێکوزیا تیرۆریستیەکانە' داواو هەنگامەی خێرایش جە گلێرگەو میان نەتەوەیی کەرڎ.
کەمپینوو 'ئازاڎیی پۍ عەبدوڵا ئۆجالانی، چارەسەری پۍ پرسوو کوردی' کە جە ٧٤ مەنتیقۍ جیاجیاو جەهانینە جە ١٠و تشرینوو یوۋەمی دەسشپنەکەرڎ، تا مۍ زیاتەر گەورە بۆ. د. ویکی سێنتاس-ە جە پەیامێوەنە ئەرەیاۋناش، ئاستەیۆ پەکەکەی جە 'لیستوو تیرۆرینە' ۋەربەسا ۋەردەموو چارەسەرینە و ئانەش وست ڕووە، کە پۍ ئانەی ئا ئاستەنگیە هۊرگیریۆ مشۊم گلێرگەو میان نەتەوەیی گنۆ ۋېش و حۊڵەکاش وزۊنەگەڕ.
د. ویکی سێنتاسە جە پەیامېوەنە ئاماژەش پانەی کەرڎ، کە پیلانگێڵنیی میان نەتەوەیی دژوو ڕابەروو گەلوو کوردی عەبدوڵا ئۆجالانی دژ بە یاسێن و کاریگەریە مەترسیڎارەکېش سەروو کوردی هەڵای بەردەوامېنۍ. واتیچش، جە فرەو ئا چالاکیانە کە پۍ شەرمەزارکەرڎەی سەروو ئاستی میان نەتەوەیی ئەنجامدریۍ نیشانەشادا کە عەبدوڵا ئۆجالان پۍ چارەسەری و دمایی ئارڎەی بە جەنگی دەیان ساڵەی چنڎە گرنگا.
ئینەیچش وست ڕووە: "بەڕێز ئۆجالان ٢٥ ساڵېن دلۍ هەلومەرجۍ نائاسایی گۆشەگیری دژواری و نایاسایینە مەنەنۆ. عەبدوڵا ئۆجالان یەرۍ ساڵۍ ۋیەرڎەنە بە بە تەمامی و بە رەهایی گۆشەگیر کریان و پەیوەندییەکێش چنی پارێزنەرا و جەهانوو بەری قەڎەغەکریېنۍ. ئانە پاشێلکەرڎەی یاساکا تورکیای و یاسا میان نەتەوەییەکان. ئا پاشێلکاریۍ واوەی باوە و سەرەڕاو ئانەی جە لایەنوو کۆمیتەو مافوو مرۆڤی جە نەتەوەیۊگېرتەکایچەنە ئا پاشێلکاریۍ دەسنیشانکریېنۍ، بەڵام حیچ هەنگامېوە جە بارەشاوە هۊرنەگیریان.
واتیچش: "منیچ دەنگوو ۋېم وزوو پاڵوو ئا بانگەوازەی کە پێ ڕا پنەدای بە دیڎاروو بەینوو بەڕێز ئۆجالانی چنی پارێزنەرا و بنەیانەکەیش وزیان ڕووە. مشۊم جە ئاخرەنە بەمەبەسوو چارەسەری پەرسوو دەیان ساڵەو کوردی جە تورکیا و ئېستەیۆ چارەسەرێوە سیاسی دیموکراتیکی، دلۍ هەلومەرجێوەنە کە بتاوۆ دەوروو ۋېش گېڵنۆ، ئازاڎ کریۆ. تاریخ ئانەش پنە نیشانە دېنمۍ کە دمایی ئارڎەی بە جەنگی تەنیا بە بەشداربیەی راستەقینەو گرڎوو لایەنەکا متاوۆ بېنە دی. بەڕێز ئۆجالان جە دەسپنەکەرڎەو پڕۊسەو ئاشتی جە چن ساڵی ۋیەرڎەنە دەورېوە گرنگش گېڵنا. درێژەدای بە زینڎانیکەرڎەی ئاڎیی لەمپەڕۍ ئەساسی ۋەردەموو دەرفەتێوە تازەو پرۆسەو ئاشتین".
د. ویکی سێنتاس-ە ئاماژەش بە کاریگەری فکرەکاو ڕابەروو گەلوو کوردی عەبدوڵا ئۆجالانی سەروو کوردی و حەرپاسە پارادیگماکەیش پەی خوڵقنای دیموکراسی کەرڎ و ئەرەیاۋناش، "ویرۆکەو کۆنفیدڕاڵیزمی دیموکراتیکی بەڕێز ئۆجالانی جە پانیشتوو ۋەرکەوتوو تورکیای تا ۋەرنیشتوو کوردسانی جە سوریا، جە کوردسانەنە رێکوزیۍ و تەرەفڎارۍ ژیۋگەی و نەوېوە تازەو فێمینیستەکاش ئارڎەن کایۆ. ئا فکرۍ بەڕێز ئۆجالان پەشتیوانیشا کەرۆ، دماو ئانەی کورد و پەکەکە دەوری یەکلاییکەرەوەشا جە دلېنەبەرڎەو داعشینە بۍ، ماوېوە فرەن جە مەنتیقەکەنە پەرەشا پنە مڎریۆ و بەردەوامېنۍ".
جە دمادمایی پەیامەکەیشەنە د. ویکی سێنتاس-ە ئانەش وست ڕووە، کە بېجگە جە پاشێلکارییەکا دژوو عەبدوڵا ئۆجالانی حەرپاسە" کوشتەی بۍ داڎگایی، ئەشکەنجە و بێسەروشۊنکەرڎەی و پاشێلکەرڎەی مافەکاو مرۆڤی دژوو گەلوو کوردی تورکیانە بیەیش هەن و بە هەزاران کوردۍ تەنیا بە مەڵامەتوو قسەکاشا، چالاکیەکۍ پۍ داکۆکیکەرڎەی جە ئشناسنامەیشا بە تیرۆر تۆمەتبارۍ کریا. ئانەیچ پۍ ئاستەیۆ نامۍ پەکەکەی جە لیستوو 'تیرۆرینە' گېڵۊوە. ئینەیچ لەمپەرێوەن وەردەموو چارسەرکەرڎەی و دمایی ئارڎەی بە جەنگی. پۍ مردنای ئانەیە مشۊم گلېرگەو میان نەتەوەیی حۊڵەکاش وزۊنەگەڕ".
