سەردەشت؛ کاسبکارێوە کورد بە تەقەو هێزەکا دەوڵەتوو ئێرانی کوشیا
جە ئاکاموو دەسڕێژوو گولـلۍ هێزەکاو دەوڵەتوو ئێرانی جە دەگاو ساوانی شاروو سەردەشتی، جە پارێزگاو ورمێ، کاسبکارێوە کورد کوشیا.
بە پاو هەواڵێوە تۆڕەو مافەکا مرۆڤوو کوردسانی ڕۊو یەرە شەممەی ٨و سیاوکامی (٢٧و شوباتی) هێزەکاو پۆلیسوو ئێرانی جە سەیتەرەو دەگاو ساوانی سەردەشتی دەسڕێژوو گولـلێشا جە ترۊمبێل و کاسبکارێوە کوردی بە نامۍ کاوان ئەمجەدی کەردەن و شۊنیش کۊتێنۍ.
جە ئاکامەنە گولـلێوە ۋەروو سەرەو ئا کاسبکارەیە کۊتەن و دەموو دەس گیانش جە دەسدان و ترۊمبێلەکەیچش وروێڵیان.
ئا ناوەنڎە وەڵاش کەردەنۆ: هجووم پۍ سەروو ئا ترۊمبێلەیە جە وەختێنە بیەن کە حیچ جۆرە بارێوەش چنە نەبیەن.
کاوان ئەمجەدی نیا تاتەو یەرۍ زاوڵان و خەڵکوو دەگاو گوڕە شێری و ئەرەنیشتەو شارۆچکڵەو میراوای سەردەشتی بیەن.
دمابەدماو وەڵابیەیۆ هەواڵوو کوشتەی ئا کاسبکارەیە و کۆبیەیۆ قەوم و کەسوکارەکەیش، ژمارێوە فرە جە هێزە ئەمنییەکا رووانەو شۊنماو رووەداکەی کریۍ، پۍ ڕاگێرتەی جە هەرجۆرە ناڕەزایەتی بەربڕیەیۍ.
جە سەرەتاو ئێساڵیوە لاو کەمیۆ ١٠ کۆڵبەرۍ و کاسبکارۍ کوردی جە ۋەرکەوتوو کوردسانینە کوشیێنۍ و نزیکەو ٩٠ کۆڵبەرا و کاسبکارایچ زامڎارۍ بیێنۍ، کە فرەیشا بە تەقەو راسەوخۆو هێزەکا دەوڵەتوو ئێرانی کریێنۍ ئامانج.
ساڵەی ویەردۍ لاو کەمیۆ ٣٠ کۆڵبەرۍ و کاسبکارۍ کوردی کوشیێبێنۍ و نزیکەو ٢٧٠ کۆڵبەرا و کاسبکارایچ زامڎارۍ بیۍ، ئانەیچ فرەتەرین ژمارەو قوربانیبیەی کۆڵبەران جە ١٠ ساڵی ویەردەنە.
