هاموەخت چنی ئانەی گۆشەگیری دژوار سەروو ڕابەروو گەلوو کوردی عەبدوڵا ئۆجالانی بەردەواما، سەروو ئاستی میان نەتەوەییچەنە واچەکۍ پۍ پەشتیوانی جە هەڵمەتەو 'ئازاڎیی پۍ ئۆجالانی و چارەسەری سیاسی پۍ پرسوو کوردی' کە جە مانگەو تشرینوو یوۋەمینە دەسشپنەکەرڎ، بەردەوامېنۍ. سەرۆکەو یۊبیەی ئازاڎیی جە ئەوروپا لۆرینا لۆپێز دی لاسێلە سەبارەڎ بە گۆشەگیری دژواروو سەروو ڕابەروو گەلوو کوردی عەبدوڵا ئۆجالانی قسېش پۍ ئاژانسوو هەواڵوو فورات (ANF)ی کەرڎۍ. لۆپێز دی لاسێلە داواش کەرڎە کە دەوڵەتوو تورکی گېڵۊوە سەروو مێزەو ئەرەنیشتەی و گفتوگۆی چنی کوردەکا.

جە کەسایەتی عەبدوڵا ئۆجالانینە گەلوو کوردی سزا مڎریۆ

سەرۆکەو یۊبیەی ئازاڎیی جە ئەوروپا لۆرینا لۆپێز دی لاسێلە واتش، کە هەلومەرجوو عەبدوڵا ئۆجالانی جە زینڎانەنە پاشێلکەرڎەی و نکۆڵیکەرڎەین جە یاسا میان نەتەوەییەکا و ئانەش وست ڕووە، کە دەوڵەتوو تورکی یاسا میان نەتەوەییەکا پاشێل کەرۆ. لۆپێز دی لاسێلە ئاماژەش پانەیچ کەرڎ کە نەک حەر جە بەروو زینڎانی، بەڵکم دلۍ زینڎانیچەنە مشۊم مافەکاو مرۆڤی وەروچەمی گیریا و پی جۊرە بەردەوامەبیە، "گۆشەگیرکەرڎەی عەبدوڵا ئۆجالانی بە مەعناو سزادای بنەیانەکەیش و گەلوو کوردین".

'مشۊم پرۆسېوە جە گفتوگۆی چنی عەبدوڵا ئۆجالانی جە ئارانە بۆ'

لۆپێز دی لاسێلە سەرنجش وست سەروو گرنگی پاڕادایموو کۆنفیدڕاڵیزمی دیموکراتیکی ڕابەروو گەلوو کوردی عەبدوڵا ئۆجالانی و پی جۆرە واتش، "عەبدوڵا ئۆجالان ماوېوە فرەن کۆنفیدڕالیزمی دیموکراتیکش قبوڵ کەرڎەن و پی جۆرە پەی بیەی و مەنەیۊی گەلوو کوردی شۊنەو ڕای دیموکراتیکیرە گېڵان. جە هەلومەرجوو گۆشەگیرینە کە حەجگیز مایۍ قبوڵ کەرڎەی نییا. ئێمە بە تەمامی دژوو ئا گۆشەگیرییەنمۍ".

لۆپێز دی لاسێلە ئەرەیاۋناش، کە مشۊم پرسوو کوردی بە گفتوگۆ و ئەرەنیشتەی بە سەرمەشقایەتی ئۆجالانی چارەسەر کریۆ و پی جۆرە درێژەش بە قسەکاش دا: "ئەگەر پرۆسېوە ئاستی بېنە ئاراوە مشۊم عەبدوڵا ئۆجالان چنەشەنە بەشدار بۊ. ئەردۆغان گەرەکش بۊ و گەرەکش نەبۊ ئاژەکە ڕۊشن و ئاشکران. ۋەروو ئانەی چارەسەروو پرسوو کوردی بە دیالۆگ و گفتوگۆکە دەسەبەر بۊ و پەنەوازەن عەبدوڵا ئۆجالان چنەشەنە بەشدار بۊ".

'عەبدوڵا ئۆجالان ڕابەرېوەن کە گەلەکەیش پارېزنۆ'

لۆپێز دی لاسێلە ئانەش وست ڕووە کە ڕابەروو گەلوو کوردی عەبدوڵا ئۆجالان پېسە "ڕابەرېوە کاریزماین کە دەیان ساڵېن پەی گەلوو کوردی پاگیری سەروو چارەسەری سیاسی کەرۊوە و ئەرەیاۋناش، کە مشۊم هەڵوێسوو ڕابەروو گەلوو کوردی عەبدوڵا ئۆجالانی پۍ چارەسەری پرسوو کوردی دڎانش بنریۊ پۊرە. لۆپێز دی لاسێلە واتیچش: "ئینە ڕاسیېوەن کە ئێمە بەمەڵامەتوو جەنگوو بەینوو فەلەستینی و ئیسرائیلی ئینایمۍ ئاژەو جە دەسدای مرۆڤایەتی کۆستێوە مرۆڤایەتینە مژیومۍ. ۋەروو ئانەی ئێمە ئەوروپانە هەنگامە مەنیەیمۍ و کێشەکا چارەسەر مەکەرمۍ ئی جەنگە میاوۊ پی ئاستیە. ۋەروو ئانەی ئێمە جە ۋەختوو ۋېشەنە پەی کوردسانی، گەلوو سەحرا و فەلەستینی حیچ چېۋېما نەکەرڎ، ئارۊ ئی جەنگە یاوا پی ئاستیە. ئێمە گەرەکما نیا تنوتیژی جە گرڎ یاگېنە زیاڎ کەرۆ. ئێمە قەناعەتما پاسەن کە پۍ ئاشتی و دیموکراسی جە جەهانەنە مشۊم ڕا پۍ دیالۆگی و گفتوگۆی کریۊوە. چی ڕووۆ ئێمە بانگەوازەکا عەبدوڵا ئۆجالانی پۍ ئاشتی و دیالۆگی فرە بە مەعنا هۊرسەنگنمۍ".

'بێدەنگی ئەوروپای نیشانۍ دووڕووییا'

لۆپێز دی لاسێلە رەخنەش جە بێدەنگی ئەوروپای جە ۋەران ۋەروو جەنگوو دەوڵەتوو تورکی جە کوردسانوو بە تایبەت جە ۋەرنیشتوو کورڎسانی، گێرت و واتش: "ئا هەڵوێستەو ئەوروپای دووڕووییا. ئێمە ئا دووڕووییەو ئەوروپای شەرمەزار کەرمۍ. ئاشکران کە ئا هجومۍ دەوڵەتوو تورکی نەک هەر پاشێلکەردەی مافەکاو مرۆڤین، جە هەمان وەختەنە دەسوەردای و ئەرەگیرین جە وڵاتێوە تەرەنە".

'ئامانجوو ئەساسی تورکیای دلېنەبەرڎەو ۋەرنیشتیا'

لۆپێز دی لاسێلە باسش چانەی کەرد کە ئامانجوو ئەساسی هجومەکا دەوڵەتوو تورکی پۍ سەروو ۋەرنیشتی دلېنەبەرڎەو ئا سیستمەینە کە ۋەرنیشتەنە ئەرەمەرزیان و پی جۆرە بەردەوامبۍ جە قسەکاش، "ۋەرنیشت سەلەمناش سیستمێوە سیاسیا کە پەشتی بە دیموکراسی جە واریۆ پۍ سەری بەسۆ و جە ۋەران ۋەروو ڕاو تاکڕەوی و دیکتاتۆرینە گەرەکشانە درێژە بە کۊشیای بڎا. ۋېڕاگری مکەرۊ و دیموکراسی خوڵقنۆ. ئامانجوو هجومەکا دەوڵەتوو تورکی دلېنەبەرڎەی ئا سیستمەینە. مەبۆ ئێمە حەجگیز کەرڎەی ئامانج و سیستمێوە پا جۆریە قبوڵ کەرمۍ".

'ئەوروپا دیموکراسی هەرزان ورەش کەرۆ'

لۆپێز دی لاسێلە ئانەش وست ڕووە کە پەیمان و رێککۊتەکا ئەوروپای و تورکیای سەروو پرسوو کۆچبەرا مایۍ قبوڵکەرڎەی نییا پی جۆرە چا بارۆ واتش: "ئەوروپا دیموکراسیەکەو ۋېش فرە هەرزان ورەش کەرۆ. پۍ ئانەی ڕا جە ئامای کۆچبەرا پۍ ئەوروپای گېرۆ چنی تورکیای گرێبەستی ئابووری ئیمزا کەرۆ و جە ئاکاموو ئا رێککەوتانە، ئەوروپا ۋەران ۋەر بە گرڎ پاشېلکارییەکاو مافوو مرۆڤی جە تورکیای و پاشێلکارییەکاو ئەردۆغانی جە ۋەرنیشت و دلۍ وڵاتەکەینە بێدەنگۍ با".