جە بازیدنە سەروازۍ و کرێگرتۍ تورکی بە لوولۍ ئاسنە و پلایس ئەنداموو ئەنجومەنوو گەنجا دەم پارتی بریندار گەزیجشا ئەشکەنجە کەرد. واڵۍ گەزیجی ئانەش وست ڕووە کە ئینە زەقتەرین نمونەو ڕەقوو دەوڵەتین ۋەرا ۋەر بە کوردا.
ئەنداموو ئەنجومەنوو گەنجا دەم پارتی بریندار گەزیج کە جە ٧و ئادارینە جە مەنتیقەو بازیدوو ئاگرینە گیریابۍ، جە قەرەقوڵوو پۆلیسینە جە تەرەفوو سەرواز و جەردەوانەکا تورکیوە رووبەڕوو ئەشکەنجەی کریاوە. ئەرەیاۋییا کە گەزیجی دووۍ ڕووۍ بە لوولۍ ئاسنە و پلایس ئەشکەنجە کریان. گەزیجی جە تەرەفوو دادگایۆ قەراروو گرتەیش پۍ بەرشی و فاڕیاوە پۍ زینڎانوو ئاگری.
ئەشکەنجەکەردەی بە پلایس
واڵۍ گەزیجی، شەرزان گەزیجیە کاروەدایش ۋەرا ۋەر بە ئەشکەنجەکەردەی براکەیش نیشانەدا و ئەرەیاۋناش کە لووێنە پۍ سەردای براکەیش زینڎانەنە و واتش، "براکەم جە بازیدەنە گیریا و فاریاوە پۍ بنکەو پۆلیسوو مەنتیقەکەی و چا ئەشکەنجەکریان. سەروو ڕاو ڕاوەبەرایەتی پۆلیسیۆ ئەشکەنجە کریۆ و هۆش و ۋێش مشۆ. وەختۍ بەراش پۍ بنکەکەی ئاویش کەرا پۊرە و مێوە هۆش و ۋێش و سەرجە نۆ جە تەرەفوو سەرواز و جەردەوانەکاوە بە لوولۍ ئاسنە ئەشکەنجە مڎریۆوە. جە دماینە بە پلایس پەنجەکا دەسوو چەپیش گازنانە. فرەو وەختی بە قۆناغەو تفەنگی سەر و لوت و قاچشا ماڕان. وەختۍ لووانی سەردایش پۍ زینڎانی کە دیم فرە بە دژواری تاوۍ سەروو پەیاوە ۋێش گێرۆ".
'سیستموو ئەشکەنجەو دەوڵەتی ئاشکرا کەرمۍ'
واڵۍ گەزیجی ئەشکەنجەکەردەو براکەیش پێسە زەقتەرین و دیارتەرین نمونەو تەماشەکەردەو دەوڵەتی ۋەرا ۋەر بە کوردا نامۍ بەرد و واتش، "ئانەی ۋەرا ۋەروو براکەیم کریا، سەرنجوو دەوڵەتی ۋەرا ۋەر بە کوردی نیشانە مڎۆ. چا وێنانە قینی، نەژاڎپەرسی ۋەرا ۋەر بە کوردی درک پنەکریۆو وینیۆ. ئێمە پێسە بنەیانەی و پێسە گەلوو کوردیچ ئا ئاژەیە قبوڵ مەکەرمۍ. ئێمە ئا سیستمەو ئەشکەنجە کەردەیە و دەوڵەتی ئاشکرا کەرمۍ. چا بارۆ، ئێمە گرڎوو مافە یاساییەکاما بەکارمارمۍ. پێسە بنەیانەی چێشما دەسەنە بۍ ئێمە کەرمێش".
